Millai huarmitaca Diosmi castigarca

Acabca Jezreel llajtapimi causarca. Paica paipaj mandana huasi ventanamantami Nabot runapaj uva chagrata ricuj carca. Chaimantami Acabca uva chagrata charinata munashpa randisha nirca. Pero Nabotca Diospaj Leypi yaya cushca herencia allpata mana cꞌatuna cashcata yachashcamantami mana cꞌatusha nirca. ¿Nabotpaj decisiontaca Acabca respetarcachu? Mana. Ashtahuanpish achcata pꞌiñarishpami paipaj cuartomanta mana llujshisha, mana micusha nirca.

Acabpaj huarmi Jezabelca millaimi carca. Jezabelmi: ‘Canmi Israel llajtapaj rey cangui. Can munashcatami chari tucungui. Ñucami Nabotpaj uva chagrata canman cusha’ nirca. Chaimantami cartacunata quillcashpa Jezreelmanta pushajcunaman cuchun cacharca. Chai cartacunapica: ‘Nabotca Diostami maldicishca. Chaimantami rumicunahuan shitashpa huañuchina canguichij’ nishpami mandarca. Chai pushajcunaca Jezabel nishcatami rurarcacuna. Chaipimi Jezabelca Acabtaca: ‘Nabotca huañushcami. Cunanca uva chagrata japilla’ nirca.

Jezabelca mana Nabotllatachu huañuchirca. Paica achca Diosta sirvijcunatapishmi huañuchirca. Chashnallataj achca mana allicunata rurashpa, yanga dioscunata adorashpami causarca. Jehová Diosca tucui chaicunatami ricucurca. Chaimantaca, ¿imatataj ruragrirca?

Acab huañushca qꞌuipaca paipaj churi Jehorammi mandai callarirca. Chaipimi Diosca Jezabeltapish, paipaj familiatapish castigachun Jehú shuti runata cacharca.

Jehuca paipaj carropi llujshishpami Jezabel causaj Jezreel llajtaman rirca. Jehorampishmi paipaj carropi Jehuhuan ñanpi tupanaman rirca. Paita ricushpaca: “¿Jehú, canca tranquilo causaita mashcanamanchu shamungui?” nircami. Chaimi Jehuca: ‘¿Cambaj mama Jezabel achca mana allicunata rurashpa causajpica ima shinataj tranquilo causaica tiyangari?’ nirca. Chai ratomi Jehoramca paipaj carretata vueltata cuchishpa risha nirca. Pero Jehuca flechahuan disparashpami huañuchirca.

Qꞌuipaca Jehuca Jezabelpaj palaciomanmi rirca. Jezabelca Jehú shamucujta yachashpami maquillarishpa, umata allichirishpa huasi ventanaman llujshishpa shuyarca. Chaimi Jehú chayajpica pꞌiña saludarca. Jehuca Jezabelpaj ladopi caj sirvijcunataca: “¡Chai huarmitaca jahuamanta shitaichij!” nircami. Paicuna jahuamanta shitajpimi urmashpa huañurca.

Qꞌuipaca Jehuca Acabpaj 70 churicunatami huañuchirca. Shinallataj Israelmanta Baal diosta adoranatapishmi chingachirca. Jehová Diosca tucuitami ricucun. Chaimi millaita rurajcunataca ima horas castiganataca alli yachan.