Utca bautizari

1. ¿Imamantataj bautizarina cangui?

¿CANCA Jehová Diosta cꞌuyanguichu? Paica causaita, sumaj bendicioncunatapishmi canmanca cushca. Chaimanta ¿paita cꞌuyashcataca ima shinataj ricuchi tucungui? Chaipajca paiman mingarishpami bautizarina cangui. Chashnami Jehová Diospaj familia parte tucungui. Jehová Diosca cambaj Yaya, cambaj amigo cashcamantami tucuipi cantaca cuidanga, ayudanga (Salmo 73:24; Isaías 43:​1, 2). Shinallataj Diosman mingarishpa bautizarishcamantami huiñai huiñaita causana oportunidadta charingui (1 Pedro 3:21).

2. ¿Cai yachaipica imatataj yachashun?

² ¿Canca bautizarinataca manchanguichu? Ama sustarichu. Mana canllachu chashna sintirishcangui. Achcacunami bautizaringapajca huaquin cambiocunata rurana cashcacuna, paicunapaj yuyaitapishmi cambiana cashcacuna. Pero cunanca cushillami Jehová Diosta sirvicuncuna. Cai yachaipica bautizarishca huaquin gentecunamantami parlagrinchij. Shinallataj paicuna ima jarcaicunata charishcata, chaicunata ima shina chꞌimbapurashcatami yachashun. Mayorlla cashpapish, joven cashpapish tucuicunami paicunapaj ejemplomanta yachai tucunchij.

SAMARITANOCUNACA BAUTIZARIRCACUNAMI

3. ¿Samaritanocunaca bautizaringapajca imatataj rurana carcacuna?

³ Jesuspaj punllacunapica samaritanocunaca Siquempaj, Samariapaj cꞌuchullapimi causajcuna carca. Samaritanocunaca paicunapaj propio religiontami charircacuna. Bautizaringapajca Jehová Diospaj Shimimantami yachana carcacuna. ¿Imamanta? Samaritanocunaca Génesis, Éxodo, Levítico, Números, Deuteronomio librocunallata y tal vez Josué librotapish Jehová Dios quillcachishcatami yuyajcuna carca. Deuteronomio 18:​18, 19-pi nishca shinaca samaritanocunaca Dios cachasha nishca profeta shamuchunmi shuyajcuna carca (Juan 4:25). Paica Jesusmi carca. Chaimi samaritanocunaca bautizaringapajca Jehová Dios, Jesusta agllashcata intindina carcacuna. Jesuspi crishpami achca samaritanocunaca bautizarircacuna (Juan 4:39). Shinallataj huaquincunaca bautizaringapajca judiocunata yalli cashcata yuyanatami saquina carcacuna (Lucas 9:​52-54).

4. Hechos 8:​5, 6, 14-pi nishca shinaca ¿Felipe huillashcataca samaritanocunaca ima shinataj chasquircacuna?

⁴ ¿Samaritanocunaca bautizaringapajca imatataj rurarcacuna? Felipe huillajpica samaritanocunaca Cristomanta, Diospaj Shimimantami alli yachaj chayarcacuna (Hechos 8:​5, 6, 14-ta liyipai). Felipe judío cajpipish samaritanocunaca Cristomanta imata yachachishcataca atencionhuanmi uyarcacuna. Jehová Dios tucuicunata alli trataj cashcata yuyarishpami paita uyashcangacuna (Deuteronomio 10:​17-19). Shinallataj Felipe ungushcacunata jambijta, demoniocunata llujshichijta ricushpami Jehová Dios paita cachashcata cuentata curcacuna (Hechos 8:7).

5. ¿Samaritanocunamantaca imatataj yachai tucunchij?

⁵ Felipe judío cajpipish, mushuj yachaicunata yachachijpipish samaritanocunaca paipaj yachachishcacunataca allimi chasquircacuna. Chaimi Bibliapica: “Chai gentecunaca Diospaj Gobiernomanta alli huillaicunata, Jesucristopaj shutimantapish Felipe huillajpica, pai huillashcata crishpami cꞌaricunapish, huarmicunapish bautizarircacuna” nin (Hechos 8:12). Ashtahuancarin Felipepaj yachachishcacuna cierto cashcata cuentata cushpaca paicunaca mana qꞌuipayashpami bautizarircacuna. ¿Caimantaca imatataj yachai tucungui? ¿Canca Diospaj Shimipi verdadta yachachishcataca cringuichu? ¿Jesús yachachishca shina testigo de Jehovacuna paicunapura cꞌuyaita ricuchinacujcuna cashcataca cringuichu? (Juan 13:35). Chaita tucui shunguhuan crishpaca utcami bautizarina cangui. Chaita rurashcamanta Jehová Dios canta bendicianataca tucui shunguhuanmi crina cangui.

