¿Imamantataj gentecunaca shujtajcunata pꞌiñancuna?

¿Imamantataj mundo enteropi gentecunaca shujtajcunata pꞌiñancuna? Caita yachangapajca shujtajcunata pꞌiñana ima cashcata, imamanta gentecuna shujtajcunata pꞌiñashcata, imamanta pꞌiñaj gentecuna mirarishpa catishcatami intindina canchij.

¿Shujtajcunata pꞌiñanaca imatataj nisha nin?

Maijancunaca shuj grupo genteta o shuj personata mana ricunayachishpami paicunata pꞌiñashcatami ricuchincuna. Chashna pꞌiñajcunaca mana ashalla tiempollatachu chashna pꞌiñashcata ricuchincuna.

¿IMAMANTATAJ HUAQUIN GENTECUNACA SHUJTAJCUNATA PꞌIÑANCUNA?

Huaquin gentecunaca shujtaj grupomanta caj gentecunatami paicuna ima malta mana rurajpipish pꞌiñancuna. Tal vez paicunaca, “chai grupo gentecunaca peligrosos, millaicunami can, paicunaca mana cambiai tucunchu” nishpami yuyancuna. Paicunataca imapaj mana valishca shinatami ricuncuna. Shinallataj imamantapish rato problemata rurajcuna cashcatami yuyancuna. Cutin maijan gentecunaca paicunata ñaupaman pi llaquichishcamanta, dimastij maltratashcamantami cunanca paicunapish shujtajcunata pꞌiñancuna.

¿IMAMANTATAJ PꞌIÑAJ GENTECUNA MIRARISHPA CATIN?

Maijancunaca shujtajcunata mana alli rijsishpami degana pꞌiñancuna. Huaquincunaca paicunapaj amigocuna, familiacuna shujtajcunamanta imata yuyashcata ricushpami paicunapish chashnallataj yuyai callarincuna. Por ejemplo, shuj runa shuj grupo gentecunata pꞌiñai callarijpica chai runapaj familiacunapish, amigocunapishmi chai grupo gentecunata pꞌiñai callarincuna.

Gentecuna imamanta shujtajcunata pꞌiñajta yachashpami mundo enteropi imamanta pꞌiñaj gentecuna mirarishcata intindinchij. Bibliapimi imamanta achca gentecuna shujtajcunata pꞌiñashcata yachachin. Cunanca shujtajcunata pꞌiñana ima shina callarishcatami ricushun.

BIBLIAPICA SHUJTAJCUNATA PꞌIÑANA IMA SHINA CALLARISHCATAMI YACHACHIN

Imamanta shujtajcunata pꞌiñajcuna tiyashcata ricuchingapaj dibujo. Chaipimi muyucuj ishqui flechacuna ricurin. 1. Amigocunamanta, redes socialescunapi, noticiacunapipish panda informaciontami uyancuna. 2. Shujtajcunapaj culturata, razata, religiontapish mana yachancunachu. 3. Shujtajcuna causaita cambiachun, charishcacunata quichuchun, qꞌuipaman imapish tucunatami manchancuna. 4. Pꞌiñajcunaca shujtajcunata ñahuita ricushpallami juzgan, yanganchincuna, llaquichincunapish.

MANA RUNACUNACHU SHUJTAJCUNATA PꞌIÑAI CALLARIRCACUNA. Shuj ángel Diospaj contra tucushpami pꞌiñaj cashcata ricuchirca. Tiempohuanca chai millai angeltaca Satanás Diablo nishpami rijsircacuna. Diabloca callarimantapachami huañuchij tucurca. Paica llullata callarichij, llullapaj yaya cashcamantami gentecunataca shujtajcunata llaquichichun, shujtajcunata pꞌiñachun pandachishca (Juan 8:44; 1 Juan 3:11, 12). Bibliapica Diabloca millai, pꞌiñaj, shujtajcunata llaquichij cashcatami nin (Job 2:7; Apocalipsis 12:9, 12, 17).

JUCHAYUJ CASHCAMANTAMI SHUJTAJCUNATA PꞌIÑAI TUCUNCHIJ. Punta cꞌari Adán, Satanás shina juchapi urmashcamantami gentecunaca juchayujcuna huacharinchij (Romanos 5:12). Adanpaj punta churi Cainca paipaj huauqui Abelta pꞌiñashcamantami huañuchirca (1 Juan 3:12). Achcacunaca shujtajcunata cꞌuyashcata, llaquishcatami ricuchincuna. Pero juchayujcuna cashcamantami achca gentecunaca paicunallapi yuyashpa shujtajcunata envidiancuna, jatun tucuncuna. Chaimantami shujtajcunata pꞌiñai callarishcacuna (2 Timoteo 3:1-5).

PAICUNA SHINA MANA CASHCAMANTAMI PꞌIÑAI CALLARINCUNA. Cai tiempopica maijan gentecunaca shujtajcunata llaquichishpa, mana allita tratashpami causancuna. Chashnami shujtajcunata pꞌiñai callarishcacuna. Allpata Diablo mandacushcamantami achcacunaca shujtajcunata yangamanta llaquichincuna, mana ricunayachincuna, cꞌamincunapish (1 Juan 5:19).

Bibliapica shujtajcunata pꞌiñana yuyaicuna ima shina tucurina cashcatami yachachin.