YACHAI 28
Diospaj Gobiernoca ñami mandacun
“Ñucanchij Diospaj, Cristopaj Gobiernomi gentecunataca mandacun” (APOCALIPSIS 11:15).
CANTO 22 Jesús cai Allpata mandachunmi mañanchij
CAITAMI YACHASHUNa
1. ¿Tranquilos, alli causanataca imamantataj seguros canchij?
CAI mundopi causanaca sinchimi can. Achca familiacunapica cꞌuyaica ña mana tiyanchu. Cai mundopi cajcunaca shujtajcunata llaquichishpa, pꞌiñashpami causancuna. Achcacunacarin autoridadta charijcunapica ña mana confiancunachu. Cashna laya gentecunata ricushcamantami tucuri punllacunapaj profeciacuna pajtaricushcata yachanchij (2 Timoteo 3:1-5). Alli shunguta charij gentecunaca cai profeciacuna pajtaricushcataca allimi intindincuna. Cai profeciacuna pajtaricushcata ricushpami Diospaj Gobiernopi Jesús mandacushcata intindinchij. Chaimantami shamuj punllacunapi tranquilo, alli causanata seguros canchij. Cunanca Diospaj Gobiernomanta ashtahuan profeciacunatami ricushpa catishun. Cai profeciacunaca cai último punllacunapimi pajtaricushca. Cai profeciacuna pajtarijta ricushpami ñucanchij feca ashtahuan sinchiyaringa.
Shuj rompecabezaspaj dibujo ima cashcata intindingapajca allimi piezacunata tandachina canchij, chai shinallatajmi ima tiempopi causacushcata yachangapajca Daniel y Apocalipsispi tiyaj profeciacunata alli intindina canchij. (Párrafo 2-ta ricui).
2. ¿Cai yachaipica imacunallamantataj yachashun? (Página unopi tiyaj dibujomanta parlapai).
2 ¿Cai yachaipica imallatataj yachashun? Cai yachaipica Yayitu Diospaj Gobierno ima hora mandai callarishcata, cai Gobiernopi Jesús ña mandacushcata, shinallataj Diospaj contracuna ima shina chingarina cashcata intindingapajmi huaquin profeciacunata yachashun. Shuj rompecabezaspaj dibujo ima cashcata intindingapajca allimi piezacunata tandachina canchij. Chai shinallatajmi ima tiempopi causacushcata yachangapajca profeciacunata alli intindina canchij.
¿DIOSPAJ GOBIERNOCA IMA HORATAJ MANDAI CALLARIRCA?
3. Daniel 7:13, 14-pi ricushca shinaca ¿Diospaj Gobiernopi Mandajmantaca imatataj yachachin?
3 Daniel 7:13, 14-pica Jesusca Diospaj Gobiernopi huiñaipaj mandana cashcata, tucui ladomanta gentecuna paita sirvina cashcatami huillan. ¿Jesusca ima horataj Diospaj Gobiernopica mandai callarirca? Daniel libropi nishca shinaca siete huatacuna o siete tiempocuna tucurijpimi Jesusca mandai callarina carca. Cunanca cai profecía ima shina pajtarishcata ricushun.
4. ¿Daniel 4:10 al 17-pi ricushca shinaca Jesusca ima horataj mandai callarirca? (Notatapish ricui).
4 (Daniel 4:10-17-ta liyipai). Chai siete tiempocuna o siete huatacunaca 2.520 huatacunatami ricuchin. Cai tiempoca Jesús manaraj huacharijpi 607 huatapimi callarirca. Cai huatapimi Babiloniocunaca Jerusalenpi Jehová Dios churashca tucuri reyta anchuchircacuna. Cai 2.520 huatacunaca 1914 huatapimi tucurirca. Chai huatapimi Jehová Diosca Jesustaca paipaj Gobiernopi mandachun churarcab (Ezequiel 21:25-27).
5. ¿Cai siete tiempocunamanta parlaj profeciamantaca imatataj yachai tucunchij?
