Alli huillajcuna tucushunchij: Yachachingapaj tigrashunchij

¿IMAMANTATAJ CAITA RURANA CANCHIJ? Diosmanta alli huillaicunata uyaj gentecunaca Diosmanta yachanatami mashcancuna (Isa 55:6). Paicunaman alli yachachingapajca cutin cutinmi visitana canchij. Gentecunaca chꞌican chꞌican problemacunatami charincuna. Chaimantami chꞌican chꞌican temacunata yachachina canchij. Yachachinaman tigrangapajca allimi prepararina canchij. Chashnami ashtahuan alli yachachishun. Bibliamanta estudiotapish callarishun.

¿IMA SHINATAJ CAITA RURAI TUCUNCHIJ?

• Utcami tigrana canchij. Achca punllacuna pasachunca mana saquinachu canchij (Mt 13:19).

• Ama pꞌiñarishpa respetohuan parlashunchij.

• Paipaj shutipi saludashpami alhajata parlashpa callari tucunchij. Shinallataj imamanta tigrashcatami huillana canchij. Por ejemplo, “cunanlla llujshishca revistacunamanta, jw.org paginamanta, shuj videomanta o ima shina Bibliata yachana cashcata parlangapajmi shamushcani” ni tucunchijmi. Parlangapaj shuj temata ña agllashca charishpapish gentecuna shujtaj tapuita rurajpica cutichinallami canchij (Flp 2:4).

• Shuj planta huiñachun nishpa yacuta jichaj shinami shuj versota leyi tucunchij o shuj publicacionmanta parlai tucunchij (1Co 3:6). Huasiyujhuan alli apanacungapaj esforzarishunchij.

• Shujtaj punlla yachachinaman tigrangapaj alli parlanacushunchij.