“Chashna cachun” nijpica Diosca uyacunmi
JEHOVÁ DIOSCA paita adorajcunataca achcatami cꞌuyan. Paita adorangapaj imallata ruracushcatapish ricucunmi (Malaquías 3:16). Por ejemplo, ¿mashna cutintaj “chashna cachun” nishcanchij? Quizás achca cutinmi nishcanchij. ¿“Chashna cachun” nijpica Diospajca achca valishcachu canga? Ari. Imamanta Diospaj valishca cashcata yachangapajca chai shimi ima nisha nishcata yachashunchij. Bibliapipish imapaj nij cashcata ricushunchij.
‘TUCUICUNA CHASHNA CACHUN NINGUICHIJ’
Quichuapica chashna cachun shimica hebreo rimaipica “pajtachina” o “ confianzata cuna” nisha ninmi. Chai shimitaca ¿imallapitaj nijcuna carca? Ñaupa punllacunapica imata ari nishcata ricuchingapajca “chashna cachun” nijcunami carca. Chashnami imata nicushcaca cierto cashcata ricuchirca. Shinallataj llaquicunata apana cajpica apana cashcatami ricuchirca (Números 5:22). Gentecunapaj ñaupajpi “chashna cachun” nishpacarin ari nishcata pajtachingapajmi achca esfuerzota rurana carca (Nehemías 5:13).
Deuteronomio capítulo 27-pica “chashna cachun” nishca shimimantami parlan. Por ejemplo, israelitacunaca Dios cusha nishca llajtaman yaicushca qꞌuipaca Ebal y Guerizim nishca urcumanmi rircacuna. Chaipimi paicunaca Moisesman cushca leypi imalla mandashcata pajtachishun nircacuna. Shinallataj imalla mandashcata mana pajtachijpi, ima llaquicuna tiyanata huillashca qꞌuipaca “chashna cachun” nircacunami (Deuteronomio 27:15-26). Caipi yuyashun. Achca cꞌaricuna, huarmicuna, huambracuna sinchita “chashna cachun” nijpica ¿ima shinashi uyarishcanga? (Josué 8:30-35). Israelitacunaca chai punllapi imallata pajtachishun nishcataca mana nunca cungarircacunachu. Bibliapica: “Israelcunaca Josué causacui punllacunapica, Mandaj Diosllatami sirvishpa causarcacuna. Shinallataj Mandaj Dios israelcunapaj imallata rurashcata ricuj Josuehuan huiñaillataj caj caishuj yuyajcuna causai punllacunapipish Mandaj Diostami sirvishpa causarcacuna” ninmi (Josué 24:31).
Jesuspish “chashna cachun” nijmi carca. Quichuapica chai shimitaca “chashnatajmi canga” nishpami traducishcacuna (Mateo 5:18). Pero mana Jesusca pi imata nijpi qꞌuipa shuj respuestata cungapajchu chashna nij carca. Ashtahuanpish pai ima nishca cierto cashcata ricuchingapajmi chashna nij carca. Huaquinpicarin Jesusca ishqui cutinmi “chashna cachun, chashna cachun” nij carca (Juan 1:51). Shinami tucui pai nishcacunaca verdad cashcata ricuchirca. ¿Imamantataj chashna ninchij? Paillami Dios nishcacunata pajtachi tucun (2 Corintios 1:20; Apocalipsis 3:14).
“TUCUICUNAMI: ‘CHASHNA CACHUN’ NISHPA, MANDAJ DIOSTA ALABARCACUNA”
Israelitacunaca Diosta alabacushpapish, paita mañanata tucuchicushpapish “chashna cachun” nijcunami carca (Nehemías 8:6; Salmo 41:13). Chashna nishpami paicuna mañacushcata laya ricuchijcuna carca. Chaimi cushicushpa Diosta adorajcuna carca. Rey David causacui punllacunapica israelitacunaca chaitami rurarcacuna. Davidca Jehovapaj arcatami Jerusalén llajtaman aparca. Qꞌuipaca shuj fiestata rurashpami cantashpa Diosta mañarca (1 Crónicas 16:8-36). Mañaipi David nishcacuna shunguman chayajpimi ‘tucui israelitacunaca: “Chashna cachun” nishpa, Mandaj Diosta alabarcacuna’. Chashna tandalla cutichishcamantami cushilla sintirircacuna.
Jesusta punta catijcunaca Diosta alabacushpaca “chashna cachun” nijcunami carca. Bibliata quillcajcunapish paicunapaj cartacunapica chai shimitami churajcuna carca (Romanos 1:25; 16:27; 1 Pedro 4:11). Apocalipsis libropicarin jahua pachapica achcacunaca: ‘¡Chashna cachun! nishpami Mandaj Diosta alabarcacuna’ ninmi (Apocalipsis 19:1, 4). Shinallataj Jesusta catijcunaca tandanacuipi Diosta mañashca qꞌuipaca “chashna cachun” nijcunami carca (1 Corintios 14:16). Pero chai shimitaca mana nina cashcallamantachu nina carcacuna.
¿IMAMANTATAJ “CHASHNA CACHUN” NINA CANCHIJ?
Caicunamanta yachashpami imamanta “chashna cachun” nina cashcata intindinchij. Ñucanchijllataj mañashca qꞌuipa “chashna cachun” nishpaca shungumanta mañacushcatami ricuchinchij. Shinallataj tandanacushcacunapaj ñaupajpi shuj huauqui Diosta mañajpica sinchita o shungullapimi “chashna cachun” ninchij. Shinami paipaj mañashcacunahuan de acuerdo cashcata ricuchinchij. Cunanca imacunallamanta “chashna cachun” nina cashcata yachashunchij.
Shujtajcunapaj mañashcata alli uyashpaca Diosta adoracushcatami ricuchinchij. Diosta mañashca qꞌuipa “chashna cachun” nishpallaca mana saquirinachu canchij. Ashtahuanpish mañacui ratoca mana imatapish ruraricunachu canchij. Chashnami Diosta alli adoracushcata ricuchishun. ¿Manachu shujtajcuna mañashca qꞌuipaca shungumanta “chashna cachun” ninata munanchij? Ari. Pero chaipajca mañacuj ratomi alli uyana, alli comportarina canchij.
Huauqui panicunahuan tandallami canchij. Shuj huauqui tandanacushcacunapaj ñaupajpi Diosta mañajpica tucuicunami imalla mañashcata uyanchij (Hechos 1:14; 12:5). Tucuchicujpi sinchita o shungu ucullapi “chashna cachun” nishpaca ashtahuan tandallami sintirinchij. Jehová Diospish ñucanchij mañashcataca pajtachisha ningami.
“Chashna cachun” nishpaca Jehová Diostami alabacunchij.
Jehová Diostami alabanchij. Diosca paita adorangapaj imallata ruracushcataca ricucunmi (Lucas 21:2, 3). Ñucanchij shungutapish allimi rijsin. Por ejemplo, huaquincunaca telefonopimi tandanacuita uyana can. Chaipipish Diosta mañashca qꞌuipa “chashna cachun” nishpa cutichijpica Diosca uyacunmi. Chashna cutichishpami congregacionpi cajcunahuan tandanacushca shina Diosta alabanchij.
Caicunamanta yachashpami “chashna cachun” ninaca importante cashcata ricushcanchij. Perspicacia libropica cai shimita nijcunamanta parlashpaca, paicunaca “confianzata ricuchishcata, de acuerdo cashcata, ima nishca tucui shunguhuan pajtarichun shuyashcatami ricuchincuna” ninmi. Shinashpaca “chashna cachun” nishpaca Diostami cushichicunchij (Salmo 19:14).