5 ¿Cai profeciamantaca imatataj yachai tucunchij? Cai siete tiempocunamanta parlaj profeciata intindishpaca, Jehová Dios pai nishcacunata pai agllashca horaspi pajtachij cashcatami yachanchij. Jehová Diosca pai agllashca tiempopimi paipaj Gobiernotaca callarichirca. Shamuj punllacunapipish Jehová Diosca pai ña agllashca tiempopimi tucui profeciacunata pajtachinga. Chaimantami Jehová Diospaj punllapish mana qꞌuipayanata yachanchij (Habacuc 2:3).
¿JESÚS MANDACUSHCATACA IMA SHINATAJ YACHANCHIJ?
6. a) ¿Jesús jahua cielopi ña mandacushcataca ima shinataj yachanchij? b) Apocalipsis 6:2 al 8-pi nishca shinaca ¿ima señalcunataj tiyana carca?
6 Jesusca jahua cielopi pai mandacushcata yachachunmi paipaj apostolcunamanca huaquin señalcuna tiyana cashcata nirca. Por ejemplo, Jesusca guerracuna, yaricaicuna, terremotocuna tiyana cashcatami nirca. Shinallataj muyundij Allpapi COVID-19 millai ungüi laya tiyana cashcatami nirca (Mateo 24:3, 7; Lucas 21:7, 10, 11). Jesusca jahua pachaman tigrashca 60 huatacuna qꞌuipapishmi apóstol Juanmanca cai señalcunamanta parlarca. Cai señalcunaca 1914 huatapimi pajtari callarirca (Apocalipsis 6:2-8-ta liyipai). Chaita ricushpami chai huatapi Jesús mandai callarishcata cuentata cunchij.
7. ¿Jesús mandai callarishca qꞌuipaca imamantataj cai Allpapica ashtahuan llaquicuna tiyarca?
7 Jesús jahua pachapi mandai callarijpica cai Allpapica ashtahuan llaquicunami tiyai callarirca. Apocalipsis 6:2-pi nishca shinaca Jesús Rey tucushpaca Diablohuan, demoniocunahuanmi macanacurca. Apocalipsis 12-pi nishca shinaca Jesusca paicunata mishashcamantami Diablotapish, demoniocunatapish cai Allpaman shitarca. Chaimi Diabloca achcata pꞌiñarishpa gentecunata llaquichi callarirca (Apocalipsis 12:7-12).
Llaquicuna tiyashcamantaca mana cushilla sintirinchijchu. Pero cai llaquicunaca Diospaj Gobierno ña mandacushcatami ricuchin. Chaimantami cushilla sintirinchij. (Párrafo 8-ta ricui).
8. ¿Diospaj Gobiernomanta profeciacuna pajtaricujta ricushpaca imatataj yachai pudinchij?
8 ¿Cai profeciamantaca imatataj yachacunchij? Mundo enteropi ima tucucushcata ricushpa, gentecunapish mana alli cosascunata ruracushcata ricushpami Diospaj Gobiernopi Jesús ña mandacushcata intindinchij. Bibliapi tiyaj profeciacuna pajtaricushcatapishmi seguros canchij (Salmo 37:1). Ashtahuancarin Armagedón macanacui chayangacamami llaquicunaca mirarishpa catinga. Pero caita yachashpaca mana dimastij preocuparinachu canchij (Marcos 13:8; 2 Timoteo 3:13). Jehová Diosca ñucanchijta cꞌuyashcamantami imamanta llaquicuna tiyashcata yachachin. Chashna yachachishcamantami paitaca shungumanta agradicina canchij.
¿DIOSCA PAIPAJ CONTRACUNATACA IMA SHINATAJ TUCUCHINGA?
9. a) ¿Daniel 2:28, 31 al 35-pi nishca shinaca tucuri mandajca ima shinataj can?, b) ¿Cai gobiernocunaca ima horataj mandai callarirca?
9 Daniel 2:28, 31-35-ta liyipai. Rey Nabucodonosorca Jesús mandai callarijpi cai Allpapi ima tucuna cashcatami muscurca. Paica shuj jatun estatuatami ricurca. Chai estatuapaj chaquicunaca fierrohuan, barrohuanmi rurashca carca. Chai chaquicunaca achca poderta charij tucuri mandajtami ricuchin. ¿Chai mandajca pitaj can? Reino Unido y Estados Unidos gobiernocunami can. Cai gobiernocunaca Primera Guerra Mundialmantami apoyarinacushpa mandai callarircacuna. Rey Nabucodonosorpaj muscuimanta ashtahuan yachashun.
