¿Jesuspajca Diospaj Gobiernomanta huillanaca imamantataj valishca carca?

Sarun yachaipi ricushca shinaca Jesusca ‘Diospaj Mandanamanta’ o ‘Diospaj Gobiernomantami alli huillaicunata’ yachachij carca (Lucas 8:1). Paica tucui Israel llajtapi causajcunaman huillangapajmi achca kilometrocunata purirca. Mateo, Marcos, Lucas y Juan Evangeliocunapica 100 cutin yallitami Diospaj Gobiernomanta parlan. Pero chai librocunapica Diospaj Gobiernomantaca mana tucuita parlanchu. Diospaj Gobierno tucui imalla ruragrishcata escribinata munajpipish ni siquiera Evangelio librocunapi mana pajtanmanchu (Juan 21:25).

¿Jesuspajca Diospaj Gobiernomanta huillanaca imamantataj valishca carca? Yaya Diosca Jesustami paipaj Gobiernopi rey cachun agllarca (Isaías 9:6; Lucas 22:28-​30). Pero autoridadta charinallaca Jesuspajca mana importantechu carca (Mateo 11:29; Marcos 10:17, 18). Ashtahuanpish cai Gobierno paipaj Yayamanta, paita catijcunamanta imata ruranataca allimi yacharca. Chaimantami Jesuspajca Diospaj Gobiernomanta huillanaca valishca carca. Cunanpish Jesusca Diospaj Gobierno imallata ruracushcataca allimi yachan.a

¿JESÚS MANDACUSHPACA PAIPAJ YAYAMANTACA IMATATAJ RURANGA?

Jesusca paipaj Yayataca tucui shunguhuanmi cꞌuyan (Proverbios 8:​30; Juan 14:31). Yaya Diosca cꞌuyaj, llaquij, cashcata rurajmi can (Deuteronomio 32:4; Isaías 49:15; 1 Juan 4:8). Paipaj Yaya chashna cashcata yachashcamantami Jesusca Diosmanta nishca llullacunataca millanayachin. Pero achca gentecunaca: “Yaya Diosca ñucanchijmanta mana preocuparinchu. Llaquicunaca Diosmantami shamun” nincunami. Chaimantami Jesusca Diospaj Gobiernomanta alli huillaicunata huillangapaj shamurca. Jesusca chai Gobiernopi mandacushpami Diosmanta nishca llullacunataca mana cierto cashcata ricuchinga (Mateo 4:​23; 6:​9, 10). ¿Chaitaca ima shinashi ruranga?

Jesús mandacujpica gentecuna charishca llaquicunaca ña mana tiyangachu. Diospaj Gobiernoca gentecunapaj ‘ñahuicunamantaca, tucui huiquitami pꞌichanga. Huacaipish, llaquipish, nanaipish ña mana ashtahuan tiyangachu’ (Apocalipsis 21:​3, 4). Gentecunapish huiñai huiñaitami cushilla causashun.b

Paipaj Gobiernohuanmi Yaya Diosca llaquij cashcata, tucui poderta charishcatapish ricuchinga. Chaimantami Jesusca chai Gobiernomanta yachachinata munarca (Santiago 5:​11). Pero chai Gobiernoca Dios alli cashcallataca mana ricuchingachu. Diosta sirvijcunamanpish achcatami bendicianga.

¿JESÚS MANDACUSHPACA DIOSTA SIRVIJCUNAMANTACA IMATATAJ RURANGA?

Jesusca manaraj cai Allpaman shamushpaca jahua pachapimi paipaj Yayahuanca achca tiempota causarca. Paimi jahua pachapi, cai pachapi tucui imalla tiyajcunata, gentecunatapish rurashpa ayudarca (Colosenses 1:​15, 16). Pero tucui chai rurashcacunamantaca gentecunatami Jesusca ashtahuan cꞌuyarca (Proverbios 8:​31).

Jesusca gentecunata cꞌuyashcamantami cai Allpaman shamurca. Paica, ‘ayudata minishtijcunaman alli huillaicunata huillangapajmi shamurcani’ nircami (Lucas 4:​18). Ashtahuanpish paicunata cꞌuyashcataca ruraicunahuanmi ricuchirca. Por ejemplo, shuj punllaca gentecuna paita uyangapaj tandanacujpica ‘paicunata llaquishpami ungushca cajcunataca alliyachirca’ (Mateo 14:14). Cutin shuj punllami lepra ungüihuan caj shuj runaca Jesuspajman shamushpaca: “Amito, ñucata alliyachisha ninguipishchari” nirca. Shina nijpimi Jesusca: “Ari, alliyachisha ninimi” nirca. Chaimi “lepra ungüica paimanta anchurca” (Lucas 5:​12, 13). Shinallataj Lázaro huañushcamanta María huacacujta ricushpami Jesuspish yallitaj llaquirishpa huacarca (Juan 11:32-​36). Chaimantami Jesusca shuj milagrota rurashpa Lázaro chuscu punllacunata huañushca cajpipish paita causachirca (Juan 11:38-​44).

