Caitami tapushcacuna
¿Salmo 12:7-pi nishcacunaca imatataj nisha nin?
Salmo 12:1-4-pica: “Huañujlla runacunapurapica can nishca shinataj rurajcunaca chingarishcacunamari” ninmi. Shinallataj versos 5-manta 7-camaca cashnami nin:
“‘Mandaj Diosca cashnami nin: Huajchacunataca llaquichicuncunami,
ima illajcunaca aij, nishpami mañacuncuna.
Paicunamantaca ñucami shayarigrini.
Llaquimanta llujshichihuai nishpa shungu llujshishpa mañashcamantaca quishpichishami ninmi’.
Mandaj Dios rimashca shimicunaca chuyami.
Pai rimashca shimicunaca allpa hornopi canchis cutin rupachishpa, tucui mapata anchuchishca chuya cullqui shinami.
Can Mandaj Diosmi, ñucanchijtaca huaquichingui.
Cai millaicunapaj maquimantaca canmi huiñaipaj huaquichingui”.
Verso 5-pi nishca shinaca Jehová Diosca llaquicunata apajcunatami quishpichinga.
Cutin verso 6-pi nishca shinaca Jehová Dios rimashca shimicunaca chuyami can. Shinallataj paipaj nishcacunaca “hornopi canchis cutin rupachishpa, tucui mapata anchuchishca chuya cullqui shinami can”. Diosta sirvijcunaca chai versopi nishcacunahuanca de acuerdomi canchij (Salmo 18:30; 119:140).
Huaquin Bibliacunapica Salmo 12:7-pica: ‘Canmi chaicunataca huaquichingui’ ninmi.
Verso 6-pica Jehová Diospaj rimashca shimicunamantami parlan. Chaimantami maijancunaca verso 7-pipish Jehová Diospaj nishcacunamanta parlacushcata yuyancuna. Maijan gentecunaca Bibliatami chingachisha nishcacuna. Pero, Jehová Diosca chai gentecuna chaita rurachunca mana saquishcachu (Isaías 40:8; 1 Pedro 1:25).
Pero, verso 5-pi nishca shinaca Jehová Diosca llaquicunata apacujcunatapishmi huaquichishca, ayudashca. Ashtahuanpish chaita ruranataca manataj saquingachu (Job 36:15; Salmo 6:4; 31:1, 2; 54:7; 145:20).
Shinaca verso 7-pica nishca shinaca ¿Jehová Diosca gentecunatachu huaquichin o paipaj nishcacunata?
Cai salmopi ima nisha nishcata alli intindishpaca verso 7-pi gentecunamanta parlacushcatami intindinchij.
Salmo 12:1-pi nishca shinaca umajcunami Diosta sirvijcunataca tal vez llaquichishcarcacuna. Chai qꞌuipaca chai salmopica Jehová Dios llulla gentecunata chingachinatami nin. Pero, cai salmopi nishca shinaca Jehová Dios rimashca shimicuna chuya cashcamantami pajtaringataj. Chaimantami Jehová Dios paita sirvijcunata ayudataca seguros canchij.
Shinashpaca verso 7-pi “chaicunatami huaquichingui” nishpaca Jehová Dios paita sirvijcunata huaquichinatami nicun.
Pero ¿imamantataj huaquin Bibliacunapica verso 7-pica canmi chaicunata huaquichingui nin? Hebreo rimaipi chaita nishcamantami paicunaca chashna traducishcacuna. Shinapish griego rimaipi tiyaj Septuaginta nishca Bibliapica: “Paimi ñucanchijta huaquichinga. Paimi ñucanchijta cuidanga” ninmi. Chai Bibliapi nishcacunata ricushpaca verso 7-pi millaicuna llaquichishca alli gentecunamanta parlacushcatami intindinchij. Paicunami “millaicunapaj maquimantaca huiñaipaj huaquichishca cangacuna” (Salmo 12:7, 8). Shinallataj arameo rimaipi tiyaj Bibliapica verso 7-pica: “Amitolla, canmi paicunataca millaicunamantaca huiñaipaj huaquichingui” ninmi. Chai Bibliapi nishcacunata ricushpaca Salmo 12:7-pi Dios rimashca shimicunamanta mana parlacushcatami intindinchij.
Shinashpaca Jehová Diosta “alli sirvijcunata” Jehová Diosllataj quishpichinataca tucui shunguhuanmi crina canchij.