Bibliaca mana llullanchu
Cai tucui huatacunatami chꞌican chꞌican gentecunaca Biblia mana llullaj libro cashcata ricushcacuna. Shinallataj achca gentecunaca Bibliapi yachachishcacunata cazushpami causancuna. Pero huaquincunaca Bibliaca ñaupa librollami can. Yanga parlocunallatami charin nincunami. ¿Canca imatataj yuyangui? ¿Bibliapi tiyaj yuyaicunaca pandachu can?
¿IMAMANTATAJ BIBLIAPI CONFIAI TUCUNGUI?
Caipi yuyashun. Mana nunca llullaj amigotachari charingui. ¿Paipi tucui shunguhuan confianguimanchu? Ari. ¿Biblia yachachishcacunapipish cri tucunchijchu? ¿Bibliaca imapi pandaringachu? Huaquin ejemplocunata ricushun.
Escribijcunaca mana llullarcachu
Bibliata escribijcunaca paicunapaj pandarishcacunatami escribircacuna. Chashnami mana llullajcuna cashcata ricuchircacuna. Por ejemplo, profeta Jonasca pai quillcashca libropica Diosta mana cazushcatami churarca (Jonás 1:1-3). Quillcanata tucuchicushpaca Yaya Dios paita ima shina corregishcatami churarca. Pero chai correccionta chasquishcataca mana churarcachu (Jonás 4:1, 4, 10, 11).
Alli consejocunami tiyan
¿Bibliapi tiyaj consejocunata catishpaca allichu causashun? Ari. Bibliapi tiyaj consejocunaca cunancamami alli causachun ayudan. Por ejemplo, Bibliapica shujtajcunahuan alli apanacungapaj imata rurana cashcatami parlan. Mateo 7:12-pica: “Shujtajcuna cancunapaj allita rurachun nishpaca, cancunapish paicunapaj allita ruraichij” ninmi. Shinallataj Proverbios 15:1-pica: “Sumajta cutichishca shimica, pꞌiñarishcatapish anchuchinmi” ninmi.
Imalla pasashcataca verdadtami huillan
Bibliapica huaquin gentecunamanta, huaquin lugarcunamanta, imalla tucushcamantami parlan. Cai tucui huatacunatami historiamanta estudiajcunaca Bibliapi imalla parlashcacuna ciertotaj cashcata ricushcacuna. Por ejemplo, Nehemías causashca punllacunapica Tiro llajtamanta gentecunaca Jerusalenpimi causajcuna carca. Chai gentecunaca paicunapaj llajtamanta pescadocunata, shujtaj cosascunata apamushpami cꞌatujcuna carca (Nehemías 13:16).
¿Tiromanta gentecuna pescadocunata, shujtaj cosascunata cꞌatujcuna cashcataca ima shinataj yachanchij? Historiata estudiajcunaca Israel llajtapi huaquin cosascunata tarishcamantami Israel llajtahuan, Tiro llajtahuan randishpa, cꞌatushpa causajcuna cashcata yachaj chayarcacuna. Mana chaillatachu tarircacuna. Pescadocunapaj tullucunatapishmi tarircacuna. Negociantecunaca Tiro llajtapi tiyaj mar Mediterraneomantami chai pescadocunata apamushcacuna cashcanga. Chaita ricushpami Bibliamanta estudiaj runaca: “Nehemías 13: 16 nishca shinaca Tiromanta gentecunaca pescadocunatami cꞌatujcuna cashcanga” nirca.
Cienciamanta parlashpaca mana pandarinchu
Bibliaca Yaya Diosmanta, historiamantami yachachin. Shinapish cienciamanta parlashpaca mana pandarinchu. Caita ricushun.
Huaquin gentecunaca cai Allpa yacu jahuapi cashcata o shuj jatun tortugapaj jahuapi cashcatami crircacuna. Pero casi 3.500 huatacuna huashamanmi Bibliaca Job libropi cai Allpaca mana imapi huarcushca cashcata ña huillacurca (Job 26:7). Job librota quillcashca qꞌuipa casi 1.100 huatacuna pasajpipish gentecunaca cai Allpaca ima jahuapimi tiyacunga nishpami crijcuna carca. Shinapish 1687 huatapica Isaac Newton runaca cai Allpa huairapi ima laya muyuj, ima laya cuyurij cashcatami huillarca. Chashnami Bibliapi Allpamanta ima nicushcaca verdad cashcata ricuchirca.
Imalla tucunaca pajtarishcami, pajtaringatajmi
¿Bibliapi imalla huillashcacuna tucui pajtarinatachu crinchij? Babilonia llajta chingarinamanta profeta Isaías ima huillashcata ricushun.
¿Profeta Isaiasca imatataj huillarca? Jesús manaraj huacharijpi casi 732 huatacunapica Babilonia llajtaca shuj jatun llajtapaj capitalca manaraj tucurcachu. Chai huatacunapimi Isaiasca Babilonia llajtaca chingachishcami canga. Chaipica mana pi causangacunachu nishpa huillarca (Isaías 13:17-20). Shinallataj Isaiasca Ciro shuti runami Babiloniata llaquichinga. Chaipajca chai llajtapaj yacucunatami chaquichinga. Chai llajtapaj pungucunapish pascashcami saquiringa nishpami huillarca (Isaías 44:27–45:1).
¿Profeta Isaías huillashcaca ima shinataj pajtarirca? Casi 200 huatacuna qꞌuipami Persia llajtata mandaj Ciroca Babiloniata llaquichirca. ¿Ima shina? Babilonia llajtaca jatun pircacunahuanmi alli rurashca carca. Chai llajtapaj muyundijtapish Éufrates yacumi pasaj carca. Chaimantami Ciroca paipaj soldadocunataca shuj canalta rurashpa Éufrates yacuta shujtaj ladoman pasachichun mandarca. Yacu bajarijpimi soldadocunaca chaita pasashpa Babilonia pungucama chayarcacuna. Chai tutaca Babiloniapi causajcunaca punguta huichcanatami cungarishcacuna carca. Chaimi Ciropaj soldadocunaca chai llajtaman yaicushpa llaquichircacuna.
Isaiasca Babilonia llajtapica ña ni pi mana causangachu, shitashcami saquiringa nircami. ¿Chaica pajtarircachu? Gentecunaca achca huatacunatami chai llajtapi causarcacuna. Pero cunanca ñaupa Babiloniaca rumi montonllami can. Chaitaca Bagdad llajta cꞌuchullapimi tarinchij. Caicunata yachashpami Biblia shamuj punllacunapi ima tucunamanta huillajpipish pajtarinataj cashcata crinchij.