¿Diospaj shutica maijanshi can?

Pitapish rijsisha nishpaca, “¿ima shutitaj cangui?” nishpachari tapunchij. Diostapish chashna tapujpica, ¿imatashi cutichinman?

“Ñucaca Jehovami cani. Chaimi ñuca shutica” (Isaías 42:8, NM).

¿Jehová shutita uyashcanguichu? Traducij runacunaca Diospaj shutita churanapaj randica “Mandaj Dios” o “Taita Dios” nishpami Bibliapica churashcacuna. Chaimantami achca gentecunaca Diospaj shuti maijan cashcataca mana yachaj chayashcacuna. Pero ñaupa quillcachishcacunapica Diospaj shutica siete mil cutin yallimi ricurin. Chai shutica hebreo quillcachishcacunapica YHWH o JHVH letracunapimi ricurin. Achca huatacunatami castellano rimaipica “Jehová” nishpa traducishcacuna.

Hebreo shimipi quillcachishcacunapi, shujtaj Bibliacunapipish achca cutinmi Diospaj shutica ricurin.

¿DIOSPAJ SHUTICA IMAMANTATAJ IMPORTANTE CAN?

Diospajca importantemi can. Jehová shutitaca Diosllatajmi paipaj agllarca. Jehová Diosca: “Ñuca shutica, huiñaitami chaillataj. Chai shutipimi, ñucataca huiñaita yuyaricunga” nircami (Éxodo 3:15). Bibliapica Diostaca tucui poderyuj, Yaya, Mandaj Dios o Taita Amito nishpami churashcacuna. Pero Bibliapica Jehová Diospaj shutimi Abrahampaj, Moisespaj, Davidpaj o Jesuspaj shuticunatapish yalli ricurin. Ashtahuancarin Jehová Diosca paipaj shutita tucuicuna rijsichunmi munan. Bibliapica: “Cambaj shuti Jehová cashcata gentecuna yachachun. Canllami ashtahuan Jatun Dios cangui” ninmi (Salmo 83:18, NM).

Jesuspajpish importantemi can. Padre nuestro nishca oracionpimi paita catijcunamanca Diosta ima shina mañanata Jesusca yachachirca. Paica: “Cambaj jucha illaj shutitaca, alli nishca cachun” nircami (Mateo 6:9). Diosta mañacushpa Jesusca: ‘Yayitulla, Cambaj shutita sumajyachilla’ nircami (Juan 12:28, NVI). Jesuspajca Diospaj shutita jatunyachinami tucuimanta yalli valishca carca. Chaimantami paica: “Cambaj shutitami paicunaman yachachishcani. Yachachishpa catisharajmi” nirca (Juan 17:26, NM).

Diospaj amigocunapajpish importantemi can. Ñaupa punllacunapi Diosta sirvijcunaca quishpirinapish, miticunapish Diospaj sumaj shutipi cashcatami yacharcacuna. Chaimantami shuj runaca: “Jehovapaj shutica shuj sinchi torre shinami. Allita ruraj paipajman callpajpica quishpichishcami canga” nircami. Cutin shujtaj runaca: “Jehovapaj shutipi mañajcunaca quishpichishcami canga” nircami (Proverbios 18:10, NM; Joel 2:32, NM). Bibliapica Diosta sirvijcunaca paipaj shutita apana cashcatami ricuchin. “Tucui llajtacunamanta gentecuna, paicunapaj quiquin dioscunapaj shutita jatunyachijpipish, ñucanchijca Jehová Diospaj shutitami punllanta, huiñai huiñaicama jatunyachishun” ninmi (Miqueas 4:5, NM; Hechos 15:14, NM).

¿DIOSPAJ SHUTICA IMATATAJ RICUCHIN?

Dios ima shina cashcatami ricuchin. Achca yachaj runacunami: “Diospaj shutica ‘Paica tucui laya tucuna poderta charishcatami’ ricuchin” nishcacuna. Moiseshuan paipaj shutimanta Dios parlacushpa imata nishcata ricushpami paipaj shuti ima nisha nishcataca ñucanchijpish intindinchij. Diosca: “Ñucaca ñucami cani” nircami (Éxodo 3:14). Hebreo shimipi cai versoca: “Ñucaca ñuca ima tucusha nishcami tucusha” ninmi. Diospaj shutica tucui imalla tiyashcacunata ruraj cashcatami ricuchin. Shinallataj Jehová shutica tucui pai nishcacunata pajtachi tucushcatami nisha nin. Pai nishcacuna pajtarichunca pi mana jarcai tucunchu. Mandaj Dios o Taita Dios nishpaca achca poderta, autoridadta charishcatami yachanchij. Pero paipaj shutillami ima laya Dios cashcataca ricuchin.

Ñucanchijmanta preocuparishcatami Diosca ricuchin. Diospaj shutica gentecunatapish, tucui paipaj rurashcacunatapish cꞌuyashcatami ricuchin. Paipaj shutita huillashpaca paita rijsichun munashcatami ricuchin. Manaraj tapujpimi pairaj ima shuti cashcata ñucanchijman huillashca. Ima shinami ricushcanchij, Jehová Diosca paita alli rijsichun, ñucanchijmanta mana carupi cashcata yachachunpishmi munan. Chaimantami paipajmanca cꞌuchuyai pudinchij (Salmo 73:28).

Diospaj shutita utilizashpaca paipaj amigomi tucushun. Caipi yuyai: Pihuanpish amigo tucushpaca, cambaj shutipi parlachun nijpipish ¿cambaj shutita mana nijpica ima shinataj sintiringuiman? Ñuca amigo canata paica mana munanchu nishpachari yuyangui. Jehová Diospish paipaj shuti maijan cashcatami huillashca, paipaj shutita nichunpishmi munan. Paipaj shutita nishpaca paipajman ashtahuan cꞌuchuyasha nishcatami ricuchishun. Bibliapica Yaya Diosca picuna paipaj shutipi yuyacujtaca allimi yachan ninmi (Malaquías 3:16, NM).

Diosta rijsingapajca paipaj shuti maijan cashcatami alli yachana canchij. Pero Diospaj shutita yachashpallaca mana saquirinachu canchij. Ashtahuanpish ima laya Dios cashcatami alli yachana canchij.