Desanimachij yuyaicunata mishashunchij

1, 2. a) ¿Huaquinpica ima dudacunatataj charishun? b) ¿Cai yachaipica imatataj yachashun?

IMA EDADTA charishpapish tucuicunami maipica dudacunataa charinchij. Cai ejemplocunapi yuyashun. Maijan jovencunaca Jehová Dios paicunamanta sustarij cashcataca manachari seguro can. O tal vez bautizarinata decidinaca paicunapajca sinchichari can. Shinallataj shuj huauquica jovenraj cashpa achca cullquita gananapi ocuparinapaj randica Jehová Diosta ashtahuan sirvinatachari agllarca. Pero cunanca paipaj familiata mantiningapajca mana suficiente cullquita charinchu. Chaimantami paica, “¿jovenraj cashpa Jehová Diosta sirvinata agllashpaca allichu decidircani?” nishpa tapuringa. Cutin shuj mayorlla panica ñaupa shina Jehová Diosta sirvingapaj fuerzasta mana charishcamantami huaquinpica llaquilla sintirin. ¿Canpish: “¿Jehová Diosca ñucamanta preocuparinchu? ¿Paita ashtahuan sirvingapaj sacrificiocunata ruranaca allichu carca? ¿Mayorlla cajpipish, ungushca cajpipish Jehová Diosca ñucata valoranchu?” nishpa tapurishcanguichu?

² Cashna shina dudacunata charishpaca Jehová Diosmantami caruyashun. Chaimantami cai yachaipica Jehová Dios ñucanchijmanta sustarij cashcata mana seguros cashpa, ñaupa punllacunapi Jehová Diosta sirvinata agllashcamanta llaquilla cashpa o mayorlla cashcamanta Jehová Dios ñucanchijta ña mana valorashcata yuyashpaca imata rurana cashcata yachashun. Chaipajca Bibliapimi alaja consejocunata ricushun.

¿DUDACUNATA CHARISHPACA IMATATAJ RURANA CANCHIJ?

3. ¿Dudacunata charishpaca imatataj rurana canchij?

³ Dudacunata charishpaca Diospaj Shimipimi chaimanta imata yachachishcata ricuna canchij. Chaita rurashpaca espiritualmente sinchimi cashun. Ñucanchij ‘crishcacunapish sinchimi canga’ (1 Corintios 16:13).

4. ¿Ñucanchij yuyaicuna cierto cashcata o mana cierto cashcata yachangapajca imatataj rurana canchij? (1 Tesalonicenses 5:21).

⁴ (1 Tesalonicenses 5:​21-ta liyipai). Bibliapi nishca shinaca Jehová Diosca tucuita alli ricurachunmi munan. Chaitaca, ¿ima shinataj rurai tucunchij? Ñucanchij yuyaicuna cierto cashcata yachangapajca Bibliapi nishcacunahuanmi chꞌimbapurana canchij. Por ejemplo, shuj jovenca: “Jehová Dios ñucamantaca mana sustarinchu” nishpachari yuyan. Chai yuyaicuna cierto cashcata o mana cierto cashcata yachangapajca chai jovenca Bibliapimi Jehová Dios chaimanta imata yuyashcata ricuna can.

5. ¿Jehová Dios ñucanchij dudacunamanta imata yuyashcata yachangapajca imatataj rurana canchij?

⁵ Bibliata liyishpaca Jehová Dioshuan parlacushca shinami can. Pero Jehová Dios ñucanchij dudacunamanta imata yuyashcata yachangapajca, ¿imatataj ashtahuan rurana canchij? Bibliapimi ñucanchijta ayudaj versocunata mashcana canchij. Jehová Diospaj organización cushca publicacioncunapipish investiganami canchij (Proverbios 2:​3-6). Pero manaraj investigashpami Yayitu Diostaca: “Ñuca dudacunamanta can imata yuyashcata yachangapaj ayudahuai” nishpa mañana canchij. Chai huashaca Bibliapimi ñucanchij dudacunamanta imata nishcata mashcana canchij. Shinallataj ñaupa punllacunapi Jehová Diosta sirvijcuna chai dudacunata charishpa imata rurashcatami yachana canchij.

