Para siempremi causai tucunchij

1. ¿Jehová Dios ñucanchijman huiñai causaita cunata yachashpaca ima shinataj sintirinchij?

JEHOVÁ DIOSCA paita cazujcunamanca huiñai causaitami cusha nin (Romanos 6:23). Caita yachashcamantami Yayitu Diostaca ashtahuan ashtahuan cꞌuyai callarinchij. Paica paimanta ama caruyachun, ashtahuanpish huiñai causaita charichunmi cai sumaj regalota cushca.

2. ¿Huiñai causaita charinata yachashpaca imacunallatataj ahuantai tucushun?

² Jehová Dios ñucanchijman huiñai causaita cusha nishcata yachashcamantami ima llaquicunatapish ahuantai tucushun. Cai millai mundopi causacushcamantaca ñucanchij contracunaca ñucanchijtami huañuchisha ninga. Pero Jehová Diosca paita tucui shunguhuan sirvishcamantami ñucanchijtaca causachinga (Juan 5:28, 29; 1 Corintios 15:55-58; Hebreos 2:15). ¿Jehová Dios ñucanchijman huiñai causaita cunataca imamantataj seguros canchij? Caimanta yachashpa catishun.

JEHOVÁ DIOSCA HUIÑAIMANTA HUIÑAICAMA CAUSAJMI

3. ¿Jehová Dios ñucanchijman huiñai causaita cui tucushcataca imamantataj seguros canchij?

³ Jehová Diosca causaita cuj cashcamanta, huiñaita causaj cashcamantami ñucanchijmanpish huiñai causaita cui tucushcata crinchij (Salmo 36:9). Bibliapica Jehová Diosca huiñaimanta huiñaicama causaj cashcatami yachachin. Por ejemplo, Salmo 90:2-pica: ‘Huiñaimanta huiñaicama ña tiyaj Diosmi cangui’ ninmi. Salmo 102-pipish chai yuyaillatatajmi yachachin (Salmo 102:12, 24, 27-ta liyipai). Profeta Habacucpish: “Jehová Dioslla, canca huiñaimantami causangui. Aij, ñuca jucha illaj Dioslla, canca mana nunca huañunguichu” nircami (Habacuc 1:12, La Biblia. Traducción del Nuevo Mundo, NWT).

4. ¿Jehová Dios huiñaimanta huiñaicama tiyashcata intindina sinchi cajpipish imamantataj mana preocuparina canchij?

⁴ ¿Jehová Dios huiñai causaita charishcata intindinaca cambajca sinchichu can? (Isaías 40:28). Achcacunapajmi caicunata crinaca sinchi can. Elihuca: ‘Dios causashca huatacunatapish manamari yupai tucunchijchu’ nircami (Job 36:26). Pero imacunata mana intindishcallamantaca mana ninachu canchij “chaicunaca mana tiyanchu”. Por ejemplo, luz ima shina achijyachijtaca manachari tucuita yachanchij, pero chaita mana intindishpapish luz mana tiyashcataca mana ni tucunchijchu. Chai shinallatajmi Jehová Dios huiñaita causaj cashcata mana intindishpapish Dios mana tiyashcataca mana crinalla canchij (Romanos 11:33-36). Ashtahuanpish Jehová Diosca huiñaipaj causaj Diosmi can. Jehová Diosca cai pachapish, intipish, estrellacunapish manaraj tiyajpimi ña tiyarca. Bibliapica: ‘Paica cai pachatapish, cai pachapi tucui imalla tiyashcatapish ruraj Diosmi. Paica jahua pachatapishmi rurarca’ ninmi (Jeremías 51:15; Hechos 17:24). Cunanca ñucanchijpish huiñai causaita charinata cringapajca shujtaj yuyaita ricushun.

HUIÑAITA CAUSANGAPAJMI RURASHCA CANCHIJ

5. ¿Adanpish, Evapish ima esperanzatataj charircacuna?

