Jehová shina, Jesús shina yuyashunchij

1, 2. a) ¿Jesusca ima shinataj Diosta cꞌuyachun mandarca? b) ¿Jesusca paipaj tucui yuyaihuan Diosta cꞌuyashcataca ima shinataj ricuchirca?

JESUSCA Jehovata cꞌuyachun mandashca tucuimanta yalli valishca cashcatami intindichirca. Paica: “Jehová Diostaca cambaj tucui shunguhuan, cambaj tucui causaihuan, cambaj tucui fuerzahuan, cambaj tucui yuyaihuan cꞌuyangui” nircami (Lucas 10:27). Chaimantami imata munashpapish, imata ruragrishpapish Jehová Diosta cꞌuyashcata siempre ricuchina canchij. Ashtahuancarin ñucanchij yuyashcacunahuanmi Diosta cꞌuyashcata ricuchina canchij. Jehová Diosta cꞌuyashcamantami pai shina yuyangapaj esforzarina canchij. Pero Diospaj yuyaita mana tucuita intindi tucushpapish Jesuspaj yuyaitami intindi tucunchij. Paica paipaj Yaya shinami yuyaj carca (1 Corintios 2:16).

² Jesusca Jehová Diostaca paipaj tucui yuyaihuanmi cꞌuyaj carca. Paita cushichina yuyaillami causaj carca. Chaimantami llaquita apana cashpapish Diospaj munaita pajtachirca. Chaita pajtachingapaj imapish jarcachunca manataj saquircachu.

3. a) ¿Pedroca Jesusmantaca imatataj yacharca? b) 1 Pedro 4:​1-pi nishca shinaca ¿ñucanchijpish imatataj rurana canchij?

³ Pedropish, caishuj apostolcunapish Jesushuan tiempota pasashpami pai ima shina yuyashcata yachai tucurcacuna. Chaimi Pedroca pai quillcashca primera cartapica: “Cancunapish Cristo yuyashca shinallataj yuyangapaj allichirichij” nirca (1 Pedro 4:​1-ta liyipai). Apóstol Pedroca “allichirichij” nishpaca macanacungapaj shuj soldado allichiricuj shina allichirina cashcatami nicurca. ¿Imapajtaj allichirina canchij? Jesús shina yuyangapaj. Jesús shina yuyashpallami mana alli munaicunamanta, cai mundopi tiyaj mapa ruraicunamantapish anchuri tucushun (2 Corintios 10:​3-5; Efesios 6:12).

4. ¿Cai yachaipica imatataj yachashun?

⁴ Cai yachaipica Jesús shina yuyangapajmi quimsa yuyaicunata yachashun. Puntapica, Jehová Dios shina yuyana cashcatami ricushun. Ishquipica, humilde canatami yachashun. Quimsapica, alli yuyaiyuj cangapaj Diosta mañarashpa causana cashcatami yachashun.

JEHOVÁ DIOS SHINA YUYASHUNCHIJ

5. ¿Pedroca imata nishpataj Jehová Dios shina mana yuyashcata ricuchirca?

⁵ Shuj cutinca Pedroca Jehová Dios shina mana yuyashcatami ricuchirca. Ricushun. Jesusca paipaj apostolcunataca Jerusalenman rijpi paita japishpa llaquinaita huañuchina cashcatami huillarca (Mateo 16:21). Pedroca Dios agllashca Quishpichij Mesías, Jesús cashcataca allimi yacharca. Chaimi paica: “Jehová Diosca Jesús huañuchunca manataj saquingachu” nishpa yuyashcanga (Mateo 16:16). Chashna yuyashpami Pedroca Jesustaca: “Amito, ama chaita nichu, canca chai llaquicunataca mana charinguichu” nirca (Mateo 16:22). Chashna nishpami Pedroca Jehová Dios shina, Jesús shina mana yuyashcata ricuchirca.

6. ¿Jesusca imata rurashpataj Jehová Dios shina yuyashcata ricuchirca?

⁶ Jesusca paipaj Yaya shinami yuyaj carca. Chaimantami Pedrotaca: “¡Caimanta anchui Satanás! Diospaj munaita ruranatamari jarcacungui. Canca Dios yuyashca shinaca mana yuyanguichu, ashtahuanpish runacuna yuyashca shinamari yuyangui” nirca (Mateo 16:23). Jesusca Jehovapaj munaita pajtachingapaj sufrina, huañuna cashcataca allimi yacharca. Chaimanta apóstol Pedro “chai llaquita mana charinguichu” nishpa alli munaihuan nijpipish Jesusca chaitaca mana uyarcachu. Chai qꞌuipami apóstol Pedroca Jehová shina yuyana cashcata intindirca. Ñucanchijpish Jehová shina yuyanatami yachana canchij.

7. ¿Pedroca Jehová Dios shina yuyangapaj esforzaricushcataca ima shinataj ricuchirca? (Página 1-pi tiyaj fotota ricui).

