‘Caishuj chaishuj sinchiyarinacushpa catichij’

1. 1 Tesalonicenses 5:11-pi nishca shinaca ¿imata ruranataj ashtahuan importante can?

TAL VEZ canca shuj Tandanacuna Huasita shayachishpa o allichishpachari ayudarcangui. Chai Tandanacuna Huasita tucuchishpa, chaipi punta cutin tandanacuita charishpaca cushillami sintirircangui. Chaipica Jehová Dioshuan agradecido cashcamanta, dimastij cushilla cashcamantami cantanallatapish tal vez mana cantai tucurcangui. Cai Tandanacuna Huasicunaca Yayitu Diostami jatunyachin. Shinapish apóstol Pablo nishca shinaca chai Tandanacuna Huasi ucupi caishujmanta chaishujmanta sinchiyarinami ashtahuan importante can (1 Tesalonicenses 5:11-ta liyipai).

2. ¿Cai yachaipica imallatataj ricushun?

² Ñucanchijpish apóstol Pablo shinami ñucanchij huauqui panicunataca sinchiyachina canchij. Por ejemplo, apóstol Pabloca paicuna ima shina sintirishcatami alli intindij carca. Cai yachaipica apóstol Pablo huauqui panicuna llaquihuan cajpi ima shina paicunata ayudashcatami yachashun. Shinallataj apóstol Pablo caishujmanta chaishujmanta alli apanacuchun, Jehová Diospipish sinchi feta charichun yachachishcatami ricushun (1 Corintios 11:1).

APÓSTOL PABLOCA LLAQUIHUAN CAJ HUAUQUI PANICUNATAMI SINCHIYACHIRCA

3. ¿Apóstol Pabloca trabajana cashpapish imatataj punta lugarpi churarca?

³ Apóstol Pabloca achca llaquicunatami charirca. Chaimantami huauqui panicunata alli intindishpa paicunamanca cꞌuyaita ricuchirca. Por ejemplo, shuj punllaca apóstol Pabloca cullqui illajmi saquirirca (Hechos 20:34). Chaimantami paipajpish, paipaj compañerocunapajpish trabajana carca. Apóstol Pabloca carpa huasicunata rurashpami trabajaj carca. Chaimi Corinto llajtaman chayashpaca Aquilahuan, Priscilahuan carpacunata rurashpa trabajai callarirca. Chashna sinchita trabajashpapish tucui sabadocunami judiocunaman, griegocunaman sinagogapi yachachij carca. Pero Silaspish, Timoteopish chayashpaca Pabloca Diospaj Shimitami ashtahuan huillai callarirca (Hechos 18:2-5). Caipi ricushca shinaca Pablopajca Diosta sirvinami tucuimanta yalli importante carca. Chaimantami Pabloca huauqui panicunatapish Diosta sirvinata punta lugarpi churachun consejarca. Familiata mantinina cashpapish trabajollapi ama pasachunmi animarca (Filipenses 1:10).

4. ¿Contracuna llaquichijpica Pablopish, Timoteopish ima shinataj huauqui panicunataca sinchiyachircacuna?

⁴ Tesalonicapi congregación tiyai callarishca huashallami huaquin millai gentecunaca huauqui panicunata llaquichi callarircacuna. Shuj cutinca chai gentecunaca Pablotapish, Silastapish mana japishcamantami huaquin huauquicunataca “sirij sirijta aisashpa chai llajtata mandajcunapajman pusharcacuna”. Chai contracunaca: ‘Tucui cai runacunaca César mandashcata mana cazuncunachu’ nishpami huauquicunata juchachircacuna (Hechos 17:6, 7). Chashna llaquichisha nijpica chai mushuj huauqui panicunaca achcata mancharishpami desanimari callarishcangacuna. Pero Pabloca paicuna desanimarichunca mana munarcachu. Chaimantami Pablopish, Silaspish shujtaj ladoman rina cashpapish shujtajcuna chai huauqui panicunata animachun saquircacuna. Qꞌuipaca apóstol Pabloca Tesalonicapi caj huauqui panicunataca: ‘Ñucanchij huauqui Timoteotami cancunapajman cachanchij. Paitami cancunata animachun, cushichichun, cancunapaj feta sinchiyachichun cachanchij’ nircami (1 Tesalonicenses 3:2, 3). Timoteo Listra llajtapi causacujpica paitapishmi contracunaca llaquichishcanga. Pero Timoteoca apóstol Pablo huauqui panicunata ima shina sinchiyachishcatami ricurca. Chaimantami Timoteopish Tesalonicapi caj huauqui panicunataca sinchiyachi tucurca (Hechos 14:8, 19-22; Hebreos 12:2).