10. a) Reino Unido y Estados Unidos gobiernocunaca fierrohuan, barrohuan chagrushca shinami can. ¿Chaica imatataj ricuchin? b) ¿Imacunamantataj cuidarina canchij? (“Politicapi ama chagruringapaj cuidarishunchij” nishca recuadrota ricui).
10 Rey Nabucodonosor ricushca estatuapaj chaquicunaca orohuan, cullquihuan mana rurashcachu carca. Ashtahuanpish fierrohuan, barrohuan chagrushcami carca. Chai barroca gentecunami can. ¿Caica imatataj ricuchin? (Daniel 2:43). Fierroca barrohuan chagrushca cashpaca mana sinchi canchu. Chai shinallatajmi Estados Unidos y Reino Unido gobiernocunaca gentecuna jarcashcamanta paicuna munashca shinaca mana mandai tucushcacuna. Gentecunaca votacioncunapi, parocunapi, huelgacunapimi jarcashcacuna.
11. ¿Armagedón ñalla chayanataca imamantataj crinchij?
11 Nabucodonosor ricushca estatuapaj chaquicunaca achca poderta charij tucuri gobiernomi can. Chai qꞌuipaca achca poderta charij shujtaj gobiernoca cai Allpapica ña mana ricuringachu. Cai poderyuj gobiernoca Estados Unidos y Reino Unidomi can. Paicuna mandacujpimi Armagedón macanacuica callaringa. Chai macanacuipimi Diospaj Gobiernoca chai gobiernotapish, shujtaj gobiernocunatapish tucuchinga (Apocalipsis 16:13, 14, 16; 19:19, 20).c
12. a) ¿Tucuri punllacunapi causacushcataca ima shinataj yachanchij? b) ¿Imamantataj contentos sintirinchij?
12 ¿Cai profeciamantaca imatataj yachai tucunchij? Cai profeciamanta yachashpami tucuri punllacunapi causacushcata intindinchij. 2.500 huatacuna huashamanca profeta Danielca “Babiloniapaj gobierno tucurishca huashaca chuscu poderyuj gobiernocunami ricuringa” nircami. Chai gobiernocunaca Diospaj pueblotami mandana carca. Shinallataj Danielca “Reino Unido y Estados Unidos gobiernomi tucuri mandaj canga” nircami. Pero Diospaj Gobierno, cai Allpapi tiyaj tucui gobiernocunata ñalla tucuchigrishcata yachashpami contentos sintirinchij (Daniel 2:44).
13. a) ¿Pusaj mandajpish, chunga mandajcunapish picunataj can? b) ¿Cai profeciaca ima shinataj pajtarishca?
13 Apocalipsis 17:9-12-ta liyipai. Primera Guerra Mundial tiyashcamantami mundo enteropica achca llaqui tiyarca. Shinami Apocalipsispi parlashca shujtaj profecía pajtari callarirca. Chai tiempopica mandajcunaca muyundij Allpapi llaquicuna ama tiyachun nishpami enero de 1920-pica Sociedad de Naciones nishca organizacionta callarichirca. Octubre de 1945-pica Organización de las Naciones Unidas nishpami shutichirca. Bibliapi nishca shinaca cai organizacionca shuj octavo reymi can. Pero cai organizaciontaca autoridadta charichunmi cai Allpapi tiyaj gobiernocunaca apoyacuncuna. Bibliapica cai tucui gobiernocunataca chunga mandajcuna nishpami shutichin.
14, 15. a) ¿Apocalipsis 17:3 al 5-pica Babilonia Jatun llajtamantaca imatataj yachachin? b) ¿Achca gentecunaca imatataj ruracuncuna?
14 Apocalipsis 17:3-5-ta liyipai. Jehová Diosca apóstol Juanmanca shuj muscuitami muscuchirca. Chai muscuipica apóstol Juanca shuj huainayaj huarmitami ricurca. Chai huarmica “Babilonia Jatun llajta” shutimi carca. Cai huarmica tucui panda religioncunatami ricuchin. Cai panda religioncunaca achca huatacunatami gobiernocunata apoyashcacuna. Pero ñallami Jehová Diosca gobiernocunamanca tucui panda religioncunata tucuchina yuyaita cunga. Chaimi gobiernocunaca tucui panda religioncunata tucuchinga (Apocalipsis 17:1, 2, 16, 17).