6. ¿Rubenmantaca imatataj yachanchij?

⁶ Alemaniamanta huauqui Rubenca huahuamantapachami Diosmanta yacharca. Pero ña jatunyashpaca Jehová Dios tiyashcata o mana tiyashcataca dudai callarirca. ¿Chai dudacunata ama charingapajca Rubenca imatataj rurarca? Paica: “Dudacunataca mana charisha nircanichu. Chaimantami ñuca dudacunamanta ashtahuan investigarcani. Shinallataj evolucionmanta parlaj ñucanchij publicacionpimi cutin cutin estudiarcani” nircami. Rubenca ¿Existe un Creador que se interese por nosotros? nishca librotapishmi liyirca. Chashnami paipaj feta sinchiyachirca. Shinallataj Rubenca: “Jehová Dios tiyaj cashcata seguro cashpaca achcatami cushicurcani” nircami. Rubenca central mundialman rishpacarin chꞌican chꞌican huauqui panicuna tandalla trabajajcuna cashcatami ricurca. Alemaniaman tigrashpaca 17 añosta charishpami bautizarinata decidirca. Canpish Bibliapi nishcacuna cierto cashcata mana seguro cashpaca Jehová Dios cushca publicacioncunapimi informacionta mashcana cangui. Chaita estudiashpami dudacunataca mana charingui (Efesios 4:​13, 14). Shinallataj shujtaj llajtacunapi, cambaj congregacionpipish huauqui panicuna cꞌuyaita ricuchinacujta ricushpaca cushillami sintiringui.

TARSOMANTA SAULOMI BAUTIZARIRCA

7. ¿Sauloca bautizaringapajca imatataj cambiana carca?

⁷ Tarsomanta Sauloca judiocunapaj religionta alli pushaj, rijsishcami carca (Gálatas 1:​13, 14; Filipenses 3:5). Chai tiempopica achca judiocunaca: “Jesusta catijcunaca pandachijcunami can” nishpami juchachijcuna carca. Saulopish Jesusta catijcunata catirashpa llaquichishpami Diospaj munaita ruracushcata yuyarca (Hechos 8:3; 9:​1, 2; 26:​9-11). Paipish Jesuspi feta churashpa, bautizarishpaca achca llaquicunatami charina carca. Chaimi paipaj yuyaita cambiana carca.

8. a) ¿Saulo bautizarichunca imataj ayudarca? b) Hechos 22:​12-16-pi nishca shinaca ¿Ananiasca Saulotaca ima shinataj ayudarca? (Fotomantapish parlapai).

⁸ ¿Saulo bautizarichunca imataj ayudarca? Jesús jahua cielomanta parlajpica achijnicuj luzca Saulotaca ciegotami saquirca (Hechos 9:​3-9). Chaimantami paica quimsa punllacunata nimata mana micushpa ima tucushcapi yuyacushcanga. Sauloca Jesusta Dios agllashcata, Jesusta catijcuna verdadera religión cashcatami cuentata curca. Chaipica Estebanta huañuchishcamantami culpable sintirishcanga (Hechos 22:20). Quimsa punlla qꞌuipaca Ananiasca Saulotaca cꞌuyaihuanmi cutin ricuchun ayudanaman rirca, utca bautizarichunpishmi animarca (Hechos 22:​12-16-ta liyipai). Sauloca humilde cashcamantami Ananías paita ayudachun saquirca. Shinallataj achca cambiocunatami rurarca (Hechos 9:​17, 18).

9. ¿Saulomantaca imatataj yachai tucunchij?

⁹ ¿Saulomantaca imatataj yachai tucunchij? Paica jatun tucushca cashpa o manchaita charishca cashpaca mana bautizarinmanchu carca. Pero Jesusmanta yachashpa, humilde cashpaca achca cambiocunatami rurarca (Hechos 26:​14, 19). Achca llaquicunata charinata yachashpapish Jesusta catinatami decidirca (Hechos 9:​15, 16; 20:​22, 23). Bautizarishca qꞌuipapish Jehová Diospimi confiashpa catirca. Chaimantami achca llaquicunata charirca (2 Corintios 4:​7-10). Canpish bautizarishpaca tal vez achca llaquicunatami charingui. Pero mana canllachu cangui. Jehová Diospaj, Jesuspaj ayudatami charingui (Filipenses 4:13).

10. ¿Annamantaca imatataj yachai tucunchij?

