Jesús shina cushicushpa huillashunchij

1. ¿Diosta sirvijcunaca imapitaj shujtaj religioncunamanta chꞌican canchij?

JEHOVÁ DIOSTA sirvijcunaca alli huillaicunata cushicushpa huillangapajmi esforzarinchij. Chashnami shujtaj religioncunamanta chꞌican cashcata ricuchinchij (Tito 2:14). Shinapish huaquinpica manachari cushicushpa huillashpa catinata munanchij. Alli huillaj shuj ancianopish: “Maipica huillana munaitaca mana charinichu” nircami.

2. ¿Cushilla huillashpa catinaca imamantataj maipica sinchi can?

² Huillashpaca cushillami sintirinchij. Pero shujtaj ruraicunata rurashpachari ashtahuan cushilla sintirinchij. ¿Imamantataj chashna ninchij? Maipica Tandanacuna Huasicunata shayachishpa, chaicunata allichishpa, llaquicuna tiyashca ladocunapi huauqui panicunata ayudashpa, paicunata animashpaca chai ratomi alli resultadota ricunchij. Chaimantami cushilla sintirinchij. Shinallataj paicunahuan tandalla trabajashpaca tranquilomi sintirinchij. Ñucanchijman cꞌuyaita ricuchijpi, sinchita trabajashcamanta agradicijpi, valorajpica cushillami sintirinchij. Shinapish chai ladocunallapitaj achca huatacunata huillacujpi, gentecuna mana uyasha nijpica llaquillachari sintirinchij. Ashtahuanpish tucurimui punllacunapi ashtahuan jarcaicuna ricurina cashcatami yachanchij (Mateo 10:22). Chashna cajpipish ¿cushilla huillashpa catingapajca imatataj rurana canchij?

3. ¿Lucas 13:6 al 9-pica imatataj Jesusmanta yachachin?

³ Cushilla huillashpa catingapajca Jesuspaj ejemplomantami yachana canchij. Paica cai Allpapi cashpaca cushillami huillashpa catirca (Lucas 13:​6-9-ta liyipai). Paillatajmi higo yurata cuidaj runahuan chꞌimbapurarirca. Chai runaca quimsa huatacunatami higo yura mana granota pꞌucujpipish cuidashpa catirca. Chashnallatajmi Jesusca judiocunamanca quimsa huatacunata huillarca. Shinapish ashacunallami paita catijcuna tucurca. Ima shinami higota cuidaj runaca granota pꞌucungacama sinchita trabajashpa catirca, Jesuspish alli huillaicunata gentecuna chasquichunmi huillangapaj sinchita esforzarirca.

4. ¿Cai yachaipica imallatataj yachashun?

⁴ Cai yachaipica seis quillacuna huañunapaj illajpi Jesús ima shina cushicuihuan huillashcatami ricushun (Lucas 10:1). Caicunatami yachashun: 1) Jesusca Jehová Diospaj munaitami punta lugarpi churarca. 2) Paica profeciacunatami alli intindirca. 3) Jehová Dios ayudanapimi confiarca. 4) Huaquin gentecuna uyana cashcata yuyashpami cushicuihuan huillashpa catirca.

JESUSCA DIOSPAJ MUNAITA PUNTA LUGARPIMI CHURARCA

5. ¿Jesusca Diospaj munaita ruracushcataca ima shinataj ricuchirca?

⁵ Jesusca “Diospaj Gobiernomanta alli huillaicunataca” cushicushpami huillarca. Chaita rurachun Dios munashcatami yacharca (Lucas 4:43). Jesuspajca cai obrata ruranami tucuimanta yalli valishca carca. Pai huañunapaj ashalla quillacuna illajpicarin “chꞌican chꞌican llajtacunapi, uchilla pueblocunapipishmi yachachishpa” purirca (Lucas 13:22). Pai shinallataj huillachunmi paita catijcunamanpish yachachirca (Lucas 10:1).

6. ¿Imacunata rurashpataj alli huillaicunata huillachun ayudanchij? (Fotocunamantapish parlapai).

⁶ Jehová Diospish, Jesuspish cunan punllacunapica alli huillaicunata huillashpa catichunmi munan (Mateo 24:14; 28:​19, 20). Diosta sirvingapaj ima shujtaj ruraicunata rurashpaca alli huillaicunata huillachunmi ayudanchij. Por ejemplo, Tandanacuna Huasicunataca gentecuna chaipi Jehová Diosta adoranaman shamuchunmi shayachinchij. Betelpi, shujtaj ladocunapi imata rurashpapish alli huillaicunata huillachunmi ayudanchij. Llaquicunapi caj huauqui panicunatapish ima minishtishcacunata charichunmi ayudanchij, tandanacuicunaman shamuchun, huillanaman llujshichunpishmi ayudanchij. Jehová Diosca tucuimanta yallica huillachunmi munan. Chaimantami ñucanchijpish tucui shunguhuan huillashpa catisha ninchij. Hungría llajtamanta János shuti huauquica: “Ñucanchijpajca huillana obrami ashtahuan importante can. Diosta sirvingapaj imata ruracushpapish huillanataca mana cungarinachu canchij” ninmi.