⁷ Pedroca Jehová Dios shina yuyashpa catingapajmi esforzarirca. Huaquin huatacuna qꞌuipaca Jehová Diosca mana judío caj gentecuna paita adorai tucuchunmi decidirca. Chaipimi Pedrotaca mana judío caj Cornelio shuti runaman huillachun nirca. Cornelioca Diosta sirvi callarij mana judío cajcunapuramantami carca. Shinapish judiocunaca mana judiocunahuanca mana alli apanacujcunachu carca. Chaimantami Pedropajpish Dios nishcata pajtachinaca sinchi cashcanga. Pero Jehovapaj munai maijan cashcata yachashpami paipaj yuyaita cambiarca. Cornelio paita visitanaman richun mañajpica Pedroca mana dudashpami paipaj huasiman rishpa Corneliomanpish, paipaj familiamanpish Diosmanta yachachirca. Qꞌuipacarin paicuna bautizarircacuna (Hechos 10:​28, 29; 10:​21-23, 34, 35, 44-48).

8. 1 Pedro 3:​8-pi nishca shinaca ¿Jehová Dios shina yuyashcata ricuchingapajca imatataj rurana canchij?

⁸ Huaquin huatacuna qꞌuipapish apóstol Pedroca cashna nishpami consejarca: “Tucuicuna shuj shinalla yuyaichij” nircami (1 Pedro 3:​8-ta liyipai, notatapish ricui). Tucui testigo de Jehovacunaca shuj shinalla yuyangapajca Jehová Dios shinami yuyana canchij. Chaipajca Diospaj Shimitami yachana canchij. Por ejemplo, Jesús nishca shinaca shuj huauquica Diospaj Gobiernota punta lugarpi churashpami Diosta tiempo completota sirvinata agllanga (Mateo 6:33). ¿Chaita ricushpaca imatataj nishun? ¿Pedro Jesusta desanimachishca shinachu desanimachishun? Mana. Chaipaj randica alli decidishcamantami felicitashpa paita apoyana canchij.

HUMILDE CANATA YACHASHUNCHIJ

9, 10. ¿Jesusca ima shinataj humilde canata yachachirca?

⁹ Pai huañunapaj ashalla horascuna faltajpica Jesusca Pedromanpish, caishuj apostolcunamanpishmi humilde canata yachachirca. Jesusca Pedromanpish, Juanmanpish pai manaraj huañushpa paipaj discipulocunahuan tandalla micungapajca tucuita preparachunmi mingashca carca. Chaipimi paicunaca tucuicunapaj chaquicunata pi maillachun yacutapish, toallacunatapish, bateatapish listota charircacuna. Pero ¿pitaj tucuicunapaj chaquicunata maillagrirca?

¹⁰ Chaitaca shuj sirvij runami rurana carca. Shinapish Jesusca micucushcamanta ñapish jatarishpami paipaj jahua churanata ladoman churashpa, shuj toallata japishpa, bateapi yacuta churashpa paita catijcunapaj chaquicunata maillai callarirca. Chaita ricushpami apostolcunaca mancharishca saquirishcangacuna (Juan 13:​4, 5). ¿Chaita rurangapajca Jesusca mashna tiempotashi demorashcanga? Achcata demorashpapish 12 apostolcunapaj chaquicunatami maillarca. Paita traicionagrij Judaspaj chaquicunatapishmi maillarca. Chaita rurashpaca Jesusca humilde cashcatami ricuchirca. Chai huashaca paita catijcunataca: “¿Cancunapaj chaquicunata imamanta maillashcataca intindinguichijchu? Cancunaca ñucataca Yachachij, Amito ninguichijmi. Chashna nishpaca allitami ninguichij, ñucaca chaillatajmi cani. Ñucaca cancunapaj Amo, Yachachij cashpapish cancunapaj chaquicunatami maillashcani. Chashnallatajmi cancunapish caishuj chaishuj chaquicunata maillanacuna canguichij” nishpami pacienciahuan intindichirca (Juan 13:​12-14).

11. ¿Pedroca humilde cashcataca ima shinataj ricuchirca? (1 Pedro 5:5; fotomantapish parlapai).

¹¹ Pedroca humilde canatami yacharca. Jesús jahua pachaman rishca huashaca Pedroca huacharishcamantapacha purinata mana valij runatami jambirca (Hechos 1:​8, 9; 3:​2, 6-8). Chaita ricushpaca achca gentecunaca mancharishca saquirishpami Pedropajman callpashpa rircacuna (Hechos 3:11). ¿Chaipica Pedroca imatashi rurarca? ¿Shujtaj judiocuna shinachu gentecuna paita alabachun mashcarca? Mana. Pedroca: “Jesuspaj shutimanta, ñucanchijpish paipaj shutipi feta churashcamantami cancuna ricucushca, cancuna rijsishca runapaj chaquicunaca sinchiyashca” nishpami Jesustapish, Jehová Diostapish jatunyachirca (Hechos 3:​12-16). Qꞌuipacarin Pedroca paipaj primera cartapica Jesusta catijcunamanca: “Tucuicunallataj caishuj chaishuj humilde cashcata ricuchinacuichij” nircami. Chashna nishpaca Pedroca chaquicunata maillangapaj Jesús shuj toallata churarij shina humildadta churarina cashcatami nisha nicurca (1 Pedro 5:​5-ta liyipai).

