¿Yacharcanguichu?

¿Felipe paipajman cꞌuchuyajpica Etiopiamanta eunuco runaca imapitaj viajacurca?

TRADUCCIÓN DEL NUEVO MUNDO nishca Bibliapica “carreta” nishpaca chꞌican chꞌican carretacunamantami parlan (Hechos 8:​28, 29, 38). Etiopía llajtamanta caj eunuco runaca macanacungapaj carretapi o carrerasta rurangapaj carretapica mana viajacushcangachu. ¿Imamantataj chashna ninchij?

Etiopiamanta caj runaca achca autoridadtami charirca. Chaimantami achcata viajaj carca. Chai runaca “Etiopía llajtata mandaj Candace nishca huarmita sirvijmi carca. Shinallataj chai huarmipaj tucui imalla charishcacunata cuidajmi carca” (Hechos 8:27). Chai punllacunapica Etiopía llajtaca Egipto ura ladocamami carca. Eunuco runaca mana tucui tiempochu chai carretallapitaj viajashcanga. Chaimantami viajangapajca achca cosascunata apana carca. Siglo primeropica viajangapajca chꞌican carretacunami tiyarca. Huaquincunaca chuscu ruedayuj, carpayujmi carca. Shuj libropica (An Exegetical Commentary) cashnami nin: “Chai jatun carretacunapica achca cosascunata apangapaj, tiyaringapajpishmi achca espacio tiyarca. Shinallataj chaipica caru llajtacunamanmi viajajcuna carca”.

Eunuco runa profeta Isaías quillcashca librota liyicujpimi Felipeca paipajman cꞌuchuyarca (Hechos 8:30). Chai carretacunaca gushtullatami purij carca. Chaimantami eunuco runaca liyi tucurca. Shinallataj Felipepish carretahuan igualmi callpai tucurca.

Eunuco runaca ‘Felipetaca paipaj carretaman huichiyashpa paihuan tiyarichunmi rogarca’ (Hechos 8:31). Carrerasta rurangapaj carretacunapica carretata manejajcunaca shayarishpami rijcuna carca. Pero viajangapaj jatun carretacunapica eunucopish, Felipepish tiyarishpa richunca achca espaciomi tiyarca.

Hechos capítulo 8-pi nishcacunata intindishcamanta, shinallataj ñaupa gentecuna ima shina viajajcuna cashcata intindishcamantami cunanca etíope runa macanacungapaj carretapi o carrerasta rurangapaj carretacunapi viajacushcataca ña mana dibujanchij. Ashtahuanpish shuj jatun carretapi viajacushcatami cunanca dibujanchij.