5. ¿Bryan shuti huauquitaca shuj ancianoca ima shinataj ayudarca?

⁵ ¿Apóstol Pabloca huauqui panicunata ayudangapajca imatataj ashtahuan rurarca? Paipish, Bernabepish Listra, Iconio y Antioquía llajtacunaman tigrashpaca congregacioncunapica ancianocunatami nombrarcacuna (Hechos 14:21-23). Chai ancianocunaca cunan punllacunapi tiyaj ancianocuna shinallatajmi huauqui panicunataca achcata sinchiyachircacuna. Bryan shuti huauquica: “Ñuca 15 huatacunata charijpica ñuca yayaca huasimantami rirca. Ñuca mamatapishmi congregacionmanta llujchircacuna. Chaimi ñucaca dimastij llaquilla sintirircani” ninmi. ¿Bryantaca shuj ancianoca ima shinataj ayudarca? Bryanca: “Tony shuti shuj ancianoca ñucahuanca siempremi parlaj carca. Paica shujtaj huauqui panicuna llaquicunata ima shina ahuantashcata, ima shina cushilla catishcatami parlarca. Salmo 27:10-tapishmi liyij carca. Ezequiaspaj ejemplomantapishmi parlaj carca. Ezequiaspaj yayaca Diosta mana sirvircachu. Shinapish Ezequiasca Diosta tucui shunguhuan sirvishpa catishcatami nirca. Chashna ñucata ayudashcamantami qꞌuipaca tiempo completopi Yayitu Diosta sirvi callarircani. Chaimi achca bendicioncunata chasquishcani” ninmi. Ancianocuna, cancunapish Bryan shina llaquilla caj huauqui panicunata ayudangapajmi listos cana canguichij (Proverbios 12:25).

6. ¿Apóstol Pabloca huauqui panicunata animangapajca picunamantataj parlarca?

⁶ Apóstol Pabloca huauqui panicunata animangapajca Diosta sirvijcuna Diospaj ayudahuan sinchi llaquicunata ahuantashcatami parlarca (Hebreos 12:1). Paicunamanta parlajpica huauqui panicunaca achcatami animarircacuna. Shinallataj Diosta sirvina yuyaillami catircacuna (Hebreos 12:22). Ñucanchijpish ñaupa tiempopi tiyaj Diosta sirvijcunamanta yachashpaca achcatami animarishun. Por ejemplo, Jehová Dios Gedeonta, Baracta, Davidta, Samuelta, shujtajcunata ima shina ayudashcata ricushpami achcata animarinchij (Hebreos 11:32-35). Cunan tiempopipish Jehová Dios huauqui panicunata ima shina ayudashcata yachashpaca achca animotami japinchij. Tauca huauqui panicunaca cai animachij experienciacunata publicacioncunapi liyishcamantami, Cuerpo Gobernanteta pagui nishpa cartacunata quillcashcacuna.

PABLOCA HUAUQUI PANICUNAHUAN ALLI APANACUNATAMI YACHACHIRCA

7. ¿Romanos 14:19-21-pi Pablo consejashcamantaca imatataj yachanchij?