⁵ Jehová Dios rurashca tucui animalitocuna, tucui plantacuna, tucui yuracunapishmi tiempohuanca huañuna carca. Pero gentecunaca mana huañunachu carca. Jehová Diosca gentecunataca huiñaita causachunmi rurashca carca. Shinapish Jehová Diosca Adantaca: “Huerta chaupipi tiyaj yuraca allita, mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami (Génesis 2:17). Adanpish, Evapish Jehová Diosta cazushca cashpaca mana huañuimancunachu carca. Ashtahuanpish Jehová Diosca causaita cuj yuramanta micuchunmi tiempohuanca saquinman carca. Chashnami paicunaca para siempre causaiman carcacunab (Génesis 3:22).

6, 7. a) ¿Jehová Dios ñucanchijcuna huañuchun mana munashcataca ima layataj yachanchij? b) ¿Can huiñai causaita charishpaca imatataj rurasha ningui? (Fotocunamanta parlapai).

⁶ Huaquin cientificocunaca ñucanchij cerebroca dimastij achca informacionta huaquichi tucushcatami nincuna. Por ejemplo, 2010 huatapica cienciamanta parlaj shuj revistapica: ‘Ñucanchij cerebroca 3 millón horascunapi cushca videocunatami tucuita huaquichi tucun. Chai videocunataca 300 yalli huatacunapimi ricui tucunchijman’ nircami. Pero ñucanchij cerebroca tal vez chaitapish yalli ashtahuan informaciontami huaquichi tucun. Caipi ricuchishca shinaca Jehová Diosca ñucanchij cerebrotaca 70 u 80 huatacunapi yachashca informaciontapish yalli huaquichichunmi rurashca (Salmo 90:10).

⁷ Ashtahuanpish Jehová Diosca mana huañuna munaihuanmi ñucanchijta rurashca. Bibliapica ‘Jehová Diosca para siempre causana munaitaca gentecunapaj shungupimi churashca’ ninmi (Eclesiastés 3:11, NWT). Chai munaita charishcamantami huañuica ñucanchijpajca shuj enemigo laya can (1 Corintios 15:26). Cai ejemplocunapi yuyashun. Ancha ungüita charishpaca mana huañunata munashpami doctorpajman rinchij, jambicunatapish ubyanchij. Shinallataj huañuica mayorllacunatapish, jovencunatapish ratomi japi tucun. Chaimi shuj cꞌuyashca familia o amigo huañujpica achca huatacunata llaquilla sintirinchij (Juan 11:32, 33). Pero Jehová Diosca ñucanchijta cꞌuyashcamantami huiñai causaita ñucanchijman cunga. Chaimantami Jehová Diosca alli cerebrohuan, mana huañuna munaihuanpish ñucanchijta rurashca. Cunanca ñucanchijcuna huiñai causaita chasquichunca Jehová Dios imata rurashcata, imata ruracushcatapishmi yachashun.

DIOSPAJ MUNAICA MANA CAMBIASHCACHU

8. Isaías 55:11-pi nishca shinaca ¿Diospaj munai mana cambiashcataca ima shinataj yachanchij?

⁸ Adán y Eva juchapi urmashcamantami tucuicuna huañunchij (Isaías 55:11-ta liyipai). Chashna tucujpipish Jehová Diosca paipaj munaitaca mana cambiashcachu. Paica alli gentecuna huiñai causaita charichunmi munan. ¿Chaitaca ima shinataj yachanchij? Jehová Dios ima nishcata, imata rurashcata ricushpami chaita yachanchij.

9. ¿Jehová Diosca imatataj rurasha nishca?