Jesusca allimi yacharca pai rurashca milagrocunaca asha punllacamalla cashcata. Pai jambishca gentecuna, causachishca gentecunaca cutin ungushpa huañuna cashcatapishmi alli yacharca. Chaimantami Jesusca mana milagrocunallata rurarca. Ashtahuanpish Diospaj Gobiernolla tucui llaquicunata tucuchinata yachashcamantami paica tucui shunguhuan alli huillaicunata huillarca (Mateo 9:​35). Jesús rurashca milagrocunaca Diospaj Gobierno imallata rurana cashcatami ricuchirca. Caimanta ashtahuan yachangapajca Bibliapi ricushun.

• Ungüicunaca ña mana tiyangachu.

  Isaías 35:​5, 6-pica: “Ñahui mana ricujcunapaj ñahuicunatapish pascashcami canga. Mana uyajcunapaj rinrincunatapish pascashcami canga. Cojocunapish taruga shinami saltacungacuna. Mana rimajpaj cꞌallupish cantacungami” ninmi. Shinallataj Isaías 33:24-pica: “Caipi causajcunaca: ‘Ungushcami cani’ nishpa pi mana ningacunachu” ninmi.

• 

  Huañuica mana tiyangachu.

  Salmo 37:29-pica: “Cashcata rurajcunallami Dios cusha nishca llajtata japingacuna. Tucui causaipimi chai llajtapi causangacuna” ninmi.

  Isaías 25:8-pica: “Mandaj Jatun Diosca, huañuitapish huiñaipajmi chingachinga. Tucuicunapaj ñahuimantami huiquicunata chaquichinga” ninmi.

• Huañushcacunapish causaringacunami.

  Juan 5:​28, 29-pica: ‘Tucui pambashcacuna Runa Aichayuj rimashcata uyana chayamucunmi. Chaipica causaringacunami’ ninmi.

  Hechos 24:15-pica: ‘Huañushcacunatami Diosca causachinga’ ninmi.

• 

  Tucuicunami huasitapish, trabajotapish charingacuna.

  Isaías 65:21, 22-pica: ‘Huasicunatami shayachingacuna. Chaipimi causangacuna. Uvacunatami tarpungacuna. Chaipi pꞌucushcacunatami micungacuna. Shujtajcuna causachunllaca mana huasichingachu. Shujtajcuna micuchunllaca mana tarpungacunachu. Ñuca agllashcacunaca paicuna trabajashcahuanca paicunallatajmi cushicungacuna’ ninmi.



• Macanacuicunaca ña mana ashtahuan tiyangachu.

  Salmo 46:9-pica: ‘Diosca tucui cai pachapi macanacuicunataca tucuchingami’ ninmi.

  Isaías 2:4-pica: “Caishuj llajtapi causajcunahuan, chaishuj llajtapi causajcunahuan macanacuica ña mana tiyangachu. Macanacuipaj yachachinapish, ña mana tiyangachu” ninmi.

• 

  Micunacunami tiyanga.

  Salmo 67:6-pica: “Allpaca pꞌucungami. Taita Diosca alli cashca cachun ningami. Paica ñucanchij Taita Diosmari” ninmi.

  Salmo 72:16-pica: ‘Allpapica lutsai muyullatami tarpunga. Chaica tucui urcu puntacunacama tucuita granomi pꞌucunga’ ninmi.

• Huajchacuna o pobrecunaca ña mana tiyangachu.

  Salmo 9:​18-pica: ‘Huajchacunataca manataj cungangachu’ ninmi.

  Salmo 72:12, 13-pica: “Huajchacuna caparijpica, paimi quishpichinga. Llaquilla caj pi ayudaj illajlla cajtapish paimi ayudanga. Huajchataca llaquingami. Imata mana charijtaca llaquingami. Huajchacunapaj causaitaca quishpichingami” ninmi.

Dios tucui cai bendicioncunata cusha nishcamantami Jesuspajca Diospaj Gobiernomanta huillanaca valishca carca. Paica Diospaj Gobiernolla tucui llaquicunata tucuchinata yachashcamantami paita uyasha nij gentecunamanca cai Gobiernomanta huillarca.

¿Yaya Dios cusha nishca bendicioncunata chasquisha ninguichu? Shinaca ¿ima shinataj Diospaj Gobiernomanta ashtahuan yachai tucungui? ¿Dios cusha nishca bendicioncunata chasquingapajca imatataj rurana cangui? Cai tapuicunamantaca catij yachaipimi ashtahuan yachangui.