Jonatanca mana manchaj, alli amigomi carca

Rey Saulpaj punta churica Jonatán shutimi carca. Jonatanca mana manchaj alli macanacujmi carca. Chaimantami Davidca: ‘Aguilata yalli volaj, leontapish yalli sinchimi can’ nirca. Shuj punllaca Jonatanca jahua lomapi filisteo soldadocuna cajtami ricurca. Paipaj escudota apajtaca: ‘Jehová Dios shuj señalta cujpillami macanacugrishun. Paicunapajman huichiyachun nijpica huichiyashunllami’ nircami. Filisteocunaca macanacungapaj huichiyamuichij nishpami caparircacuna. Chaimi Jonatanpish, paipaj escudota apaj runapish 20 soldadocunata huañuchirca.

Jonatanca Saulpaj punta churi cashcamantami paipaj yaya huañujpica rey tucuna carca. Pero Jehová Dios Israelpi catij rey cachun Davidta agllashcataca allimi yacharca. Chaita yachashpapish paica mana envidiarcachu. Chaipaj randica Davidhuanmi alli amigo tucurca. Paicunaca caishujmanta chaishujmanta cuidarinacushunmi nircacunami. Jonatanca paipaj amigo cashcata ricuchingapajmi paipaj jahua churanatapish, espadatapish, arcotapish, cinturontapish curca.

David Saulmanta miticushpa rijpica Jonatanca paita ricugrishpami: ‘Mana manchaj, sinchimi cana cangui. Diosmi cantaca rey cachun agllashca. Ñuca yayapish chaitaca yachanmi’ nirca. Jonatanca alli amigomi carca. ¿Chashna amigota charinata munanguimanchu?

Jonatanca huañunata yachashpapish achca cutinmi paipaj amigota ayudarca. Paipaj yaya Davidta huañuchisha nishcatapishmi yacharca. Chaimantami Saultaca: ‘Davidta huañuchishpaca juchapimi urmangui. Paica ima mana allitaca mana rurashcachu’ nirca. Chaimi Saulca paihuan pꞌiñarirca. Asha huatacuna qꞌuipaca Saulpish Jonatanpish shuj macanacuipimi huañurcacuna.

Jonatán huañushca qꞌuipaca paipaj churi Mefibosettami Davidca mashcarca. Pai ricurijpica: ‘Cambaj tucui causaipimi cuidasha. Cambaj yayaca ñucapaj alli amigomi carca. Canca siempremi ñuca mesapi ñucahuan micungui’ nircami. Davidca paipaj alli amigotaca manataj cungarircachu.