Testigo de Jehovacunaca Jesustami alli catinchij

Testigo de Jehovacunaca Jesusta alli catijcuna cashcatami crinchij. Pero ¿ñucanchij crishcacunaca maipitaj can? ¿Imamantataj testigo de Jehovacuna shutita charinchij? ¿Cꞌuyaitaca ima shinataj ricuchinchij?

1. ¿Testigo de Jehovacunapaj crishcacunaca maipitaj can?

Jesucristoca Jehová Diosmanca: “Cambaj Shimica manataj llullajchu” nircami (Juan 17:17). Chaimantami Testigo de Jehovacunapaj crishcacunaca Diospaj Shimipi can. Ñucanchijpish Jesús shinami Diospaj shimihuan yachachinchij. 1870 huatacunapimi Bibliata alli yachai callarircanchij. Ñucanchij crishcacunaca huaquin iglesiacunamanta chꞌican cajpipish Bibliapi cashcatami ricuchishcanchij. Qꞌuipaca ñucanchij crishcacunataca shujtajcunamanmi huillai callarircanchij.a

2. ¿Imamantataj testigo de Jehovacuna shutita charinchij?

Testigo de Jehovacunaca Jehová Diosmantami verdadta huillanchij. Ñaupa tiempopica Diosca paita sirvijcunataca, ‘cancunami ñuca huillajcuna’ o ‘ñuca testigocuna canguichij’ nircami (Isaías 43:10-ta liyipai). Cunan punllacunapipish Jehová Diosca paita adorajcunataca ñuca Testigocunami canguichij ninmi (Hebreos 11:4–12:1). Chaimantami 1931 huatamanta testigo de Jehovacuna shutita charinchij. Cai shutita charishpaca cushillami sintirinchij. Jesuspish Huillaj o alli Testigomi can (Apocalipsis 1:5).

3. ¿Testigo de Jehovacunaca ima shinataj Jesús shina cꞌuyaita ricuchinchij?

Jesusca paipaj catijcunataca achcatami cꞌuyarca. Paipajca shuj familia shinami carca (Marcos 3:35-ta liyipai). Testigo de Jehovacunapish muyundij Allpapimi shuj familia shina canchij. Chaimantami ñucanchijpuraca huauqui pani ninacunchij (Filemón 1, 2). Ashtahuanpish ‘tucui huauquicunata cꞌuyaichij’ nishcatami cazunchij (1 Pedro 2:17). Huauqui panicuna llaquicunata charijpica ayudangapajmi tucuita ruranchij. Chashnami cꞌuyashcata ricuchinchij.

ASHTAHUAN YACHAI

4. Ñucanchij crishcacunaca Bibliapimi can

Jehová Diosca Bibliamanta yachaicunaca ashtahuanmi mirashpa catinga nircami. Daniel 12:​4-ta liyipai. Qꞌuipaca cai catij tapuitami yachashun:

• Testigo de Jehovacunaca Bibliamantami ashtahuan yachacuncuna. Shinaca ¿Daniel 12:4-pica imataj ashtahuan ‘miraricun’ nin?

Huaquincuna Bibliata ima shina estudiajcuna cashcata ricui. Paicunapurapica Charles Russelmi carca. VIDEOTA ricui. Qꞌuipaca cai catij tapuitami yachashun:

VIDEO: Biblia ima yachachishcatami intindircacuna (7:45)

• ¿Cai videopica Charles Russelpish caishuj Bibliamanta yachajcunapish ima shinataj Bibliata estudiajcuna carca?

¿Caita yacharcanguichu?

Ima shinami pacarimujpica inti llujshishpa asha asha achijyachishpa tucuita ricuchun ayudan. Chashnallatajmi Diosca Bibliamanta asha asha intindichishpa ayudashca (Proverbios 4:18-ta liyipai). Chaimantami huaquinpica ñucanchij crishcacunatapish cambiashcanchij. Pero Bibliapi tiyaj yachaicunaca mana cambiashcachu.

5. Jehovamantami huillanchij

VIDEO: Testigos de Jehovami canchij (2:40)

• ¿Imamantataj testigo de Jehovacuna shutita charinchij?

Jehová Diosmanta achca llullacunata nishcamantami paica huaquin runacunata paimanta verdadta yachachichun agllashca. Huaquin llullacunamanta yachashun.

Huaquin religioncunapica Diostaca santocunahuanmi adorana can nishpami yachachincuna. Levítico 26:​1-ta liyipai. Qꞌuipaca cai catij tapuitami yachashun:

• Cai versopi yachachishca shinaca ¿Yaya Diosca paita santocunahuan adoranamantaca imatataj yuyan?

Iglesiacunapi yachachijcunaca Jesusca Yaya Diosmi can nishpami yachachincuna. Juan 20:17-ta liyipai. Qꞌuipaca cai catij tapuicunatami yachashun:

• Cai versopi nishca shinaca ¿Yaya Diospish Jesuspish shujllachu can?

• ¿Jehová Diosca paimanta, Jesusmanta verdadta huillachishcamantaca imatataj yuyangui?

6. Caishujmanta chaishujmantami cꞌuyanacunchij

Bibliapica Jesusta alli catijcunataca cuerpopaj chꞌican chꞌican miembrocunahuanmi chꞌimbapuran. 1 Corintios 12:25, 26-ta liyipai. Qꞌuipaca cai catij tapuicunatami yachashun:

• ¿Huauqui panicuna llaquicunata charijpica Jesusta alli catijcunaca imatataj rurana can?

• ¿Testigo de Jehovacunapurapica cꞌuyaitaca ima shinataj ricuchin?

Maijan huauqui pani ima llaquita charijpica muyundij Allpapi caj testigo de Jehovacunaca utcami ayudancuna. Caimanta shuj ejemplota ricushun. VIDEOTA ricui. Qꞌuipaca cai catij tapuitami yachashun:

VIDEO: Haití llajtapimi jatun acapana tiyarca (5:29)

• ¿Testigo de Jehovacunaca ima shinataj cꞌuyaita ricuchin?

YUYARISHUNCHIJ

Testigo de Jehovacunaca Jesusta alli catijcunami canchij. Ñucanchijca mundo enteropi shuj familia shinami Jehová Diosta adoranchij. Ñucanchij crishcacunapish Bibliapimi can. Shujtajcunamanpish Jehová Diosmantami verdadta yachachinchij.

Yuyaringapaj tapuicuna

• ¿Imamantataj testigo de Jehovacuna shutita charinchij?

• ¿Ima shinataj caishujmanta chaishujmanta cꞌuyanacushcata ricuchinchij?

• ¿Testigo de Jehovacunaca Jesusta alli catijcuna cashcatachu cringui?

CAICUNATAPISH RICUI

Testigo de Jehovacunamanta ashtahuan yachai.

Testigo de Jehovacunaca sinchi feta charishcatami ricuchishca. Parte 1: Panda yachachishcacunatami saquincuna (1:00:53)

Religioncuna llullacunata nishcamantami testigo de Jehovacunaca verdadta yachachin. Caita ima shina rurashcata ricui.

Diospaj puebloca paipaj shutitami jatunyachin (7:08)

Testigo de Jehovacunamanta ashtahuan yachasha nishpaca caita ricui.

“Testigo de Jehovacunamanta tapuicuna” (jw.org paginapi ricui)

Stephen runaca shujtajcunata pꞌiñashcamantami macashpa, shuhuashpa purij carca. Testigo de Jehovacuna ima shina cashcata ricushpa paipaj causaita cambiashcata yachai.

“Mana allicunallata rurashpami causaj carcani” (Huillaj, 1 de julio de 2015)