CALLARI YUYAIMANTA | JAHUA PACHAPICA ¿PICUNATAJ CAUSAN?
Jahua Pachamanta Chꞌican Chꞌican Yuyaicuna
¿Jahua pachaca ima shinataj can, chaipica picunataj causan nishpa tapurishcanguichu? Chaitaca achca gentecunami yachasha nishcacuna. Huaquin gentecunaca jahua pachapica ñaupa yaya mamacunami causancuna, paicunataca jatunyachinami canchij nincunami. Shujtajcunaca jahua pachapica cushilla tranquilo causaimi tiyan, chaipica angelcunapish, causarishca alli gentecunapishmi causan nincunami. Cutin shujtajcunaca achca dioscunami causancuna nincunami.
Gentecunaca jahua pacha ima shina cashcataca mana yachai tucunchijchu, chaimantaca ni pi mana shamushcachu nincunami. Pero chaica mana ciertochu can. Jesusca manaraj cai allpaman shamushpami jahua pachapi ña causarca. Jesús allpapi causacushpaca religionta pushajcunataca: “Ñucaca jahua pachamantaca, mana ñuca munaita rurangapaj shamurcanichu. Ashtahuanpish ñucata cachaj Yayapaj munaita rurangapajmi shamurcani” nircami. Jahua pachapi causashcamantami Jesusca: “Ñuca Yayapaj huasipica, causanaca achcami tiyan” nircami (Juan 6:38; 14:2).
Jesuspaj yayaca Jehová shutimi can. Paica jahua pachapimi causan (Salmo 83:18). Chaimantami Jehovapish Jesuspish jahua pacha ima shina cashcataca huillai tucun. Paicunaca muscuipi shina ricuchishpami paita servijcunamanca jahua pacha ima shina cashcata huillarcacuna.
Catij yachaipica Bibliapaj huaquin versocunatami ricushun. Chai versocunapica huaquin cꞌaricuna muscuipi laya imata ricushcatami yachashun. Cai versocunata yachacushpaca caipi yuyai: Cai allpapica tucuitami ricui tucunchij, japi tucunchij, pero jahua pachapi causaica mana cai allpapi layachu can. Chaimanta jahua pacha ima shina cashcata entendichingapajca Diosca muscuicunapi shina ricuchishpami paita servijcunaman yachachirca. Cai versocunata yachashpami jahua pachapi causajcunata ashtahuan rijsishun.