⁷ Huauqui panicunata sinchiyachingapajca paicunahuan alli apanacungapajmi esforzarina canchij. Maipica huauqui panicunaca Biblia nishcacunata cazushpapish ñucanchijcuna shinaca mana tucuita rurangacunachu. Paicuna chꞌican laya yuyajpipish o chꞌican laya rurajpipish paicunahuanca mana pꞌiñarinachu canchij. Ñaupa tiempopi Roma congregacionpi sirvij huauqui panicunahuan ima tucushcatami yuyarishun. Chai tiempopica huauqui panicunaca Moisesman cushca leytaca ña mana cazunachu carca. Chaimantami tucui laya micunacunataca micui tucurcacuna (Marcos 7:19). Huaquin judiocunaca chashna tucui micunacunataca micujcunallami carca. Pero shujtaj judiocunaca Moisesman cushca leyta valichishpa catishcamantami huaquin micunacunataca mana ricunayachircacuna. Chaimi apóstol Pabloca huauqui panicuna ama chꞌicanyarichunca: “Aichata micushcamanta, vinota ubyashcamanta, ima shujtaj ruraita rurashcamantapish cambaj huauqui pandarina cajpica chaicunata mana ruranami ashtahuan alli can” nishpa consejarca (Romanos 14:19-21-ta liyipai). Apóstol Pabloca chashna consejashpaca huauqui panicuna ama pꞌiñarinacushpalla alli apanacuchunmi ayudarca. Apóstol Pablopish shujtajcunata ama pandachingapajmi esforzarirca (1 Corintios 9:19-22). Ñucanchij huauqui panicunapish ñucanchij shina mana yuyajpi, mana rurajpipish apóstol Pablo shinallatajmi paicunahuan alli apanacungapaj esforzarina canchij.

8. ¿Apóstol Pabloca huaquin huauquicunahuan mana de acuerdo cashpaca imatataj rurarca?

⁸ ¿Importante ruraicunapi huauqui panicunahuan mana de acuerdo cashpaca imatataj rurana canchij? Apóstol Pablopaj ejemplotami catina canchij. Chai tiempopica huaquin huauquicunaca gentecunapaj ñaupajpi alli ricurinallatami munarcacuna. Chaimantami bautizarishca mana judío huauquicunataca circunsicionta rurachun obligasha nircacuna (Gálatas 6:12). Apóstol Pabloca paicunahuanca mana de acuerdochu carca. Mana de acuerdo cashpapish pai imata yuyashcallataca mana nircachu. Ashtahuanpish Jerusalenpi tiyaj apostolcuna, ancianocunapish decidichunmi saquirca (Hechos 15:1, 2). Chaita rurashpaca apóstol Pabloca huauqui panicuna tandalla, cushilla cachunmi ayudarca (Hechos 15:30, 31).

9. ¿Pablopaj ejemplota catingapajca imatataj rurana canchij?

⁹ ¿Huauqui panicunahuan mana de acuerdo cashpaca imatataj rurana canchij? Dios churashca pushajcunapaj ayudacunatami mashcana canchij. Shinallataj Diospaj organización cushca publicacioncunata, instruccioncunatapishmi ricuna canchij. Chai instruccioncunata catishpaca ñucanchij yuyaicunallataca ña mana catishunchu. Ashtahuanpish congregacionpi tucuicuna tandalla cachunmi ayudashun.

10. ¿Pabloca congregacionpi tucuicuna alli apanacuchunca ima shinataj ayudarca?

¹⁰ Apóstol Pabloca huauqui panicunahuan alli apanacungapajca paicunapaj pandarishcacunallataca mana ricurcachu. Ashtahuanpish huauqui panicunapaj alli ruraicunatami valorarca. Por ejemplo, apóstol Pabloca Romapi causaj huauqui panicunamanmi shuj cartata quillcarca. Chai cartapaj tucuri partepica huaquin huauqui panicunataca paicunapaj alli cualidadcunamantami felicitarca. ¿Ñucanchijpish Pablopaj ejemplotaca ima shinataj catina canchij? Ñucanchij huauqui panicunapaj alli cualidadcunamantaca shujtajcunamanpishmi parlana canchij. Chashnami caishujmanta chaishujmanta alli apanacushun.

11. ¿Huauqui panicunahuan pꞌiñanacushpaca imatataj rurana canchij?

