Ángel Gabrielca Mariatami visitarca

Mariaca shuj joven solterami carca. Paica Galileapi caj Nazaret pueblopimi causarca. Elisabetpaj familiami carca. Mariaca José shuti carpintero runahuanmi cazaragrirca. Elisabet ña seis quillacunata chichu cajpimi ángel Gabrielca Mariataca: “Imanalla María. Jehová Diosmi cantaca yallitaj cꞌuyashca” nirca. Chaita María mana intindijta ricushpami angelca: ‘Chichu saquirishpami shuj cꞌari huahuata huachangui. Paitaca Jesús shutita shutichingui. Paica reymi canga. Huiñaitami mandanga’ nirca.

Mariaca: “¿Ima shinataj shuj huahuataca charishari? Manaraj cusayuj canica” nircami. Shina nijpimi angelca: ‘Diosca tucuitami rurai tucun. Diospaj espíritu santo cambaj jahuaman shamujpimi shuj huahuata charingui. Cambaj familia Elisabetpish chichumi can’ nirca. Chaimi Mariaca: “¡Ñucaca, Jehová Diosta sirvijllami cani! Can nishca shina tucui imapish pajtarichunlla” nirca.

Mariaca urcucunapi caj llajtamanmi Elisabetta visitanaman rirca. Ña chayashpaca Elisabettami saludarca. Chaimi Elisabetpaj huijsa ucupi caj huahuaca cuyurirca. Espíritu santota chasquishpami Elisabetca: ‘María, Jehovami cantaca bendiciashca. Ñuca Amitopaj mama visitanaman shamushcamantami achcata cushicuni’ nirca. Chaimi Mariaca: ‘Jehová Diostami jatunyachini’ nirca. Quimsa quillacunatami Mariaca Elisabethuan saquirirca. Qꞌuipaca Nazaretmanmi tigrarca.

María chichu cashcata yachaj chayashpami Joseca paihuan ña mana cazarasha nirca. Pero shuj ángel muscuipi ricurishpami paitaca: ‘Mariahuan cazarailla. Paica ima mana allitaca mana rurashcachu’ nirca. Chaimi Joseca Mariahuan cazarashpa paipaj huasiman pusharca.