Llaqui horaspi ayudangapaj listos cashunchij

1. ¿Paita sirvijcunapaj mañashcacunata cutichingapajca Jehová Diosca picunatataj utilizan?

JEHOVÁ DIOSCA pushaj ancianocunata, siervo ministerialcunata, precursorcunata, jovencunata, mayorllacunata, cꞌaricunata, huarmicunatapishmi paita sirvijcunata animangapaj utilizan. Cantapishmi paita sirvijcunapaj mañashcacunata cutichingapaj utilizai tucun (Colosenses 4:11). Chaimantami Jehová Diosta sirvina, huauqui panicunatapish ayudanaca ñucanchijpaj valishca can. Pero ¿millai ungüicuna ricurijpi, llaqui atraso japijpi o contracuna llaquichijpica ima shinataj ñucanchij huauqui panicunata ayudai tucunchij?

¿MILLAI UNGÜICUNA MIRARIJPICA IMA SHINATAJ AYUDAI TUCUNCHIJ?

2. ¿Pandemia tiyai horasca imamantataj huauqui panicunata ayudanaca sinchi ricurin?

² Shuj pandemia tiyai horasca huauqui panicunata ayudanaca sinchichari canga. Por ejemplo, paicunata visitanata munashpapish o paicunahuan imata micunata munashpapish pandemia tiyashcamantaca chaita ruranataca manachari pudishun. Mana cashpaca paicunata ayudasha nishpapish ñucanchij propio familiachari achca llaquicunata charicun. Chashna sinchi cajpipish Jehová Diosca huauqui panicunata tucui pudishcahuan ayudashpa catichunmi munan (Proverbios 3:27; 19:17). ¿Chaita pajtachingapajca imatataj rurana canchij?

3. ¿Pani Desita ayudaj ancianocunamantaca imatataj yachai tucunchij?

³ ¿Ancianocunaca ima shinataj ayudai tucuncuna? Can anciano cashpaca congregacionpi caj huauqui panicunatami alli rijsina cangui (Jeremías 23:4-ta liyipai). Pasaj yachaipi parlashca pani Desica: “Ancianocunaca ñucahuanpish, shujtajcunahuanpish predicanaman llujshingapajmi esforzarircacuna. Ñucanchijhuan pasangapajpishmi tiempota llujchircacuna” ninmi.b Ancianocunaca chaita rurashcamantami pani Desitaca COVID-19 ungüimanta paipaj familiacuna huañui horasca ayudangapaj listos carcacuna.

4. a) ¿Llaqui manaraj tiyajpi Desita ayudangapajca ancianocunaca imatataj rurarcacuna? b) ¿Paicunamantaca imatataj yachai tucunchij?

⁴ Pani Desica: “Ancianocunaca ñuca alli amigocunami carca. Chaimantami ñuca ima shina sintirishcata, imamanta sustarishcataca tucuita paicunaman parlajlla carcani” ninmi. ¿Ancianocunaca caimantaca imatataj yachana cancuna? Paicunaca llaqui manaraj tiyajpimi huauqui panicunata alli rijsingapaj, paicunapaj alli amigos cangapaj esforzarina cancuna. Shuj millai ungüi tiyashcamanta huauqui panicunata mana visitai tucushpapish, paicunahuan parlashpa catingapajmi tucui pudishcata rurana cancuna. Pani Desica: “Maipica chai punllallapitajmi achca ancianocunaca ñucata cayarcacuna, mensajecunatapishmi cacharcacuna. Paicuna liyishca versocunataca allimi yacharcani. Shinapish chai versocunahuanmi achcata animarcacuna” ninmi.

5. ¿Ancianocunaca huauqui panicuna imata minishtishcata yachangapajca imatataj rurana can?

⁵ Ancianocunaca huauqui panicuna imata minishtishcata yachangapajmi huaquin tapuicunata rurana cancuna. Pero huauqui panicunata ama pingachingapajmi cuidadota charina can (Proverbios 20:5). Por ejemplo, “¿huauqui panicunaca micungapajpish, jambicunata randingapajpish cullquitachu charincuna? ¿Huasi illaj, trabajo illajchu saquirishcacuna? ¿Gobiernopaj ayudata chasquingapaj ñucanchij ayudatachu minishtincuna?” nishpami tapurina cancunaca. Pani Desitaca huaquin huauqui panicunaca imallata cushpami ayudarcacuna. Pero ancianocunacarin paitaca tranquila sintirichun, sinchi feta charichunpishmi ayudarcacuna. Pani Desica: “Ancianocunaca ñucahuanmi Diosta mañajcuna carca. Paicuna imata mañashcataca mana yuyarinichu. Pero paicuna mañajpica tranquilami sintirircani. Jehová Diospish mana solollachu cangui nicucuj layami sintirircani” ninmi (Isaías 41:10, 13).

