¿Bautizaringapajca ñachu listo cangui?

1. ¿Manaraj huasita shayachishpaca imatataj ricunaraj canchij?

CAIPI yuyashun. Shuj runami huasita shayachinata yuyacun. Paica ima laya huasita shayachinataca ñami yachan. Pero ¿chai ratochu huasita shayachingapajca materialcunata randinaman rin? Mana. Manaraj randinaman rishpami huasita shayachingapaj cullqui pajtana cashcataraj ricuna can. Cullquita charishpallami huasichi tucunga.

2. Lucas 14:28 al 30-pi nishca shinaca ¿manaraj bautizarishpaca imapitaj alli yuyanaraj cangui?

² ¿Jehovata cꞌuyashcamanta, paita agradicishcamantachu bautizarinata yuyacungui? Chashna yuyacushpaca huasita shayachisha nicuj runa shinami cangui. ¿Imamantataj chashna ninchij? Jesús parlashca shimicunapi yuyashun (Lucas 14:28-30-ta liyipai). Jesusca ñucapaj discipulocuna casha nishpaca llaquicunata ahuantangapaj, huaquin ruraicunata saquingapajmi listos cana canguichij nircami (Lucas 9:23-26; 12:51-53). Chaimanta manaraj bautizarishpaca Jesusta catingapaj imallata rurana cashcatami alli yuyanaraj cangui. Chashnami bautizarishca qꞌuipaca Jehová Diostaca tucuipi alli sirvingui.

3. ¿Cai yachaipica imatataj yachashun?

³ ¿Llaquicunata charinata yachashpapish bautizarinaca allichu canga? Ari. Bautizarishpaca cunan punllacunapipish, shamuj punllacunapipish achca bendicioncunatami chasquingui. Cai yachaipimi bautizarinamanta huaquin tapuicunata yachashun. Tapuicunata cutichishca qꞌuipami bautizaringapaj ña allichirishca cashcata, o manaraj allichirishca cashcata ricungui.

DIOSMAN MINGARINAMANTA, BAUTIZARINAMANTA

4. a) ¿Diosman mingarinaca imataj can? b)  Mateo 16:24-pi nishca shinaca ¿ñucanchij munashca shina mana causacushcataca ima shinataj ricuchishun?

⁴ ¿Diosman mingarinaca imataj can? Diosman mingarinaca manaraj bautizarishpa shungumanta Jehová Diosta mañanami can. Paita mañacushpaca “tucui causaipimi canta sirvisha” nishpami cambaj causaitaca paiman mingana cangui. Jehová Diosman mingarishca horasmantaca ña mana can munashca shina causanguichu. Ashtahuanpish paipajllami causangui (Mateo 16:24-ta liyipai; Romanos 14:8). Chai punllamanta huichimanca paita sirvinami ashtahuan importante canga. Diosman mingarishpaca paihuan ari ninacushcatami ricuchingui. Pero Jehová Diosca mingarichunca mana obliganchu. Shinapish can ari nishcata pajtachichunmi munan (Salmo 116:12, 14).

5. ¿Diosman mingarina, bautizarinaca imapitaj chꞌican can?

⁵ ¿Diosman mingarina, bautizarinaca imapitaj chꞌican can? Diosman mingarinaca canlla Jehová Dioshuan parlanami can. Cutin bautizarinaca jatun tandanacuipi tucuicunapaj ñaupajpi cambaj causaita Jehová Diosman mingarishcata ricuchinami can.b Bautizarishpaca tucuicunapaj ñaupajpimi Jehová Diosta tucui shunguhuan, tucui almahuan, tucui yuyaihuan, tucui fuerzahuan cꞌuyashcata ricuchingui. Paillata tucui causaipi sirvisha nishcatapishmi ricuchingui (Marcos 12:30).

6, 7. 1 Pedro 3:18 al 22-pi nishca shinaca ¿imamantataj bautizarina cangui?

