¿Yacharcanguichu?
¿Jesusca allquitucunahuan chꞌimbapurashpaca rimacurcachu?
Grecia o Roma llajtamanta shuj huahuami shuj allquituhuan can (Jesús manaraj huacharishca (J.m.h.) 100 huatamanta, Jesús huacharishca qꞌuipa (J.h.q.) 200 huatacamami canga)
Jesús Tiro pueblopi cajpimi griego shimita parlaj shuj huarmica paipajman cꞌuchuyashpa ayudachun mañarca. Jesusca mana judiocunataca ‘allquitucunahuan’ chꞌimbapurashpami cutichirca. Shinapish Moisesman cushca leypica allcucunaca mapa animalcunami carca (Levítico 11:27). ¿Jesusca ‘allquitucuna’ nishpaca chai huarmita, mana judiocunatapish rimacurcachu?
Mana. Chai chꞌimbapuraihuanca Jesusca judiocunata ayudana tiempo cashcatami paita catijcunaman intindichirca. Chaimantami Grecia llajtamanta caj huarmitaca: “Huahuacunapaj micucushcata quichushpa, allquitucunaman shitanaca mana allichu” can nirca (Mateo 15:21-26, QC, 1989; Marcos 7:26). Grecia llajtapi, Roma llajtapica allcuca familiahuan causaj cashcamanta, huahuacunahuanpish pugllaj cashcamantami cꞌuyashca carca. Chaimantami Jesús ‘allquitucuna’ nijpica chai huarmica cꞌuyaita ricuchicushcata intindishpa: “Ari, amito. Shina cajpipish amocuna micucushpa urmachishcataca allcucunapish micunllami” nirca. Chashna nijpimi Jesusca “can crishcaca tucuita yalli jatunmi” nishpa paipaj ushushita alliyachirca (Mateo 15:27, 28).
¿Pabloca cai rato rinaca mana allichu can nishpaca pandarircachu?
Cargata apaj jatun barcotami rurashca (Jesús huacharishca qꞌuipa (J.h.q.) 1-huatamanta 100-huatacama)
Italia llajtaman ricuj barcopimi apóstol Pablotaca pushacurcacuna. Sinchi huairacuna tiyajpimi shuj llajtapi shayarircacuna. Ñaupajman caticujpimi Apóstol Pabloca cai rato rinaca mana allichu can nirca (Hechos 27:9-12). ¿Pabloca imamantataj chashna nirca?
Ñaupa punllacunapi yacuta rijcunaca tamyacujpi Mediterráneo mama cuchata rinaca mana alli cashcatami alli yacharcacuna. Casi 15 de noviembremanta 15 de marzo quillacamaca chai yacuta rinaca mana jahuallachu carca. Shinapish Pabloca septiembre u octubre quillacunapimi barcopi rishca canga. Jesús huacharishca qꞌuipa casi 400 huatapimi Flavio Vegecio runaca shuj libropica: “Huaquin quillacunapica Mediterráneo mama cucha yacupi barcocuna purinaca mana jahuallachu can. Pero 27 de mayomanta 14 de septiembrecamaca allimi can. Cutin 15 de septiembremanta 11 de noviembrecama, shinallataj 11 de marzomanta 26 de mayocamaca rina o mana rina cashcataca mana alli yachai tucunchijchu” nishpami quillcarca. Apóstol Pabloca achca cutincuna barcopi purishcamantami Mediterráneo mama cucha ima shina cashcataca alli yacharca. Barcuyujpish, barcota purichijpish chaitaca allimi yachashca canga. Shinapish apóstol Pablo nishcataca mana uyarcacunachu. Chaimantami barcoca yacupi pambarirca. Pabloca mana pandarircachu (Hechos 27:13-44).