Alli yachachijcuna tucushunchij: Bibliamanta yachacujcunataca alli yachacujcuna tucuchun ayudaichij

Imamantataj caita rurana canchij. Bibliamanta yachacujca shuj pꞌucushca grano shina, espiritualmente sinchi tucungapajca paipaj yuyaipi paipaj shungupi Bibliamanta ña yachashcallahuanca mana saquirinachu can, ashtahuanmi yachashpa catina can (Heb. 5:12–6:1). Bibliamanta alli yachangapajca allpata ucujta allaj shinami yachana can. Mushuj yachacushcataca, paicuna ña yachashcahuan chꞌimbapurashpa imata yachachijtami alli entendina can. Shinallataj yachacushcata paipaj causaipi ima shina pajtachinatapishmi entendina can (Prov. 2:1-6). Bibliamanta yachacujcuna paicunapaj tapurishcacunata yachangapajca, paicunallatajmi mashcanata yachana can. Bibliapi yachacushcata paipaj causaipi tucui shunguhuan pajtachicushpaca, jarcaicuna ricurijpipish Diosta servishpami catinga (Luc. 6:47, 48).

Ima shinataj ayudai tucunchij:

Bibliamanta yachachinaman rishpaca manaraj yachai callarishpa Jehová Dios ayudachun mañana cashcatami yachachina cangui (Juan 14:26; 1 Cor. 2:10).
Bibliamanta yachachi callarishpallatajmi shujtaj yachaipaj alli prepararichun yachachina cangui. Tapuita cutichij yuyaicunata, libropi señalachunmi yachachina cangui, shinallataj cambaj libropi ima shina rurashcatami ricuchina cangui.
Libropi ama rezashpalla cutichichunca shujtaj tapuicunatapish rurai, Bibliata yachacujtaca pai imata yuyashcata cutichichun mañai.
Bibliamanta yachacujta cada punlla Bibliata rezachun yachachi. Internetpi jw.org paginapi Bibliata cada punlla rezangapaj shuj ayuda tiyashcata ricuchi. Bibliata cada punlla rezanataca shungumantami munana can. Chashna rurashpaca cushillami causanga (Sal. 1:2, 3).
Tapuicuna ricurishcata cutichingapajmi BIBLIOTECA EN LÍNEA Watchtower nishcapi ima shina mashcanata Bibliata yachacujman yachachina cangui. Tandanacuicunapi yachacushca librocunata, folletocunata shujtaj letracunahuan rijsishcatapish yachachi. Por ejemplo, Dios Cushca Alli Huillaicuna folletotaca fg letracunahuanmi rijsinchij.

Cai quillapi caita rurashunchij:

Shuj yuyaita yachashpa tucuchijpi o shuj capitulota tucuchijpica yachacujtaca ashalla shimicunapi imata yachacushcata parlachun mañai. Cunanpi Bibliamanta piman mana yachachicushpaca Bibliapi huaquin versocunata rezashpa o La Atalaya revistamanta shuj parrafota rezashpa canllataj ashalla shimicunapi yuyari. Caita ruranaca can rezacushcata ashtahuan alli entendingapajmi ayudanga.