6. ¿Congregacionpica ima shinataj caishuj chaishuj ayudanacui tucunchij?

⁶ ¿Huauqui panicunapish ima shinataj ayudai tucuncuna? Ancianocunaca huauqui panicunatami ayudana cancuna. Shinapish Jehová Diosca tucuicuna ayudanacuchunmi munan (Gálatas 6:10). Uchilla cosascunata rurashpami shujtajcunata animai tucunchij. Por ejemplo, huahuacunaca shuj dibujitota rurashpami ungushca huauqui o paniman cui tucuncuna. Jovencunapish huauqui panicunata ayudangapajmi shuj mandadota rurai tucuncuna. Cutin shujtajcunaca ungushca huauqui panicunapajmi micunata apai tucuncuna. Shuj millai ungüi mirarijpica congregacionpica tucuicunami animota minishtinchij. Chaimantami Tandanacuna Huasipi cashpapish o internetpi conectarishca cashpapish huauqui panicunahuan parlanacungapaj esforzarina canchij. Ancianocunapishmi animota minishtincuna. Paicunaca shuj pandemia tiyai horasca huauqui panicunata ayudashpami ocupados cancuna. Chaimantami paicunata agradicingapaj shuj tarjetitata rurai tucunchij. Tucuicunami 1 Tesalonicenses 5:11-pi ima nishcata pajtachina canchij. Chaipica: “Chaimanta ña ruracushca shinallataj caishuj chaishuj animanacushpa, sinchiyarinacushpa catichij” ninmi.

¿LLAQUI ATRASO JAPIJPICA IMA SHINATAJ AYUDAI TUCUNCHIJ?

7. ¿Ima llaquicunataj rato japi tucunlla?

⁷ Ima llaqui atraso japijpica cosascuna illaj, huasi illajchari saquirishun o shuj familiachari huañunga. Achca huauqui panicunaca cashna laya llaquicunatami charishcacuna. ¿Paicunataca ima shinataj ayudai tucunchij?

8. ¿Manaraj shuj llaqui tiyajpica ancianocunapish, yaya mamacunapish imatataj rurana cancuna?

⁸ ¿Ancianocunaca ima shinataj ayudai tucuncuna? Ancianocunaca huauqui panicunataca llaquicunapaj allichirichunmi ayudana cancuna. Huauqui panicunaca llaqui horaspi quishpiringapaj, ancianocunahuan parlangapajpish imata rurana cashcatami yachana cancuna. Pasaj yachaipi parlashca pani Margaritaca: “Shuj tandanacuipica ancianocunaca: ‘Manchanai ninami japirishpa catinga. Chaimantami autoridadcuna miticushpa richun nijpica cazunalla canchij’ nishpami advirtircacuna” nircami. Cai advirtishcacunaca allimi carca. Cinco semanacuna huashallami manchanai nina jatarirca. Chaica dimastij llaquimi carca. Yaya mamacunapish, cancunapaj familiahuan Diosmanta yachashpaca llaqui atraso japi horas imata rurana cashcatami alli yuyarina canguichij. Cancunapish, cancunapaj huahuacunapish chashna prepararishpaca llaqui atraso tiyai horasca tranquilosmi canguichij.

9. ¿Llaqui manaraj tiyajpi, shuj llaqui qꞌuipapish ancianocunaca ima shinataj huauqui panicunata ayudana cancuna?

⁹ Can superintendente de grupo cashpaca cambaj grupopi tiyaj huauquicunapaj número de telefonocunata, paicuna maipi causanatapishmi alli anotashcata charina cangui. Manaraj shuj llaqui tiyajpimi chaitaca pajtachina cangui. Chashnami llaqui atraso japi horasca huauqui panicunahuan rato parlai tucungui, paicunata ima shina ayudanatapishmi yachai tucungui. Huauqui panicuna ima shina cashcata, paicuna imata minishtishcatapishmi coordinador del cuerpo de ancianosman huillana cangui. Paimi superintendente de circuito huauquimanpish huillanga. Ancianocunaca huauqui panicunata ayudangapajca shuj shinallami trabajana can. Pani Margarita causan ladopi manchanai nina jatarijpica 450 huauqui panicunami paicunapaj huasita saquishpa, miticushpa rircacuna. Chaimi ancianocunaca cai huauquicunapaj pozadata mashcana carcacuna. Chai tucuita organizana cashcamantami superintendente de circuitoca 36 horascunata mana dormi tucurca (2 Corintios 11:27).

10. ¿Ancianocunaca huauqui panicunata cuidangapajca imamantataj esforzarincuna?

