1 Llaquipi ama urmachunmi ayudan
Bibliaca ‘yachachingapaj, ima shina cashcata rimangapaj, cunangapaj, cashcata ruraj cachun yachachingapajpishmi alli’ (2 Timoteo 3:16). ¿Cai shimicunaca ciertochu can? Ari. Gentecuna llaquicunapi ama urmachun Biblia ima shina ayudajta ricushun.
DIMASTIJ TRAGOTA UBYANAMANTA JARCARICHUNMI AYUDAN
Ñaupa articulopi parlashca Diana huarmita yuyarishun. Paica, ‘problemacuna ricurijpica tragota ubyanatami dimastij munaj carcani’ ninmi. Bibliapica tragota ubyanaca juchami can nishpaca mana ninchu. Pero, ‘vinota yalli ubyajcunahuanca pajta tandanacunguiman’ ninmi (Proverbios 23:20). Yallitaj tragota ubyanata yachashcamantaca ñucanchij saludtami dañashun, familia ucupipish achca llaquicunatami charishun. Huaquincunacarin jovencunami huañushcacuna. Pero gentecuna Jehová Diospaj mandashcacunata cazushpaca cashna llaquicunataca mana charinmanchu.
Dianaca: “Tragota ubyanallaca ñuca problemacunataca mana allichircachu. Chaimantami Filipenses 4:6, 7-pi nishcata pajtachircani. Chaipica: ‘Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij’ ninmi. Tutacunapi llaquilla, culira sintirishpami Yaya Diosmanca ñuca ima shina sintiricushcata tucuita huillaj carcani. Cayandijca ama llaquilla puringapajmi achcata esforzarircani. Ñuca huahua huañushcamanta, ñuca cusa shitashpa rishcamanta, cullqui vali causacushcamanta ama llaquilla sintirichunmi Yaya Diosca ayudarca. Pai ayudajpimi cushilla causai callarircani. Chaimanta ama trago ubyana viciopi cutin urmangapajmi ña nunca mana ubyanata decidircani” nircami.
HUAINAYANA JUCHAPI AMA URMACHUNMI AYUDAN
Shujtajcunahuan yangamanta asirishpa parlana, pornografiata ricunaca huainayana juchamanmi apai tucun. Shinapish Bibliapaj mandashcacunata alli pajtachishpaca chai llaquicunapica mana urmashunchu. Samuel shuti jovenca: “Huarmicunahuan asirishpa, pugllarishpa parlanacunaca ñucapajca alhajami ricurirca. Por ejemplo, shuj huarmita mana munashpapish pai ñucata munashcata ricushpami chashna parlanacunata munaj carcani. Alli sintiringapajllami asirishpa pugllarishpa parlaj carcani. Shina ruracujpica ñuca concienciaca mana alli sintirircachu. Chaita rurashpa shujtajcunata llaquichicushcataca cunanmi cuentata cuni” nircami.
Proverbios 20:11-pica: “Huambraraj cashpapish chuya, alli shungu cashcataca pai rurashcapi ricunallami” ninmi. Cai versopi yuyashpa, jw.org paginapi shuj temata leyishpami Samuelca mana allita ruracushcata cuentata curca. Paica huarmicunahuan asirishpa pugllarishpa purishpaca millai shunguta charishcatami ricuchicurca. Chaimantami cambianata decidirca. Paica: “Chashna purijpica ñuca huarmi tucunaca imatashi ñucamanta yuyanga nishpami yuyari callarircani” ninmi. Paipaj yuyaita cambiashcamantami Samuelca huainayana juchapi mana urmarca.
Cunanca Antonio shuti runamanta parlashun. Paipaj huarmita achcata cꞌuyashpapish pornografiatami ricuj carca. Antonio chai viciopi ama urmashpa catingapajca ¿imatataj rurarca? 1 Pedro 5:8-pi nishca yuyaicunatami paica catirca. Chaipica: “Cancunata pꞌiñaj diabloca, león huacaricuj shinami, maijanta millpungapaj muyundijta mashcashpa puricun. Chaimanta yachajcuna caichij, chaparacuichij” ninmi. Antonioca: “Cunan punllacunaca pornografiaca maipipish ricurinllami. Televisionpi Internetpi ricushcataca mana rato cungari tucunchijchu. Diablomi chai trampata churashpa ñucata urmachisha nicurca. Chaimantami chai viciota saquina carcani. Jehová Dios ayudajllapimi ñuca huarmindij alli causani, mapa viciotapish saqui tucushcani” nircami. Antonioca chai viciota saquingapajca achca ayudatami chasquirca. Shinami jatun juchacunapi mana urmarca.
Bibliaca cashna llaquicunata ama charichunmi ayudai tucun. Pero ¿ñucanchij problemacunata mana allichi tucushpaca imatataj rurai tucunchij? Biblia ima shina ayudajta ricushun.
Bibliapaj mandashcacunata pajtachishpaca mana tanto llaquicunata charishunchu.