15 ¿Babilonia jatun llajta nishca panda religioncuna ñalla tucurinataca ima shinataj yachanchij? Ñaupa tiempopica Babilonia llajtata ama llaquichichunca chai llajta muyundijtami achca yacu pasaj carca. Apocalipsis libropica achca gentecunaca chai yacu shinami panda religioncunata apoyancuna, difindincunapish. Pero ‘cai yacucunaca chaquirinami can’ ninmi (Apocalipsis 17:15; 16:12). Chaica achca gentecuna panda religioncunata saquinatami ricuchin. Chaimantami cunan tiempopica achcacunaca panda religioncunata saquishpa, shujtaj ladocunapi ayudata mashcacuncuna.
16. ¿Naciones Unidas tiyashcata ricushpa, achca gentecuna religioncunata saquicushcata ricushpaca imatataj intindinchij?
16 ¿Cai profeciacunamantaca imatataj yachai tucunchij? Organización de las Naciones Unidas tiyashcata ricushpa, achca gentecuna panda religioncunata saquicushcata ricushpami tucuri punllacunapi causacushcata intindinchij. Achca gentecuna panda religioncunata saquishcamantaca chai religioncunaca mana tucuringachu. Ashtahuanpish Organización de las Naciones Unidaspish, gobiernocunapish chai tucui panda religioncunatami tucuchinga. Panda religioncuna ñapish tucurishcamantami gentecunaca mancharingacuna, achca llaquicunapishchari tiyanga (Apocalipsis 18:8-10).d Pero Diosta sirvijcunaca panda religioncuna tucurishcamanta, ñalla alli causai tiyanata yachashcamantami dimastij cushilla sintirishun (Lucas 21:28).
JEHOVÁ DIOS CANTA CUIDANAPI CONFIAI
17, 18. a) ¿Ñucanchij feta sinchiyachingapajca imatataj rurana canchij? b) ¿Catij yachaipica imatataj yachashun?
17 Profeta Danielca: “Ima jatun yachaipish ashtahuanmi miranga” nircami. Chaimantami cai tiempopica profeciacunataca alli intindinchij (Daniel 12:4, 9, 10). Cai profeciacuna ima shina pajtaricujta ricushpaca Jehová Diospi, Bibliapimi ashtahuan confianchij (Isaías 46:10; 55:11). Chaimantami ñucanchij feta sinchiyachishpa catina canchij. Chaipajca cada punllami Bibliata alli estudiana canchij, shujtajcunapish Diospajman cꞌuchuyachunmi ayudana canchij. Jehová Diospi tucui shunguhuan confiajpica paica ñucanchijtami cuidanga. Shungupipish tranquilo sintirichunmi ayudanga (Isaías 26:3).
18 Catij yachaipica Mandaj Jesús cunan punllacunapi Diospaj pueblota pushacushcatami yachashun. Caimanta parlaj profeciacuna ima shina pajtaricujta ricushpaca tucuri punllacunapi causacushcatami intindishun.
CANTO 61 ¡Testigocuna, ñaupajman catishunchij!
a Diospaj Gobierno mandacushca horaspimi causacunchij. Chaica shuj bendicionmi can. Cai yachaipica Diospaj Gobiernomanta parlaj profeciacunamantami yachashun. Caita yachanami ñucanchij feta sinchiyachichun, tranquilo sintirichun, cunanpish, shamuj punllacunapipish Jehová Diospi confiachun ayudanga.
b Cushilla causai nishca libropi yachai 32, punto 4-ta ricui. JW.ORG paginapi Diospaj Gobiernoca 1914-pimi mandai callarirca nishca videotapish ricui.
c Caimanta ashtahuan yachangapajca 15 de junio de 2012-pi llujshishca La Atalaya revistapica, páginas 14 al 19-ta ricui.
d Ñalla ima tucunamanta ashtahuan yachangapajca El Reino de Dios ya está gobernando nishca libropi, capítulo 21-ta ricui.