12. ¿Pedro shina humilde cangapajca imatataj rurana canchij?

¹² Ñucanchijpish Pedro shinami humilde canata yachai tucunchij. Shungu ucumanta humildes cangapajca shujtajcuna ñucanchijta yalli cashcatami yuyana canchij. Chashnami shujtajcuna ricuchunlla imatapish ruranapaj randica Jehovata cꞌuyashcamanta, shujtajcunata cꞌuyashcamanta imapipish cushilla ayudashun. Chashnami humildes cashcata ricuchishun (Mateo 6:​1-4).

“ALLI YUYAIYUJ” CASHUNCHIJ

13. ¿“Alli yuyaiyuj” canaca imatataj nisha nin?

¹³ ¿“Alli yuyaiyuj” canaca imatataj nisha nin? (1 Pedro 4:7). Ñucanchij causaipi Jehová Dios munashca shina decidina cashcata, causana cashcatami nisha nin. Ashtahuancarin tucuimanta yalli Jehová Dioshuan alli apanacuna cashcatami nisha nin. Chaimantami alli yuyaiyujcuna cashpaca shujtajcunata yalli cashcata, tucuita yachajcuna cashcataca mana yuyashun. Chaipaj randica humildadhuanmi Jehová Dios ñucanchijta ayudachun mañashpa catina canchij.a

14. ¿Pedroca paillapi confiashcataca ima shinataj ricuchirca?

¹⁴ Pai huañunapaj ashalla horascuna faltajpica Jesusca paita catijcunataca: “Cunan tutaca tucuicunami ñucata saquishpa ringuichij” nircami. Shinapish Pedroca paillapi confiashcamantami: “Tucuicuna canta saquishpa rijpipish ñucaca manataj saquishachu” nirca. Chaimi Jesusca cai consejota curca: “Rijcharishca caichij. Juchapi ama urmangapajpish Diosta mañaraichij” (Mateo 26:​31, 33, 41). Pedroca Jesuspaj consejota catishca cashpaca mana manchashpami Jesuspaj discípulo cashcata huillanman carca. Cutin Pedroca “Jesustaca mana rijsinichu” nircami. Jesús nishca consejota mana catishcamantami Pedroca yallitaj llaquilla sintirirca (Mateo 26:​69-75).

15. ¿Jesusca alli yuyaj cangapajca imatataj rurarca?

¹⁵ Jesusca jucha illaj cashpapish Jehová Diospi confiashcatami ricuchirca. Paica pai huañunapaj ashalla horascuna faltajpipish Diosta mañashpami catirca. Chashnami paipaj Yayapaj munaita pajtachingapaj fuerzasta charirca (Mateo 26:​39, 42, 44; Juan 18:4, 5). Jesús cutin cutin Diosta mañashcatami Pedroca ricushcanga. Chaitaca nunca mana cungarircachu.

16. ¿Apóstol Pedroca ima shinataj alli yuyaiyuj cashcata ricuchirca? (1 Pedro 4:7).

¹⁶ Tiempo qꞌuipaca Pedroca Diosta mañashpa paipi confianatami yacharca. Jesús causarishca huashaca Pedromanpish, caishuj apostolcunamanpish predicashpa catichunmi espíritu santota cusha nirca. Chaicamaca Jerusalenpi shuyachunmi nirca (Lucas 24:49; Hechos 1:​4, 5). ¿Pedroca shuyacushpaca imatataj rurarca? Bibliapi nishca shinaca paipish, shujtaj discipulocunapish “Diosta mañarashpami caticurcacuna” (Hechos 1:​13, 14). Tiempo qꞌuipaca pai quillcashca punta cartapica Jesusta catijcunataca mañarashpa Jehová Diospi confiashpa catichunmi animarca. Chashnami alli yuyaiyujcuna tucurcacuna (1 Pedro 4:​7-ta liyipai). Apóstol Pedroca alli yuyaiyuj, Diospi tucui shunguhuan confiajmi tucurca. Chashnami paica congregacionpajca shuj sinchi pilar shina carca (Gálatas 2:9).

17. Imata alli ruranata yachashpapish, ¿imamantataj Diospi confiashpa catina canchij? (Fotomantapish parlapai).

¹⁷ Jehová Diosca ñucanchijpaj ima alli cashcataca allimi yachan. Chaimantami alli yuyaiyujcuna cangapajca paitaca cutin cutin mañana canchij. Imatapish alli ruranata yachashpapish valishca decisioncunata agllangapajmi pai ñucanchijta ayudachun mañanalla canchij.

18. ¿Ñucanchijpish imacunallatataj yachai tucunchij?

¹⁸ Jehová Dios ñucanchijta yalli yachaj, yalli yuyaiyuj cajpipish paiman rijchajta rurashca cashcamantami achcata agradicinchij (Génesis 1:26; Isaías 55:9). Chaimanta ñucanchijpish Jehová Dios shina yuyanata, humilde canata, alli yuyaiyuj canata yachashpa catishunchij.