¹⁰ Ancianocunaca huauqui panicuna sinchi feta charichun, cushilla, tranquilo sintirichunmi ayudana cancuna (1 Pedro 5:2). Shuj llaqui atraso japijpica ancianocunaca huauqui panicuna alli cachun, micunata charichun, ropatapish charichun, maipi causanata charichunpishmi ayudana cancuna. Pero tal vez huauqui panicunaca achca quillacunatami paicunapaj feta sinchiyachichun, paicunata cushichichun minishtingacuna (Juan 21:15-ta liyipai). Shuj Comité de Sucursalmanta huauqui Haroldca llaquicunata charishca achca huauqui panicunahuanmi parlashca. Paica: “Cai huauqui panicunaca llaqui horas pasashca huashaca allimi sintiri callarincuna. Pero ñapishmi paicunapaj cꞌuyashca familia huañushcata, cosascunata chingachishcata o ima llaquita charishcata yuyarincunalla. Chaimi cutin dimastij llaquilla sintirincuna. Chashna sintirinaca mana ima juchachu can. Ashtahuanpish paicunata cushichishpami catina canchij” ninmi.

11. ¿Familiacunaca ima shina ayudashpa catichuntaj minishtincuna?

¹¹ Romanos 12:15-pica: “Cushicujcunahuanca cushicuichij. Huacajcunahuanca huacaichij” ninmi. Llaquita chari horasca huauqui panicunataca Jehová Diospish, ñucanchijpish paicunata cꞌuyashcatami yuyachina canchij. Ancianocunapish cai consejotami pajtachina can. Paicunaca familiacunatami ayudana can. Por ejemplo, Diosta mañashpa catichun, Bibliamanta yachashpa catichun, tandanacuicunaman ama faltachun, predicacionmanpish llujshichunmi ayudai tucuncuna. Yaya mamacunatapish huahuacunaman cushichichunmi ayudai tucuncuna. Yaya mamacunaca paicunapaj huahuacunaman Jehová Dios siempre ayudanatami yuyachina cancuna. Huauqui panicuna shuj familia shina paicunata ayudangapaj listos cashcatapishmi yuyachina cancuna (1 Pedro 2:17).

12. ¿Huauqui panicunaca ima llaquita charijcunata ayudangapajca imatataj rurai tucuncuna?

¹² ¿Huauqui panicunapish ima shinataj ayudai tucuncuna? Can causan ladopi ima llaqui tiyajpica ima shina ayudanatami ancianocunaman tapui tucungui. Tal vez canca llaquita charishca huauqui panicunata o chaipi ayudanaman shamuj huauqui panicunatami cambaj huasipi chasqui tucungui. Mana cashpaca congregacioncuna tandachishca micunacunata, shujtaj cosascunata repartishpami ayudai tucungui. ¿Cutin chai llaquicuna caru lugarpi tiyashca cajpica ima shinataj ayudai tucungui? Llaquita charishcacunamantami Jehová Diosta mañai tucungui. Paicunata ayudangapajpishmi congregacionpi cullquita churai tucungui (2 Corintios 1:8-11; 8:2-5). Llaqui tiyan lugarpi ayudanaman ri pudishpaca ancianocunahuanrajmi parlana cangui. Chaipi ayudachun invitajpica ima shina ayudanata, maipi ayudanatami huaquin instruccioncunata chasquingui.

¿CONTRACUNA LLAQUICHIJPIPISH IMA SHINATAJ AYUDAI TUCUNCHIJ?

13. ¿Contracuna catirashpa llaquichijpica huauqui panicunaca ima llaquicunallatataj charincuna?

¹³ Achca huauqui panicunaca ñucanchij shinallatajmi cullqui illaj saquirishcacuna, ungüicunatapish charishcacuna, paicunapaj familiacunapishmi huañushcacuna. Chai jahuapish huaquin huauqui panicunataca autoridadcunaca catirashpami llaquichincuna. Autoridadcuna jarcaicunata churashcamantami ancianocunaca huauqui panicunata mana libremente animai tucuncuna. Pasaj yachaipi parlashca huauqui Andreipi yuyashun. Paipaj congregacionpi tiyaj shuj panica cullqui illajmi saquirirca. Qꞌuipacarin shuj accidentetapishmi charirca. Chaimantami achca cutincuna paitaca operana carcacuna. Operashca cashcamantami trabajanallatapish mana pudirca. Pero pandemia tiyajpipish, contracuna jarcacujpipish huauqui panicunaca chai panita ayudangapajmi tucui pudishcata rurarcacuna. Jehová Dioscarin paitaca manataj saquircachu.

14. ¿Ancianocunaca Jehová Diospi confiashcataca ima shinataj ricuchincuna?