⁶ ¿Bautizarinaca minishtirishcachu can? (1 Pedro 3:18-22-ta liyipai). Gentecunaca arcata ricushpami Noé Diospi feta charishcata intindircacuna. Chashnallatajmi shujtajcunaca can bautizarishcata ricushpaca Diosman mingarishcata intindingacuna. Pero, ¿imamantataj bautizarina cangui? Pedroca: “Chai bautismoca cunan punlla quishpirinatami ricuchin” nircami. Canpish bautizarishpami quishpiri tucungui. Chaipajca ruraicunahuanmi Jesuspi crishcata ricuchina cangui. Shinallataj Jesús canmanta huañushcata, pai causarishcata, jahua pachapi paipaj Yayapaj ladopi causacushcatami crina cangui.

⁷ Diosman mingarishpa, bautizarishpaca alli concienciatami charingui. Shinallataj Dioshuanpish allimi apanacungui. Shungumanta arrepintirijpi, Jesús canmanta huañushcata crijpica Diosmi cambaj juchacunata perdonanga. Chashnami Diospaj ñaupajpica alli ricuringui.

8. ¿Imamantataj bautizarina cangui?

⁸ ¿Imamantataj bautizarina cangui? Bibliamanta estudiashpami Jehová Dios ima shina cashcata, imallata ruraj cashcata yachashcangui. Cai yachachishcacuna cambaj shunguman chayajpimi paitaca tucui shunguhuan cꞌuyangui. Jehová Diosta cꞌuyashcamantami bautizarinataca agllana cangui.

9. Mateo 28:19, 20-pi nishca shinaca ¿‘Yayapaj, Churipaj, jucha illaj espiritupaj shutipi’ bautizarinaca imatataj nisha nin?

⁹ Bautizaringapajca Bibliapi yachachishcacunatami tucui shunguhuan crina cangui. Jesús paipaj discipulocunaman imata nishcata yuyari (Mateo 28:19, 20-ta liyipai). Pai nishca shinaca bautizarijcunaca ‘Yayapaj, Churipaj, jucha illaj espiritupaj shutipimi’ bautizarina can nircami. ¿Caica imatataj nisha nin? Jehová Diosmanta, Jesusmanta, espíritu santomanta Bibliapi yachachishcacunatami tucui shunguhuan crina nisha nin. Cai yachachishcacuna cambaj shunguman chayajpimi bautizarinataca munangui (Hebreos 4:12). Cunanca huaquin yachachishcacunata ricushun.

10, 11. ¿Jehová Diosmantaca imatataj yachashcangui?

¹⁰ Jehová Diosmanta imallata yachashcata yuyari. Diospaj shuti Jehová cashcata, pailla “ashtahuan Jatun Dios”, shujlla Dios cashcatami yachashcangui (Salmo 83:18, NWT ; Isaías 37:16). Shinallataj ñucanchijta ruraj cashcata, ‘quishpirinaca Mandaj Diosmanta’ shamuj cashcatami yachashcangui (Salmo 3:8; 36:9). Diosca huiñai causaita cungapaj, juchamanta, huañuimanta canta quishpichingapajmi tucuita rurashca (Juan 17:3). Diosman mingarishpa bautizarishpaca testigo de Jehová tucushcatami tucuicunapaj ñaupajpi ricuchingui (Isaías 43:10-12). Diosta sirvijcunaca muyundij Allpapimi Jehová Diosta adorancuna, paipaj shutitapish huillancuna. Testigo de Jehovacuna cashcamantami cushilla sintirincuna. Canpish bautizarishpaca paicunahuanmi tandanacungui (Salmo 86:12).

¹¹ Jehová Diosmanta Bibliapi yachashpami cushilla sintiringui. Cai yachachishcacunata tucui shunguhuan crishpami Diosman mingarishpa bautizarinata munangui.

12, 13. ¿Jesusmantaca imatataj yachashcangui?