6. ¿Dudacunata ama charingapajca imamantataj tandanacuicunaman rina canchij?

⁶ Tandanacuicunapipish Jehová Dios imata yuyashcatami yachashun. Chaimantami tucui tandanacuicunaman ringapaj esforzarina canchij. Tal vez shuj conferenciapi, mana cashpaca maijan huauqui o pani shuj comentariota cujpimi ñucanchij dudacunamanta Jehová Dios imata yuyashcata yachashun (Proverbios 27:17). Cunanca huaquin dudacunata charishpa imata rurai tucushcatami yachashun.

¿JEHOVÁ DIOS CANMANTA MANA PREOCUPARISHCATA YUYASHPACA IMATATAJ RURANA CANGUI?

7. ¿Huaquincunaca imatataj yuyancuna?

⁷ Jehová Dios tucui imallata rurashcata ricushpaca: “¿Jehová Diosca ñucamantapish sustarinchu? ¿Tucuita ruraj Diospaj amigo cai tucunichu?” nishpachari yuyashcangui. Rey Davidpish chashnami yuyashcanga. Pero, Jehová Dios cada unomanta sustarij cashcata ricushpaca mancharishcami saquirirca. Chaimi: “Mandaj Dioslla, ¿Runaca ima cajpitaj paitaca chaparacungui? Huañujlla runaca ¿ima cajpitaj paitaca cꞌuyangui?” nishpa tapurca (Salmo 144:3). Canpish chashna sintirishpaca, ¿imatataj rurana cangui?

8. ¿Jehová Diosca gentecunapica imatataj ricun? (1 Samuel 16:​6, 7, 10-12).

⁸ Bibliapica huaquin gentecuna imapaj mana valij shina ricurijpipish Jehová Diospajca achca valishca cashcatami yachachin. Por ejemplo, Jehová Diosca Israel llajtata mandachunca Jesepaj ocho churicunamantaca shujtami agllashca carca. Chaimi pai agllashca mandajpaj umapi aceiteta tallichun Samuelta cacharca. Samuel Jesepaj huasiman chayajpica Jeseca paipaj siete churicunallatami cayarca. Pero paipaj último churi Davidtaca mana cayarcachu.b Shinapish Jehová Diosca Davidtami rey cachun agllashca carca (1 Samuel 16:​6, 7, 10-12-ta liyipai). Jehová Diosca David shungu ucupi ima shina cashcatami ricurca. Paica Jehová Diostaca shungumantami cꞌuyaj carca.

9. ¿Jehová Dios canmanta sustarij cashcataca imamantataj seguro cai tucungui? (Fotomantapish parlapai).

⁹ Jehová Dios canmanta sustarishcata ima shina ricuchishcata yuyai. Por ejemplo, paica can minishtishca consejocunatami cun (Salmo 32:8). Canta alli rijsishcamantami paica chashna consejocunata cun (Salmo 139:1). Jehová Dios cushca consejocunata cambaj causaipi pajtachishpa cushilla causacushcata ricushpaca Jehová Dios canmanta sustarij cashcatami cuentata cungui (1 Crónicas 28:9; Hechos 17:​26, 27). Shinallataj Yaya Diosca cambaj esfuerzocunatami ricun. Shungu ucupi can alli cashcata ricushpaca paica cambaj amigomi tucusha nin (Jeremías 17:10). Paica paipajman cꞌuchuyachunmi munan (1 Juan 4:19).

¿DIOSTA SIRVINATA AGLLASHCAMANTA LLAQUILLA SINTIRISHPACA IMATATAJ RURANA CANGUI?

10. ¿Ñaupa tiempopi japishca decisioncunapi yuyashpaca huaquinpica ima shinataj sintirishun?