¹⁰ Pani Annapaj ejemplota ricushun. Paica Europa llajtapimi causan. Paipaj mama bautizarishca qꞌuipaca paipaj yaya permisota cujpimi Annaca 9 huatacunata charishpa Bibliata estudiai callarirca. Paica paipaj tucui familiahuanmi causarca. Paicunaca Anna testigo de Jehovacunahuan Bibliata estudiacujta yachaj chayashpaca achcatami pꞌiñarircacuna. Paicunaca: “Familiapaj religionta saquishpaca shujtajcunapaj ñaupajpimi malpi saquichinga” nishpami yuyajcuna carca. Chashnapish Annaca 12 huatacunata charishpami bautizarisha nishcata paipaj yayaman huillarca. Paipaj yayaca: “¿Shujtajcuna nishcallamantachu bautizarisha ningui?” nishpami tapurca. Annaca: “Mana, Jehovata cꞌuyashcamantami bautizarisha nini” nircami. Chaimantami paipaj yayaca Annataca bautizarichun saquirca. Anna bautizarishca qꞌuipapish paipaj familiaca burlarishpa, mana alli tratashpami catircacuna. Shuj familiacarin: “Alli causasha nishpaca testigo de Jehová tucunapaj randica mana allita rurashpa, fumashpami causana cangui” nircami. ¿Annaca chai llaquicunata aguantangapajca imatataj rurarca? Annaca cashnami nin: “Jehová Diosmi fuerzata curca. Ñuca yaya mamapish achcatami apoyarcacuna. Jehová Dios ima shina ayudashcata yuyaringapajmi shuj listata rurashpa charij carcani”. Canpish llaquicunata charigrishcata yachashpaca achca manchaitachari charingui. Pero Jehová Dios cantapish ayudanatami yuyarina cangui (Hebreos 13:6).

CORNELIOMI BAUTIZARIRCA

11. ¿Imamantataj Cornelioca bautizarinata dudashcanga?

¹¹ Corneliopaj ejemplomanta yachashun. Paica 100 romano soldadocunata mandajmi carca (Hechos 10:1). Chaimi Cornelioca achca importante, rijsishca runa cashcanga. Shinallataj Bibliapica Corneliomanta parlashpaca huajchacunata ayudaj cashcatami nin (Hechos 10:2). Jehová Diosca apóstol Pedrotami Cornelioman alli huillaicunata huillachun cacharca. ¿Cornelioca alli huillaicunata uyashpaca imatataj rurarca? ¿Achca importante, rijsishca runa cashcamantachu bautizarinata dudarca?

12. ¿Cornelio bautizarichunca imataj ayudarca?

¹² ¿Cornelio bautizarichunca imataj ayudarca? Bibliapi nishca shinaca “Cornelioca Diosta manchaj, tucui paipaj familiandij Diosta sirvijmi carca”. Cutin cutin rogarishpa Diosta mañajpishmi carca (Hechos 10:2). Apóstol Pedro alli huillaicunata huillajpica Corneliopish, paipaj familiapish Jesuspi feta churashpami bautizarircacuna (Hechos 10:​47, 48). Shinallataj Cornelioca paipaj familiandijmi cambiocunata rurangapaj listos carcacuna (Josué 24:15; Hechos 10:​24, 33).

13. ¿Corneliomantaca imatataj yachanchij?

¹³ Cornelioca Saulo shinallatajmi jatun mandaj, rijsishca runa carca. Chashna cashpapish bautizarinata imapish jarcachunca mana saquircachu. ¿Canpish bautizaringapajca cambaj causaipi achca cambiocunatachu rurana cangui? Chashna cajpica Jehová Dios canta ayudanatami seguro cana cangui. Shinallataj pai mandashcacunata cazungapaj esforzaricujta ricushpaca cantami bendicianga.

14. ¿Huauqui Tsuyoshipaj ejemplomantaca imatataj yachai tucunchij?

¹⁴ Japón llajtamanta Tsuyoshi shuti runaca sisacunata allichinatami yachachij carca. Sisacunatapish allichishpami cꞌatuj carca. Pero paipaj jefeca funeralcunamanmi sisacunata apaj carca. Shinallataj budista religionpimi huañushcacunata ayudangapaj tandanacuj carca. Chaimi Tsuyoshitapish chaicunata rurachun cachaj carca. Shinapish paica huañushcacunamanta Bibliapi ima nishcatami yachaj chayarca. Chaimantami bautizaringapajca paipaj trabajopi huaquin cambiocunata rurarca (2 Corintios 6:​15, 16). Paipaj jefehuan parlashca qꞌuipaca jefeca budistacunapaj tandanacuiman mana rijpipish paihuan trabajachunmi saquirca. Huauqui Tsuyoshica shuj huatata Bibliamanta estudiashca qꞌuipami bautizarirca.a Canpish cambaj trabajopi huaquin cambiocunata rurana cashpapish Jehová Dios canman, cambaj familiaman tucui minishtishcata cunatami seguro cana cangui (Salmo 127:2; Mateo 6:33).

CORINTO LLAJTAPI CAUSAJCUNAMI BAUTIZARIRCACUNA

15. ¿Corinto llajtapi causajcunapajca bautizarinaca imamantataj sinchi carca?

