Jerusalén llajtapaj pircacuna

Israelmanta caj Nehemiasca Persiapi saquirij Susa llajtapimi causarca. Paica rey Artajerjestami sirvij carca. Shuj punllaca Nehemiaspaj huauquica mana alli huillaicunahuanmi Judamanta chayarca. Paica: ‘Jerusalenman tigrashca israelitacunaca llaquimi causacuncuna. Babiloniocuna llaquichishca muyundij pircacunapish, pungucunapish llaquimi siricun’ nircami. Chaita uyashpami Nehemiasca llaquilla sintirirca. Paicunata ayudasha nishpami rey Artajerjes Jerusalenman cachachun Diosta mañarca.

Asha tiempo qꞌuipaca reyca Nehemías llaquilla cajtami ricurca. Chaimi paica: ‘Cashna llaquilla cajtaca mana nunca ricushcanichu. ¿Imataj tucungui?’ nirca. Nehemiasca: ‘Ñuca llajtaca llaquinaimari. Chaimantami llaquilla cani’ nircami. Chaimi reyca: ‘¿Imatataj rurachun ningui?’ nirca. Chai ratomi Nehemiasca shungu ucullapi Diosta mañarca. Qꞌuipaca: ‘Jerusalenman rishpa pircacunata cutin shayachingapaj cachahuai’ nircami. Rey Artajerjesca rilla nircami. Nehemías ama ima tucunchunpish imalla minishtishcatami cushpa cacharca. Chashnallataj Judá llajtata mandachunmi churarca. Jerusalenpi pungucunata allichichunpishmi caspicunata curca.

Nehemías Jerusalenman chayashpaca pircacuna ima laya cashcatami ricunaman rirca. Qꞌuipaca sacerdotecunatapish, mandajcunatapish tandachishpami: ‘Caica yallitaj llaquimari. Trabajanami canchij’ nirca. Chaimi gentecunaca pircacunata cutin shayachi callarircacuna.

Judiocunapaj contracunaca: “Paicuna shayachicushca pirca jahuaman shuj zorrollapish llujshishpaca chai rumicunataca urmachingallami” nishpami burlarircacuna. Chashna burlarijpipish judiocunaca jatun rucu pircatami rurashpa catircacuna.

Qꞌuipaca huaquin contracunami Jerusalenta ñapish llaquichisha nircacuna. Chaita yachaj chayashpami judiocunaca mancharircacuna. Pero Nehemiasca: ‘Ama manchaichijchu. Jehovami ñucanchijhuan can’ nircami. Shinallataj trabajadorcunata cuidachunpish guardiacunatami churarca. Chashnami contracunaca mana llaquichi tucurcacuna.

Jerusalenpaj pircatapish, pungucunatapish 52 punllacunallapimi shayachircacuna. Chaimi Nehemiasca shuj fiestata rurangapaj levitacunata Jerusalenman pushamurca. Paicunataca ishqui grupotami rurarca. Shuj grupoca Esdrashuanmi carca. Caishuj grupoca Nehemiashuanmi carca. Qꞌuipaca shuj grupoca alli ladoman, caishujca lluqui ladomanmi pirca jahua muyundijta rircacuna. Shinallataj trompetacunata, cimbalocunata, arpacunata tocashpami Jehová Diosta cantarcacuna. Chashnami Diospaj huasipi tandanacurcacuna. Chaipica tucuicunami achcata cushicushpa Diosman sacrificiocunata curcacuna. Paicuna cushilla cantacushcaca carumanmi uyarirca.