¹² ¿Jesusmanta yachashpaca ima shinataj sintirircangui? Jesusca tucuicunata quishpichingapajmi paipaj causaita curca. Chaimantami paitaca respetana canchij. Jesús huañushcapi crishcataca ruraicunahuanmi ricuchina canchij. Chaita rurajpimi Jehová Diosca ñucanchij juchacunata perdonanga. Ashtahuancarin Jehová Dioshuanmi alli apanacushun, huiñai causaitapishmi charishun (Juan 3:16). Jesusmi ñucanchij Sumo Sacerdote can. Chaimantami paica tucuicuna quishpirichun, Jehová Dioshuanpish alli apanacuchun munan (Hebreos 4:15; 7:24, 25). Jehová Diosca paipaj gobiernopi mandachunmi Jesusta churashca. Paipaj shutitapish ñalla jatunyachichun, millai ruraicunatapish tucuchichunmi agllashca. Shinallataj paimantami paraíso Allpapipish achca bendicioncunata chasquishun (Mateo 6:9, 10; Apocalipsis 11:15). Jesusca Jehová Diospaj munaita pajtachishpami causarca. Ñucanchijpish paipaj ejemplotami catina canchij (Juan 4:34; 1 Pedro 2:21).

¹³ Jesusmanta Bibliapi ima yachashcata tucui shunguhuan crishpami paitaca cꞌuyai callaringui. Jesusta cꞌuyashcamantami pai shina Diospaj munaita pajtachishpa causanata munangui. Chaimantami Diosman mingarishpa bautizarinata agllangui.

14, 15. ¿Espíritu santomantaca imatataj yachashcangui?

¹⁴ ¿Espíritu santomanta yachashpaca imatataj yuyarcangui? Espíritu santoca mana Jehová Dios shina, Jesús shina, angelcuna shina cashcatami yachashcangui. Ashtahuanpish Diospaj fuerza cashcatami intindishcangui. Jehová Diosca huaquin cꞌaricunamanmi Bibliata quillcachunca paipaj espíritu santota curca. Cunan punllacunapish Bibliamanta alli intindingapaj, yachashcacunata causaipi pajtachingapajmi Diosca paipaj espíritu santota cun (Juan 14:26; 2 Pedro 1:21). Jehová Diosca paipaj espíritu santohuanmi ñaupajman catingapajca fuerzata cun (2 Corintios 4:7). Espíritu santoca alli huillaicunata predicangapaj, juchapi ama urmangapaj, ama desanimaringapaj, llaquicunata ahuantangapajmi ayudan. Shinallataj cꞌuyaj, llaquij, humilde cangapajmi ayudan (Gálatas 5:22). Diosca paipi tucui shunguhuan confiashpa paita espíritu santota cuhuai nishpa mañajpica mana mitsashpami cunga (Lucas 11:13).

¹⁵ Jehová Dios paipaj espíritu santohuan paita sirvichun ayudanata yachashpaca cushillami sintiringui. Bibliapi espíritu santomanta yachashcata tucui shunguhuan crishpaca Diosman mingarishpami bautizaringui.

16. ¿Caicamaca imallatataj ricushcanchij?

¹⁶ Diosman mingarina bautizarinaca importantemi can. Ña ricushca shinaca ima llaquicunatapish ahuantangapajmi listo cana cangui. Pero bautizaringapaj tucuita rurashcamantaca achca bendicioncunatami charingui. Bautizarishpami quishpiri tucungui. Shinallataj Diospaj ñaupajpipish allimi ricuringui. Diosta cꞌuyashcamantami bautizarina cangui. Bibliapi Jehová Diosmanta, paipaj Churimanta, espíritu santomanta yachachishcatapish tucui shunguhuanmi crina cangui. Caipi yachachishcacunata ricushca qꞌuipaca ¿imatataj ninguiman? ¿Bautizaringapajca ñachu listo cangui?

¿MANARAJ BAUTIZARISHPACA IMATATAJ RURANA CANGUI?

17. ¿Manaraj bautizarishpaca imallatataj pajtachina cashcangui?