¹⁴ ¿Ancianocunaca ima shinataj ayudai tucuncuna? Huauqui Andreica Jehová Diosta mañashca qꞌuipami tucui pudishcahuan ayudangapaj esforzarirca. ¿Diosca paipaj mañaitaca ima shinataj cutichirca? Jehová Diosca huauqui panicunahuanmi ayudarca. Maijan huauqui panicunaca chai ungushca panitaca doctorpajmanmi pusharcacuna. Caishujcunaca cullquitami convidarcacuna. Chashna shuj shinalla ayudanacushcamantami Jehová Diosca achcata bendiciarca (Hebreos 13:16). ¿Ancianocuna caimantaca imatataj yachai tucunguichij? Contracuna jarcaicunata churajpipish ayudata minishtijcunata ayudachunmi shujtaj huauqui panicunaman mingana canguichij (Jeremías 36:5, 6). Jehová Diospipishmi tucui shunguhuan confiana canguichij. Paillatajmi huauqui panicunata cuidashpa catichun ayudanga.

15. ¿Contracuna llaquichi horasca huauqui panicuna tandalla catingapajca imatataj rurana cancuna?

¹⁵ ¿Huauqui panicunapish ima shinataj ayudai tucuncuna? Contracuna llaquichi horasca tal vez uchilla grupocunallapimi tandanacui tucushun. Chaimantami ñucanchij huauqui panicunahuan alli apanacungapaj esforzarina canchij. Chaipajca caishuj chaishujhuan perdonanacushunchij. Shujtajcunatapish ñucanchijraj ayudashunchij. Chashnami Diablota mishashun (Proverbios 19:11; Efesios 4:26; Tito 3:14). Andreipaj congregacionpi tiyaj huauqui panicunaca ungushca panita ayudashcamantami tucuicuna shuj familia shina ashtahuan alli apanacui tucurcacuna (Salmo 133:1).

16. Colosenses 4:3, 18-pi nishca shinaca ¿carcelpi caj huauqui panicunamantaca imatataj rurana canchij?

¹⁶ Autoridadcuna chꞌican chꞌican jarcaicunata churajpipish, achca huaranga huauqui panicunaca Jehová Diosta sirvishpami caticuncuna. Chashna Diosta sirvicushcamantami huaquincuna carcelpi cancuna. Chaimi paicunamanta, paicunapaj familiacunamanta Jehová Diosta mañana canchij. Shujtaj huauqui panicunaca autoridadcunapaj ñaupajpimi carcelpi caj huauqui panicunata mana manchashpa difindincuna. Shinallataj paicunaca cai huauqui panicunamanmi minishtishca cosascunatapish cuncuna. Sinchi feta charichunpishmi ayudancuna. Cai huauqui panicunamantapishmi Diosta mañana canchijc (Colosenses 4:3, 18-ta liyipai). Chashna tucui shunguhuan mañashpa catijpica Jehová Diosca paicunatami ayudanga (2 Tesalonicenses 3:1, 2; 1 Timoteo 2:1, 2).

17. ¿Contracuna llaquichi horaspaj prepararingapajca imatataj rurana canchij?

¹⁷ Canpish, cambaj familiapish contracuna llaquichi horaspajmi allichirina canguichij (Hechos 14:22). Pero chaipajca sinchi llaquicunata charigrishcataca mana yuyanachu canguichij. Ashtahuanpish allichiringapajca Jehová Dioshuan alli apanacungapajmi esforzarina cangui. Cambaj huahuacunapish Diospajman cꞌuchuyachunmi ayudana cangui. Maipica llaquilla o sustarishca cashpaca Jehová Diosmanmi ima shina sintirishcataca tucuita huillana cangui (Salmo 62:7, 8). Cambaj familiahuanpish Jehová Diospi imamanta confiana cashcatami parlana cangui.d Llaqui horaspaj cambaj huahuacunata preparachishca shinallatajmi, contracuna llaquichi horaspajpish preparachina cangui. Jehová Diospi tucui shunguhuan confiachunpishmi ayudana cangui. Chashnami cambaj huahuacunaca tranquilos tucuita ahuantai tucungacuna.

18. ¿Shamuj punllacunapica ima shinataj causashun?

¹⁸ Jehová Diosca tranquilo sintirichunmi ñucanchijta ayudan (Filipenses 4:6, 7). Chashna ayudashcamantami ima pandemia tiyajpipish, ima llaquicuna tiyajpipish o contracuna llaquichijpipish tucuita ahuantai tucunchij. Ancianocunapish, huauqui panicunapish ñucanchijta ayudashcamantami seguros, tranquilo sintirinchij. Chashna ayudanacushcamantami shamuj punllacunapaj jatun llaquitacarin ahuantai tucushun (Mateo 24:21). Jatun llaqui punllacunapica tranquilo canatami minishtishun. Caishujhuan chaishujhuan ayudanacunatapishmi minishtishun. Pero jatun llaqui punllacuna qꞌuipaca ña mana llaqui causaita charishunchu. Ashtahuanpish Dios munashca shinami huiñaipaj sumajta, tranquilos causashun (Isaías 26:3, 4).