Diosca Jonasmanmi pacienciata ricuchirca

Asiriapi saquirij Nínive llajtapi causajcunaca yallitaj millaicunami carca. Chaimantami Jehová Diosca profeta Jonastaca: ‘Nínive llajtaman rishpa gentecuna paicunapaj causaita cambiachun nigri’ nirca. Pero Jonasca Niniveman rinapaj randica Tarsis llajtaman ricuj barcopimi miticushpa rirca.

Ña ricujpica shuj jatun acapanami jatarirca. Barcota manejajcunaca achcatami mancharircacuna. Chaimi paicunapaj dioscunataca: ‘¿Imamantataj cashna tucunchij?’ nishpa mañarcacuna. Jonasca: ‘Ñucapaj culpami. Diosta mana cazushpami miticushpa shamucuni. Ñucata yacuman shitajpica mama cucha yacuca casijlla tucungami’ nircami. Barcota manejajcunaca mana chaita rurasha nircacunachu. Pero Jonás cutin cutin chashna nijpimi yacuman shitarcacuna. Chaipimi acapanaca casijlla tucurca.

Jonasca cunanca huañushatajmi nishpa yuyashcanga. Yacupi pambaricucushpaca Jehovatami mañarca. Chaimi Diosca shuj jatun pescadota cacharca. Chai pescadoca Jonastaca causajtami millpurca. Pescado ucupi cashpaca: ‘Cantaca siempremi cazusha’ nishpami Diosta mañarca. Jonasca quimsa punllacunatami pescado huijsa ucupi carca. Qꞌuipaca pescadoca chaquishca allpapimi Jonastaca causajta vomitarca.

Shinami Jehová Diosca Jonastaca quishpichirca. Qꞌuipaca cutinmi Jonastaca Niniveman cacharca. Cunanca Dios nishcata cazushpami chaiman rirca. Ña chayashpaca millai gentecunataca: “40 punllacunallapimi Nínive llajtaca tucuchishca canga” nircami. Chaita uyashpami paicunapaj causaita cambiarcacuna. Ninivepaj reypish gentecunataca: ‘Arrepintirishpa Yaya Diosta mañaichij, manapishchari llaquichinga’ nircami. Gentecuna arrepintirijpimi Diosca paicunata mana chingachirca.

Jehová Nínive llajtata mana tucuchishcamantami Jonasca pꞌiñarirca. Shinapish Diosca Jonasman pacienciata ricuchishpami paita llaquirca. Pero Jonasca ninivitacunataca mana llaquircachu. Ashtahuanpish chai pueblomanta rishpa shuj calabaza yura ucupi pꞌiñarishpami tiyarirca. Qꞌuipaca chai yura chaquijpimi Jonasca achcata colerarca. Chaimi Diosca: ‘¿Ninivepi causajcunatapish yallichu cai yuramanta llaquiringui? Ñucaca paicunata llaquishcamantami quishpichircani’ nirca. ¿Diosca Jonasmanca imatataj yachachisha nirca? Ninivitacuna shuj yuratapish yalli valishca cashcatami yachachisha nirca.