¹¹ Sinchi feta charij huauqui panicunapish maipica mana de acuerdo cashcamantami pꞌiñanacuncuna. Por ejemplo, Pablopish, Bernabepish allimi apanacujcuna carca. Shinapish paicunahuan predicachun Marcosta invitana cashcata o mana invitana cashcataca mana de acuerdochu carcacuna. Chaimi paicunaca achcata pꞌiñarinacushpa cada quien paicunapaj ladota rircacuna (Hechos 15:37-39). Pero qꞌuipaca Pablopish, Bernabepish, Marcospish cutin alli apanacungapajmi esforzarircacuna. Chashnami congregacionpi huauqui panicunahuan alli apanacuna ashtahuan importante cashcata ricuchircacuna. Qꞌuipacarin Pabloca Bernabemanta, Marcosmantapishmi alli parlarca (1 Corintios 9:6; Colosenses 4:10). Ñucanchijpish huauqui panicunahuan pꞌiñanacushpapish paicunahuan alli tucungapajmi esforzarina canchij. Paicunapaj alli cualidadcunatapishmi ricuna canchij. Chaita rurashpaca congregacionpica tucuicunami tandalla cashun (Efesios 4:3).

PABLOCA HUAUQUI PANICUNAPAJ FETAMI SINCHIYACHIRCA

12. ¿Huaquin huauqui panicunaca ima jarcaicunahuantaj chꞌimbapuracuncuna?

¹² Huauqui panicuna Jehová Diospi sinchi feta charichunmi ayudana canchij. Maijan huauqui panicuna Yayitu Diosta sirvicushcamantami paicunapaj familiacunapish, compañerocunapish burlarincuna. Shujtaj huauqui panicunaca ancha ungushca cashcamanta, o maijan huauqui o pani paicunata llaquichishcamantami dimastij llaquilla sintirincuna. Shujtajcunacarin Paraíso Allpa manaraj chayashcamantami llaquilla sintirincuna. Cashna laya jarcaicunahuan chꞌimbapuranaca mana facilchu can. Apóstol Pablo causashca tiempopi huauqui panicunapish cashna laya llaquicunatami charircacuna. ¿Apóstol Pabloca paicunataca ima shinataj sinchiyachirca?

13. ¿Huauqui panicunamanta burlarijpica apóstol Pabloca ima shinataj ayudarca?

¹³ Apóstol Pabloca Bibliahuanmi huauqui panicunapaj feta sinchiyachirca. Por ejemplo, chai tiempopica huaquin huauqui panicunataca paicunapaj familiacunaca: “Judiocunaca Diospaj pueblomi canchij. Jesusta catijcunaca mana imata yachancunachu” nishpami burlarijcuna carca. Chaimi huauqui panicunaca imata cutichinataca mana yacharcacuna. Pero apóstol Pabloca shuj cartata quillcashpami paicunata animarca (Hebreos 1:5, 6; 2:2, 3; 9:24, 25). Chai huauqui panicunaca apóstol Pablo yachachishcacunata utilizashpami ima shina cutichinata yacharcacuna. Chashnami Jesusta catijcuna verdadta charishcata ricuchircacuna. ¿Ñucanchijpish huauqui panicunata Biblia yachachishcacunata difindichunca ima shinataj ayudai tucunchij? Ñucanchij publicacioncunata alli utilizanatami yachachi tucunchij. Por ejemplo, congregacionpi caj huaquin jovencitocunaca Dios tucuita ruraj cashcata ima shina intindichinataca mana yachancunachu. Pero ñucanchijca ¿Es la vida obra de un Creador?, El origen de la vida. Cinco cuestiones dignas de análisis nishca folletocunahuanmi chaita alli intindichichun ayudai tucunchij.

14. ¿Pabloca shujtajcunaman yachachishpa ocupado cashpapish ima shinataj shujtajcunata ayudarca?

¹⁴ Pabloca shujtajcunata ayudashpa cꞌuyaita ricuchichunmi animarca (Hebreos 10:24). Pablopish shujtajcunamanca alli ejemplotami curca. Por ejemplo, Judeapi caj huauqui panicuna micunata mana charijpica Pablomi shujtaj huauqui panicuna cushca ayudata aparca (Hechos 11:27-30). Shinallataj Pabloca shujtajcunaman yachachishpa ocupado cashpapish pobre huauqui panicunata ayudangapajmi listo carca (Gálatas 2:10). Chashna ayudajpica huauqui panicunaca Jehová Dios paicunata cuidacushcatami cuentata curcacuna. Cunan punllacunapish ñucanchij tiempohuan, ñucanchij fuerzahuan, ñucanchij yachashcacunahuanmi huauqui panicunataca ayudai tucunchij. Shinallataj labores de socorropi ayudanaman rishpa, obra mundialman cullquita cushpaca shujtaj huauqui panicunatapishmi ayudai tucunchij. Huauqui panicunata chashna ayudajpica paicunaca Jehová Dios siempre cuidanapimi confiangacuna.

