Diospaj Gobiernomi para siempre mandanga

Shuj tutaca rey Nabucodonosorca mancharina muscuita charishcamantami mana dormi tucurca. Brujocunata cayashpaca: ‘Ñuca muscui imata nisha nishcata nichij’ nircami. Paicunaca: ‘Jatun mandajlla, can muscushcataca parlayari’ nircacunami. Pero Nabucodonosorca: ‘Mana, cancunami ñuca imata muscushcata nina canguichij. Mana huillajpica huañuchishatajmi’ nircami. Cutinmi paicunaca: ‘Imata nisha nishcata huillangapajca parlanami cangui’ nircacuna. Reyca: ‘Ñucataca llullacunguichijmi. Ñuca imata muscushcata parlaichij’ nircami. Paicunaca: ‘Can mañashcataca pi mana huillai tucungachu. Yallitaj sinchimi’ nircacunami.

Nabucodonosorca yallitaj pꞌiñarishpami tucui brujocunata, yachaisapacunata, Danielta, paipaj amigocunatapish huañuchichun mandarca. Shinapish Danielca reytaca asha punllacunata cuhuai nircami. Chaimi Danielpish, paipaj amigocunapish paicunata ayudachun Diosta mañarcacuna. ¿Paicunata ayudangapajca Diosca imatataj rurarca?

Diosca Nabucodonosorpaj muscui imata nisha nishcataca Danielman muscuipi shinami huillarca. Cayandij punllaca Danielca reyta sirvijpajman rishpami: ‘Yachaisapacunata ama huañuchichu. Reypaj muscui imata nisha nishcata huillai tucunimi’ nirca. Chaimanta sirvij runa reypajman pushajpimi Danielca: ‘Shamuj punllacunapi ima tucunata Dios ricuchishcamantami caita muscushcangui: Shuj jatun runa laya orohuan rurashca umayujtami ricurcangui pechohuan rigracunahuanca cullquimi carca; huijsamanta sanpicunacamaca cobremi carca. Changacunaca fierromi carca. Chaquicunaca fierrohuan barrohuan chagrushcami carca. Qꞌuipaca urcumanta rumi llujshishpami chai jatun estatuapaj chaquipi sinchita huajtarca. Chaimi pꞌaquirishpa ñuturijpi huaira shamushpa tucuita aparca. Chai rumica shuj jatun urcu tucushpami tucui Allpa pachapi jundarca’ nircami.

Qꞌuipaca Danielca Nabucodonosormanca: ‘Cai muscuica caitami nisha nin: Oro umaca cambaj gobiernomi can. Cullquihuan rurashca parteca cambaj qꞌuipa shujtaj mandaj tiyanatami ricuchin. Chai qꞌuipa shamuj mandajca cobre layami canga. Paica tucui cai pachatami mandanga. Catij mandajca fierro shina sinchimi canga. Tucuripica ishquipi chaupishca mandanami tiyanga. Chai mandanaca ashaca sinchi, ashaca pꞌaquirinallami canga. Cutin urcu tucuj rumica Diospaj Gobiernomi can. Chai Gobiernomi tucui gobiernocunata tucuchishpa huiñaita mandanga’ nircami.

Nabucodonosorca Danielpaj ñaupajpi cungurishpami: ‘Cambaj Diosmi ñuca imata muscushcata huillashca. Chaimanta pai shina diosca mana pi tiyanchu’ nirca. Nabucodonosorca Danielta huañuchinapaj randica Babiloniapaj provinciatapish, yachaj runacunatapish mandachunmi churarca. ¿Daniel mañashcata Dios ima shina cutichishcata ricurcanguichu?