¹⁵ Corintopi causaj gentecunaca ashtahuan charina yuyailla, huainayashpami causajcuna carca. Chaimantami paicunapajca Jehová Diosta sirvinaca sinchi carca. Pero apóstol Pabloca Corinto llajtaman chayashpaca Jesusmantami alli huillaicunata yachachirca. “Corinto llajtapi causajcunapish achcacunami alli huillaicunata uyashpa cri callarircacuna, bautizarircacunapish” (Hechos 18:​7-11). Shinallataj Jesusca apóstol Pabloman muscuipi shina ricurishpami caita nirca: “Cai llajtapica achca gentecunami ñucapi cringacuna”. Chaimantami apóstol Pabloca Corinto llajtapica shuj huata yallita huillashpa saquirirca.

16. ¿Corintocuna bautizarichunca imataj ayudarca? (2 Corintios 10:​4, 5).

¹⁶ ¿Corintocuna bautizarichunca imataj ayudarca? (2 Corintios 10:​4, 5-ta liyipai). Jehová Diosca paipaj Shimita yachachishpa, espíritu santota cushpami corintocunapaj causaita cambiachun ayudarca (Hebreos 4:12). Paicunaca Yaya Diospaj alli huillaicunata chasquishpami machanata, shuhuanata, cꞌaripura, huarmipura huainayanatapish saquircacuna (1 Corintios 6:​9-11).b

17. ¿Corinto llajtapi causaj gentecunamantaca imatataj yachai tucunchij?

¹⁷ Huaquin corintocunaca bautizaringapajca achca cambiocunatami rurana carcacuna. Shinapish paicunaca “mana pudishunchu” nishpaca mana yuyarcacunachu. Ashtahuanpish paicunaca huiñai causaiman apaj ñanpi purishpa catingapajmi esforzarircacuna (Mateo 7:​13, 14). ¿Canpish mana alli ruraicunata, mana alli viciocunata mishangapajchu esforzaricungui? Chashna cashpaca mana shaicurishpa Jehová Diosta mañashpa cati. Paimi chai mana alli munaicunapi ama urmachunca paipaj espíritu santota cushpa ayudanga.

18. ¿Pani Monikapaj ejemplomantaca imatataj yachai tucunchij?

¹⁸ Georgia llajtapi causaj pani Monikaca jovenraj cashpaca bautizaringapajmi mana alli musicata uyanata, mana allicunata ricunata saquirca. Shinallataj mana alli rimaicunata ama rimangapajpishmi esforzarirca. Paica: “Diosta mañanami ñucataca achcata ayudarca. Ñuca causaipi allicunata rurangapaj esforzarijta ricushpami Jehová Diosca ñucata ayudangapaj listo carca” nircami. Pani Monikaca 16 huatacunata charishpami bautizarirca. ¿Canpish ima mana allicunata saquishpa Jehová Diosta sirvinatachu munangui? Chashna cashpaca cambaj causaipi cambiocunata rurangapaj Diospaj espíritu santota cuchunmi Jehová Diosta mañana cangui. Paica cꞌuyaihuanmi cantaca ayudanga (Juan 3:34).

CAMBAJ FECA URCUTAPISHMI CUYUCHI TUCUN

19. ¿Jatun urcucuna shina jarcaicunata chꞌimbapurangapajca imatataj rurana cangui? (Fotomantapish parlapai).

¹⁹ Bautizaringapajca achca jaracaicunatachari charingui. Pero Jehová Diosca cantaca achcatami cꞌuyan, canpish paita sirvichunmi munan. Jesusca paipaj discipulocunataca: “Cancuna, uchilla mostaza muyu valilla feta charishpaca cai urcutapish ‘Caimanta chaiman ri’ nijpica, ringallami. Imatapish rurai tucunguichijllami” nircami (Mateo 17:20). Jesusca asha huatacunallatami paipaj discipulocunahuan carca. Chaimantami paicunapaj feta ashtahuan sinchiyachishpa catina carcacuna. Shinallataj Jesusca ‘Jehová Diosmi jatun urcucuna shina jarcaicunata chꞌimbapurachun ayudanga’ nircami. ¡Cantapish jarcaicunata chꞌimbapurachunca Jehová Diosmi ayudanga!

20. ¿Cai yachaipi ricushca Diosta sirvijcuna shinaca imatataj rurasha ningui?

²⁰ Bautizaringapaj jarcaicuna tiyajpica rato cambiocunata rurangapaj esforzari. Shinallataj ñaupa tiempopi Diosta sirvijcunamanta, cunan tiempopi Diosta sirvij huauqui panicunamantapish yachai. Paicunamanta imallata yachashcapipish yuyari. Chashnami Diosta tucui vida sirvingapaj, bautizaringapajpish fuerzasta, animota japingui. Jehová Diosta sirvinaca tucuimanta yalli valishcami can.