15, 16. ¿Chiriyashca huauqui panicunataca ima shinataj sinchiyachina canchij?

¹⁵ Apóstol Pabloca sinchi feta mana charij huauqui panicunatami animashpa catirca. Paicunataca alaja shimicunahuanmi animarca (Hebreos 6:9; 10:39). Por ejemplo, Pabloca shuj cartapica chai huauqui panicunataca “cancunami caita o chaita mejorana canguichij” ninapaj randica, “ñucanchijcunami caita o chaita rurana canchij” nishpami cꞌuyaihuan consejarca. Chashnami Pabloca paillataj chai consejashcata pajtachina cashcata ricuchirca (Hebreos 2:1, 3). Cunan punllacunapipish maijan huauqui panicunapaj feca chiriyashcami. Pero ñucanchijpish apóstol Pablo shinami paicunata sinchiyachishpa, cꞌuyaita ricuchishpa catina canchij. Chai huauqui panicunataca cꞌuyaihuan, alaja shimicunahuanmi parlana canchij. Chashnami paicunapaj shunguman chayashun.

¹⁶ Apóstol Pabloca chiriyashca huauqui panicunataca Jehová ‘Diosca cancunapaj ruraicunataca manataj cungaringachu’ nishpami animarca (Hebreos 10:32-34). Ñucanchijpish Pablo shinami chiriyashca huauqui panicunata animana canchij. Por ejemplo, shuj chiriyashca huauquitaca: “¿Canca Bibliamantaca ima shinataj yachai callarircangui?” nishpami tapuna canchij. Mana cashpaca Jehová Dios paita ima shina ayudashcata yuyarichunmi ayudana canchij. Shinallataj Jehová Dios paita mana nunca saquinata, paipaj ruraicunata manataj cungarishcatami yuyachina canchij (Hebreos 6:10; 13:6). Ñucanchij huauqui panicunahuan chashna parlajpica paicunaca Jehová Diosta sirvishpa catinatami decidingacuna.

CAISHUJ CHAISHUJ ANIMANACUSHPA CATICHIJ

17. ¿Huauqui panicunata sinchiyachingapajca imallatataj rurana canchij?

¹⁷ Shuj albañilca tiempohuanca ashtahuan alli huasichinatami yachan. Chashnallatajmi ñucanchijpish tiempohuanca ñucanchij huauqui panicunataca ashtahuan sinchiyachinata yachana canchij. Por ejemplo, llaquicunahuan caj huauqui panicunataca Diosta sirvijcunapaj ejemplocunamanta parlashpami sinchiyachina canchij. Shinallataj ñucanchij huauqui panicunapaj alli ruraicunamanta shujtajcunaman parlashpa, tucuicunahuan alli apanacungapaj esforzarishpaca congregacionpi tucuicuna tandalla cachunmi ayudashun. Ñucanchij huauqui panicuna Biblia yachachishcacunata difindichunpishmi yachachina canchij. Paicuna imapi ayudachun minishtijpipish ayudanallami canchij. Chiriyashca huauqui panicunatapish sinchiyachishpami catina canchij.

18. 1 Tesalonicenses 5:11-pi nishca shinaca ¿imatataj rurashpa catisha ningui?

¹⁸ Tandacuna Huasicunata shayachij huauqui panicunaca cushillami sintirincuna. Ñucanchijpish huauqui panicunata espiritualmente sinchiyachishpaca cushillami sintirishun. Alli shayachishca huasipish tiempohuanca dañarinllami. Pero sinchiyachishca huauqui panicunaca huiñaipajmi causai tucuncuna. Chaimanta 1 Tesalonicenses 5:11-pi ima nishcata pajtachishpa catishun. Chaipica: “Caishuj chaishuj animanacushpa, sinchiyarinacushpa catichij” ninmi.