⁹ Jehová Diosca huañushca gentecunatami causachisha nin y paicunamanca huiñai causaitapishmi cusha nin (Hechos 24:15; Tito 1:1, 2). Jobca Jehová Dios huañushca gentecunata causachina munaita charishcatami seguro carca (Job 14:14, 15). Profeta Danielpish huañushca gentecuna causarinata, huiñai causaita charigrishcatapishmi yacharca (Salmo 37:29; Daniel 12:2, 13-ta liyipai). Jesús causashca tiempopi tiyaj judiocunapish Jehová Dios paita sirvijcunaman huiñai causaita cui tucushcatapishmi crircacuna (Lucas 10:25; 18:18). Jesucristopish achca cutincunami causarinamanta parlarca. Jesús huañujpicarin Jehová Diosca paitami causachirca (Mateo 19:29; 22:31, 32; Lucas 18:30; Juan 11:25).

10. ¿Ñaupa tiempopi Jehová Dios huaquincunata causachishcata yachashpaca imatataj intindinchij? (Fotomanta parlapai).

¹⁰ Jehová Diosca causaita cuj cashcamantami huañushcacunata causachi tucun. Por ejemplo, Jehová Diosca profeta Eliasmanca Sarepta llajtamanta shuj huarmipaj churita causachichunmi poderta curca (1 Reyes 17:21-23). Profeta Eliseopish Diospaj poderta chasquishpami Sunem llajtamanta shuj huarmipaj churita causachirca (2 Reyes 4:18-20, 34-37). Caicunamanta Bibliapi yachashpaca Jehová Dios huañushcacunata causachi tucushcatami cuentata cunchij. Jesucristo cai Allpapi cai horasca Jehová Diosca huañushcacunata causachichunmi paimanca poderta curca (Juan 11:23-25, 43, 44). Cunanca Jesusca jahua pachapimi can. Jehová Diosca paimanca cai pachapipish, jahua pachapipish tucui autoridadtami cushca. Chai autoridadta chasquishcamantami Jesusca pambana jutcucunapi cajcunataca causachinga. Paicunaca huiñaita causana oportunidadtami charingacuna (Mateo 28:18; Juan 5:25-29).

11. ¿Jesús ñucanchijmanta huañushcamantaca imamantataj huiñaita causai tucunchij?

¹¹ ¿Jehová Diosca paipaj cꞌuyashca Churi llaquinaita huañuchunca imamantataj saquirca? Jesucristollatajmi cai tapuitaca cutichirca. Paica: “Diosca cai pachapi causajcunata yallitaj cꞌuyashpami paipaj shujlla Churita curca. Maijanpish paipi feta charijca ama chingarichun, ashtahuanpish huiñai causaita charichunmi curca” nircami (Juan 3:16). Jehová Dios paipaj Churita ñucanchijmanta huañuchun cushcamantami ñucanchijcunaca huiñaita causai tucunchij (Mateo 20:28). Apóstol Pablopish: “Ima shinami huañuica shuj runallamanta callarirca, chashnallatajmi huañushcacunapish shuj runallamanta causaringacuna. Adanmantaca tucui gentecunami huañurca. Shinallataj Cristomantaca tucuicunami causachishca cangacuna” nircami (1 Corintios 15:21, 22).

12. ¿Diospaj Gobiernopi mandajcunaca ima shinataj Diospaj munaita cai Allpapi pajtachingacuna?

¹² Jesucristoca paipaj discipulocunamanca Diospaj Gobierno shamuchun, cai Allpapipish Diospaj munaita pajtachichun nishpa Jehová Diosta mañachunmi yachachirca (Mateo 6:9, 10). Jehová Diosca gentecuna cai Allpapi huiñaipaj causachunmi munan. Chaimantami Jehová Diosca Jesucristota Rey cachun nombrarca. Paihuan mandachunpish 144.000 gentecunatapishmi agllacushca. Paicunaca Diospaj munaitami cai Allpapi pajtachingacuna (Apocalipsis 5:9, 10).

13. a) ¿Jehová Diosca ñucanchijcuna huiñai causaita charichunca imatataj ruracun? b) ¿Paraíso Allpapi causangapajca imatataj rurana canchij?