¹⁷ Jehová Dioshuan alli apanacungapajca ñami huaquin ruraicunata pajtachishcangui. Chaimantachari bautizarinapi yuyacungui.c Por ejemplo, Bibliamanta estudianata mana saquishcamantami Jehová Diosmanta, Jesusmanta ashtahuan yachashpa cambaj feta sinchiyachishcangui (Hebreos 11:6). Shinallataj Yayitu Dios cusha nishcacunapimi tucui shunguhuan confiangui. Jesuspi crishcamantami juchamanta, huañuimanta quishpirinata yachangui. Juchacunamantapish arrepintirishpami Yaya Diosta perdonachun mañashcangui. Chaimantami cambaj causaipi cambiashpa cunanca Dios munashca shina causacungui (Hechos 3:19). Diosmanta yachashcacunatapish shujtajcunamanmi huillanata munangui. Chashnallataj publicador cangapajmi tucuita pajtachishpa huauqui panicunahuan huillanaman llujshicungui (Mateo 24:14). Jehová Diosca tucui caicunata pajtachishcamantami cushilla sintirin (Proverbios 27:11).

18. ¿Bautizaringapajca imallatataj ashtahuan rurana cangui?

¹⁸ Manaraj bautizarishpaca ¿imatataj ashtahuan rurana cangui? Ña ricushca shinaca Diosmanmi mingarina cangui. Chaipajca shungumantami “cambaj munaitami tucui ñuca causaipi pajtachisha” nishpa mañana cangui (1 Pedro 4:2). Qꞌuipaca ancianocunata pushaj huauquimanmi bautizarishami nini nishpa huillana cangui. Cai ancianomi huaquin ancianocuna canhuan parlachun mañanga. Pero ama sustarichu. Paicunaca canta rijsishcamantami cꞌuyaihuan ayudangacuna. Paicunami Bibliamanta yachachishcacunata intindicushcata yachangapaj canhuan tandanacungacuna. Shinallataj Diosman mingarina, bautizarina importante cashcatapish intindicushcata ricungapajmi tandanacungacuna. Ña bautizaringapaj listo cajpica jatun tandanacuipi bautizarichunmi huillangacuna.

¿BAUTIZARISHCA QꞌUIPACA IMATATAJ RURANA CANGUI?

19, 20. a) ¿Bautizarishca qꞌuipaca ima shinataj causana cangui? b) ¿Bautizarishpa Dios munashca shina causangapajca imallatataj rurana cangui?

¹⁹ ¿Bautizarishca qꞌuipaca imatataj rurana cangui?d Yuyari. Diosman mingarishpaca paihuanmi ari ninacungui. Chaimantami Jehová Diosca can ari nishcata pajtachichun munan. Chaimi bautizarishca huashapish Dios munashca shina causana cangui. ¿Caita pajtachingapajca imatataj rurana cangui?

²⁰ Bautizarishca qꞌuipaca Diosta sirvijcunami cambaj familia tucun. Chaimantami paicunamantaca manataj caruyana cangui (1 Pedro 2:17). Tandanacuicunaman mana faltashpaca huauqui panicunahuanmi alli apanacungui. Bibliatapish tucui punllacunami liyina cangui, liyishcapipish cutin cutinmi yuyana cangui (Salmo 1:1, 2). Chashnami cai yachashcacunaca cambaj shunguman chayanga. Shinallataj Jesús nishcatami pajtachina cangui. Paica: “Mañaraichij” nircami (Mateo 26:41). Shungumanta Jehová Diosta mañashpaca paipajmanmi ashtahuan cꞌuchuyangui. Ashtahuancarin “Diospaj gobiernotami punta lugarpi churana” cangui (Mateo 6:33, NWT ). ¿Ima shina? Diosmanta huillanataca manataj saquinachu cangui. Chashnami sinchi feta charingui. Shinallataj shujtajcunatami huiñai causaita charichun tal vez ayudangui (1 Timoteo 4:16).

21. ¿Bautizarishpaca ima shinataj causangui?

²¹ Diosman mingarina, bautizarinami cambaj causaipica valishca can. Bautizarishpaca huaquin llaquicunatami chꞌimbapurangui. Pero cunan charishca llaquicunaca ‘tucurijlla llaquicuna’ cashcatami yuyarina cangui (2 Corintios 4:17). Bautizarishpaca cunan punllacunapipish, shamuj punllacunapipish alli causaitami charingui (1 Timoteo 6:19). Chaimanta alli yuyarishpa Jehová Diosta mañai. Chai qꞌuipaca cai tapuita cutichi: “¿Bautizaringapajca ñachu listo cani?”