¹⁰ Maijancunaca jovenraj cashpa huaquin decisioncunata japishcamantami qꞌuipaca llaquilla sintirincuna. Tal vez Jehová Diosta ashtahuan sirvingapajmi alli trabajota, alli negociota saquircacuna. Achca huatacuna pasajpica paicuna rijsishca gentecuna trabajanallapi ocuparishcamanta cushilla, tranquilo causacushcatami ricuncuna. Chaimi: “¿Jehová Diosta ashtahuan sirvingapaj sacrificiocunata ruranaca allichu carca? ¿Ñucapish ashtahuan cullquita charingapaj trabajashpallachu pasana carcani?” nishpa tapurincuna.

11. ¿Salmo 73-ta quillcaj runaca imamantataj llaquilla sintirirca?

¹¹ Canpish Jehová Diosta sirvinata agllashcamanta llaquilla sintirishpaca, ¿imatataj rurana cangui? Salmo 73-ta quillcaj runapimi yuyana cangui. Paica Diosta mana sirvijcuna ungüicuna illaj, llaquicuna illaj, tranquilo causacushcatami ricurca. Shinallataj chai gentecuna achca cullquita charishcatami ricurca (Salmo 73:​3-5, 12). Chaita ricushpami paica: ‘Jehová Diosta sirvingapaj tucui ñuca imalla rurashcaca imapaj mana sirvinchu’ nishpa yuyarca. Salmistaca punllantami chashna llaquilla sintirij carca (Salmo 73:​13, 14). ¿Pero ama chashna sintirishpa catingapajca imatataj rurarca?

12. ¿Salmo 73:​16-18-pi nishca shinaca Salmota quillcaj runaca tranquilo sintiringapajca imatataj rurarca?

¹² (Salmo 73:​16-18-ta liyipai). Salmota quillcaj runaca Jehová Diospaj huasimanmi rirca. Chaipi cashpami paica tranquilo yuyai tucurca. Chashnami maijan gentecuna cushilla laya causashpapish shamuj punllacunapi llaquicunata charinata cuentata curca. Shinallataj paica Jehová Diosta sirvina tucuimanta yalli valishca cashcata intindishpami tranquilo sintirirca. Chaimantami Jehová Diostaca tucui shunguhuan cutin sirvisha nirca (Salmo 73:​23-28).

13. ¿Jovenraj cashpa Jehová Diosta sirvinata agllashcamanta llaquilla sintirishpaca imatataj rurana cangui? (Fotomantapish parlapai).

¹³ Salmota quillcaj runa shinaca canpish tranquilo sintiringapajca, ¿imatataj rurana cangui? Caipi yuyai: Jehová Diosta sirvishcamantami paipaj ñaupajpica alli ricuringui. Shinallataj Jehová Diosta mana sirvijcuna paipaj ayudata mana charishcatami yuyarina cangui. Paicunaca shamuj punllacunapi ima esperanzata mana charishcamantami cunan punllacunapi cushilla causangapaj esforzarincuna. Shinapish canca cunan punllacunapipish, shamuj punllacunapipish Jehová Dios cushca bendicioncunatapish chasquingui (Salmo 145:16). Caitapishmi yuyana cangui: Shujtaj decisioncunata japishca cashpa ñucanchij causai ima laya cana cashcataca mana yachai tucunchijchu. Shinapish Jehová Diosta cꞌuyashcamanta, gentecunatapish cꞌuyashcamanta alli decisioncunata japishpaca siempremi sumaj bendicioncunata chasquingui.

¿JEHOVÁ DIOS CANTA ÑA MANA VALORASHCATA YUYASHPACA IMATATAJ RURANA CANGUI?

14. ¿Imamantataj huaquincunaca llaquilla sintirincuna?

¹⁴ Achca huauqui panicunaca yuyajlla cashcamanta, ungushca cashcamanta o discapacitado cashcamantami llaquilla sintirincuna. Paicunaca: “Jehová Diosca ñucataca ña manachari valoranga” nishpami yuyancuna.

15. ¿Salmo 71-ta quillcaj runaca imatataj alli yacharca?

