3 ¿Ima shinataj mañana canchij?

HUAQUIN religioncunapica, tiyarishpa, cungurishpa, shayarishpa mañana importante cashcatami nincuna. Shinallataj huaquin agllashca shimicunata nishpa mañana cashcatami nincuna. Pero Bibliapica Diosta alli mañangapaj ima ashtahuan importante cashcatami yachachin.

Bibliapica Diosta sirvijcuna ima shina Diosta mañashcatami liyi tucunchij. Paicunaca chꞌican chꞌican lugarcunapimi Diosta mañajcuna carca. Maijancunaca huichilla jahua pachata ricushpa, shujtajcunaca cumurishpa, maijancunaca shungu ucullapi o sinchita parlashpami mañajcuna carca. Pero paicunaca mana santocunata, rosariocunata, o rezocunata catina librocunata utilizashpachu mañarcacuna. Chaipaj randica paicunapaj shungu ucumantami Diosta mañarcacuna. ¿Paicuna mañashcataca imamantataj Diosca uyarca?

Ñaupa yachaipi ricushca shinaca ñucanchijca Jehová Diosllatami mañana canchij. Pero ¿pai uyachunca imatataj ashtahuan rurana canchij? 1 Juan 5:14-pica: “Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij” ninmi. Ari, ñucanchijca Diospaj munai maijan cashcata yuyaipi charishpami paita mañana canchij. ¿Chaica imatataj nisha nin?

Ñucanchijca Diospaj munai maijan cashcata yachangapaj, Diosta imallacunamanta mañana cashcata yachangapajca Bibliatami estudiana canchij. Pero ¿Dios ñucanchij mañashcacunata uyachunca Bibliamantaca tucuitachu yachana canchij? Mana. Shinapish Yaya Diosca paipaj munai maijan cashcata yachachun, intindichun, causaipi pajtachichunmi munan (Mateo 7:21-23). Ñucanchijca Bibliapi ima yachachishcata intindishpami Diostaca mañana canchij.

Shinallataj Jehová Diosmanta yachajpi, paipaj munai maijan cashcata yachajpimi ñucanchij fepish ashtahuan sinchiyanga. Sinchi feta charina o Diospi crinaca importantemi can. ¿Imamanta? Jesusca: “Tucui imatapish crishpa Diosta mañashpaca, chasquinguichijmi” nircami (Mateo 21:22). Pero feta charinaca mana imatapish crina cashcallamanta crinachu can. Ashtahuanpish ñucanchijca mana ricui tucushcacunata mana ricushpapish pruebacuna tiyashcamantami sinchi feta charinchij (Hebreos 11:1). Jehová Diostaca mana ricui tucunchijchu. Pero pai tiyashcata cringapaj, paipi confiai tucushcata yachangapaj, ñucanchij mañashcacunata uyaj cashcata cringapajca Bibliapimi huaquin pruebacunata ricui tucunchij. Jehová Diostaca ñucanchij feta sinchiyachichunmi mañai tucunchij. Paica ñucanchij mañashcacunataca cushicushpa cunatami munan (Lucas 17:5; Santiago 1:17).

¿Dios ñucanchij mañashcacunata uyachunca imallatataj rurana canchij? Jesusca: “Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami (Juan 14:6). Ñucanchijca Jesusmantami Yaya Diostaca mañai tucunchij. Jesuspish paita catijcunataca paipaj shutipi Diosta mañachunmi yachachirca (Juan 14:13; 15:16). Pero Jesuspaj shutipi mañanaca mana Jesusta mañana nisha ninchu. Ashtahuanpish Jesusmanta Yaya Diospajman cꞌuchuyai tucushcata intindinami can.

Shuj cutinpica Jesusta catijcunaca: “Mandaj Jesús, ñucanchijtapish Taita Diosta mañanata yachachi” nircacunami (Lucas 11:1). ¿Imatataj nisha nircacuna? Paicunaca Diosta ima shina mañanataca ñami yacharcacuna. Ashtahuanpish paicunaca imallacunamanta mañana cashcata yachachichunmi mañarcacuna.