¹³ Cunan punllacunapica Jehová Diosca “pi mana yupai tucuipaj achca gentecunatami” tandachicun. Paicunamanca Paraíso Allpapi causachunca paipaj Gobiernota cazuna cashcatami yachachicun (Apocalipsis 7:9, 10; Santiago 2:8). Cai mundopica gentecunaca pꞌiñanacushpa, macanacushpami causancuna. Pero Diospaj pueblopi tandachishcacunaca shujtajcunahuan pꞌiñanacunatami saquishcacuna (Miqueas 4:3). Paicunaca guerracunapi macanacunapaj randica tucui gentecunamanmi Diosmanta yachachishpa, Diospaj munaimanta yachachishpa ayudacuncuna (1 Timoteo 6:19). Dios tandachishca puebloca Diospaj Gobiernota apoyacushcamantami maipica cullqui illaj saquirincuna o paicunapaj familiacunaca jarcaicunatami churancuna. Pero Jehová Diosca paicunamanca tucui minishtishcacunata cushpami ayudacun (Mateo 6:25, 30-33; Lucas 18:29, 30). Caicunata ricushpaca Diospaj Gobierno jahua pachapi ña mandacushcatami cuentata cunchij. Ñalla cai Allpatapish mandagrishcatami intindinchij.

SUMAJ CAUSAITAMI CHARISHUN

14, 15. ¿Huañuita tucuchingapajca Jehová Diosca imatataj ruranga?

¹⁴ Jesusca jahua pachapimi ña mandacun. Paica Dios cusha nishcacunatami tucuita pajtachinga (2 Corintios 1:20). Jesucristoca 1914 huatamantami Diospaj contracunata mishacushca (Salmo 110:1, 2). Ñallami Jesuspish, 144.000 ungidocunapish cai Allpapi tiyaj tucui millai gentecunata tucuchinga (Apocalipsis 6:2).

¹⁵ Jesusca cai Allpapi 1.000 huatacunata mandacushpami achca huañushca gentecunata causachinga. Shinallataj Jesusca cazuj gentecunatami jucha illaj cachun ayudanga. Tucui gentecunami shuj tucuri pruebata charingacuna. Pero cazuj gentecunallami Paraíso Allpapi huiñaipaj causai tucungacuna (Salmo 37:10, 11, 29). Chai tiempopica tucui pꞌiñajcunamantaca huañuimi ultimopica tucuchishca canga. Chaica dimastij sumajmi canga (1 Corintios 15:26).

16. ¿Imamantataj Jehová Diosta sirvishpa catina canchij?

¹⁶ Ñucanchijca mana yangallamantachu esperanzata charinchij. Ashtahuanpish Jehová Dios yachachishcacunata Bibliapi ricushpami chai esperanzata charinchij. Cai esperanzata charishcamantami cai sinchi tucuri punllacunapi tucui llaquicunata ahuantai tucunchij. Pero ñucanchij causaita quishpichingaraicullaca mana tucuita ahuantanchijchu. Ashtahuanpish Jehová Diosta, Jesusta cꞌuyashcamantami tucui llaquicunata ahuantacunchij (2 Corintios 5:14, 15). Shinallataj Diospaj ejemplota catishpami tucuicunaman cushicuihuan huillacunchij (Romanos 10:13-15). Shujtajcunamanta ashtahuan preocuparijpi, paicunata tucuipi ayudangapaj esforzarijpica Jehová Diosca huiñaipaj ñucanchij amigo canatami munanga (Hebreos 13:16).

17. ¿Huiñai causaita charingapajca imatataj cada uno rurana canchij?

¹⁷ ¿Ñucanchijcunaca huiñaipaj causai tucushunchu? Jehová Diosca tucuicunamanmi chai oportunidadta cushca. Pero huiñai causaita chasquingapajca causaiman pushaj ñanpimi purishpa catina canchij (Mateo 7:13, 14-ta liyipai). ¿Huiñai causaita charishpaca ñucanchij causaica ima shinashi canga? Chaitaca catij yachaipimi yachashun.