¹⁵ Salmo 71-ta quillcaj runapishmi maipica llaquilla sintirij carca. Chaimantami Yaya Diostaca: “Fuerza illaj tucujpipish ama ñucallata saquingui” nishpa mañarca (Salmo 71:​9, 18). Chashna sintirishpapish salmistaca Jehová Diosta tucui shunguhuan sirvishpa catingapajmi esforzarirca. Paica Jehová Dios paita ayudanata, ñaupajman pushanatami seguro carca. Jehová Diosca ñucanchij esfuerzocunata ricushpaca cushillami sintirin. Salmistaca chaitaca allimi yacharca (Salmo 37:​23-25).

16. ¿Yuyajlla huauqui panicuna Jehová Diospaj valishca cashcataca imamantataj seguros canchij? (Salmo 92:​12-15).

¹⁶ Yuyajlla huauqui panicunaca Jehová Diospaj valishca cashcataca manataj cungarinachu can. Canca yuyajlla cashpapish, ungushca cashpapish Jehová Diosta sirvishpami cati tucungui (Salmo 92:​12-15-ta liyipai). Chaimantami imata ña mana rurai tucushcata yuyanapaj randica Jehová Diosta sirvishpa catingapaj imata rurai tucushcata yuyana cangui. Por ejemplo, alli ejemplota churashpa, shujtajcunamanta sustarishcata ricuchishpami ayudai tucungui. Shinallataj Jehová Dios ñaupa punllacunapi canta ima shina ayudashcata parlashpa, shamuj punllacunapi pai cusha nishcacuna pajtarinataj cashcata parlashpami shujtajcunata ayudai tucungui. Ashtahuancarin shujtajcunamanta Yayitu Diosta mañashpami ayudai tucungui (1 Pedro 3:12). Ima llaquita, ima ungüita charishpapish tucuicunami ñucanchij pudishcallata rurashpa Jehová Diosta jatunyachi tucunchij.

17. ¿Shujtajcunahuanca imamantataj mana compararina canchij?

¹⁷ Jehová Diosta sirvingapaj mana achcata rurai tucushcamanta llaquilla sintirishpaca, ¿imatataj rurana cangui? Jehová Dios cambaj esfuerzocunata achcata valorashcatami yuyarina cangui. Tal vez shujtajcunahuan compararinatami munangui. Pero chaitaca mana ruranachu cangui. Jehová Diosca chaitaca mana ruranchu (Gálatas 6:4). Jesusta catij María huarmipi yuyashun. Paica Jesuspaj chaquicunapica achcata valij aceitetami tallirca (Juan 12:​3-5). Cutin shuj huajcha viudaca templopi tiyaj cajacunapica ashallata valij ishqui moneditacunatami churarca (Lucas 21:​1-4). Shinapish Jesusca María chai huajcha viudata yalli rurashcataca mana nircachu. Ashtahuanpish ishquindij sinchi feta charishcata ricuchishcamantami valorarca. Yaya Diospish sinchi feta charishcamanta, paita cꞌuyashcamanta tucui imalla rurashcataca achcatami valoran. Canca Jehová Diosta sirvingapajca ashallata ruracushcatachari yuyangui. Shinapish Yaya Diosca paita cꞌuyashcamanta paita sirvingapaj achcata esforzarijta ricushpaca cushillami sintirin.

18. ¿Dudacunata ama charingapajca imatataj rurana canchij? (“Dudacunata ama charingapajca Bibliatami liyina cangui” nishca recuadrota ricui).

¹⁸ Tucuicunami maipica dudacunata charinchij. Pero caipi yachashca shinaca dudacunata ama charingapajmi Bibliata estudiana canchij. Chaimanta dudacunata ama charingapaj esforzari. Chashnami sustarishca canapaj randica Jehová Diospi tucui shunguhuan confiangui. Jehová Diosca cada uno ima shina cashcata, ima shina sintirishcataca allimi yachan. Paica paita sirvingapaj tucui shunguhuan esforzarijta ricushpaca cushillami sintirin. Chaimantami ñucanchijcunaman bendicioncunata cusha nin. Paipajca tucuicunami valishca canchij.