7. ¿Jehová Diosca imamantataj huillashpa catichun munan? (1 Timoteo 2:​3, 4).

⁷ Jehová Diosca achca gentecuna alli huillaicunata uyachun, chasquichunmi munan (1 Timoteo 2:​3, 4-ta liyipai). Chaimantami cushicushpa huillashpa catina canchij. Alli huillaicunata uyashpami gentecunaca quishpiri tucun. Jehová Diosca ñucanchijcuna alli huillajcuna cachunmi ayudasha nin. Por ejemplo, Cꞌuyaihuan ayudashunchij nishca folletoca gentecunaman Bibliamanta yachachingapaj, discipulocunata rurangapaj ima shina parlanacushpa callarinatami yachachin. Cunan punllacunapi gentecuna alli huillaicunata mana chasquishpapish jatun llaqui punllacuna manaraj tucurijpica tal vez ñucanchij huillashcata yuyarishpami Diosta sirvisha ningacuna. Cunan punllacunapi imata uyashcami shamuj punllacunapica paicunata ayudanga. Pero chaipajca huillashpami catina canchij.

JESUSCA PROFECIACUNATAMI ALLI INTINDIRCA

8. ¿Jesusca profeciacunata alli intindishcamantaca imatataj rurarca?

⁸ Jesusca Bibliapi huillashca profeciacuna ima laya pajtarina cashcatami yacharca. Chaimantami quimsa huatacuna chaupillata huillana cashcata intindirca (Daniel 9:​26, 27). Paica ima shina, ima hora huañuna cashcatapish allimi yacharca (Lucas 18:​31-34). Jesusca profeciacunata alli intindishcamantami Dios mingashca obrata tucuchingapajca cushilla huillashpa paipaj tiempota alli aprovecharca.

9. ¿Profeciacunata alli intindishpaca imatataj cuentata cushun?

⁹ Profeciacunata alli intindishpami cushilla huillashpa catinchij. Gentecuna ima shina cajta ricushpa, cai punllacunapi ima tucucujta ricushpami tucuri punllacunapi causacushcata yachanchij. Bibliapica tucuri punllacunapi ura lado llajtata jatun mandajhuan, janaj lado llajtata jatun mandajhuan macanacuna cashcatami huillan. Ura lado llajtata jatun mandajca Reino Unido y Estados Unidosmi can. Cutin janaj lado llajtata jatun mandajca Rusia y paita apoyajcunapishmi can. Chai profecía pajtaricushcatami intindinchij (Daniel 11:40). Shinallataj Daniel 2:43 al 45-pi parlashca shuj jatun runaman rijchajpaj chaquicuna Reino Unido y Estados Unidos gobiernota ricuchishcatami intindishcanchij. Bibliapi tiyaj profeciacunata estudiashpami Diospaj Gobierno cai pachapi tiyaj gobiernocunata ñalla tucuchinata yachanchij. Cai profeciacunaca tucuri punllacunapi causacushcatami ricuchin. Chaimantami cushilla utca huillana canchij.

10. ¿Cushilla huillashpa catingapajca ima shujtaj profeciacunatataj intindina canchij?

¹⁰ Paraíso Allpapi ima tucunata yachashpaca cushicushpami shujtajcunaman huillasha ninchij. República Dominicana llajtapi sirvij Carrie shuti panica: “Shamuj punllacunapi Jehová Dios sumaj causaita cuna cashcapi yuyashpaca chaicunata shujtajcunaman huillanatami munani. Gentecuna tucui problemacunahuan cajta ricushpaca cai huillaicunapish paicunapaj cashcatami cuentata cuni” ninmi. Profeciacunata alli intindishpami Jehová Dios huillangapaj ayudanatapish yuyarinchij. Hungría llajtamanta pani Leilaca: “Isaías 11:6 al 9 versocunata ricushpaca gentecuna cambiachun Jehová Dios paicunata ayudana cashcatami intindishcani. Chaimantami mana uyasha nij gentecunamanpish huillangapaj animota charini” ninmi. Zambia llajtamanta huauqui Christopherca “Marcos 13:​10-pi nishca shinaca alli huillaicunataca tucui muyundij Allpapimi huillacunchij. Chai profeciata pajtachinaca ñucapajca shuj privilegiomi can” ninmi. ¿Quiquintaca ima profeciata intindinataj huillashpa catichun ayudashca?

JESUSCA JEHOVÁ DIOS AYUDANAPIMI CONFIARCA

11. ¿Jesusca cushilla huillashpa catingapajca imamantataj Jehová Diospi confiana carca? (Lucas 12:​49, 53).

¹¹ Jesusca cushilla huillashpa catingapaj Jehová Dios ayudanapimi confiarca. Paica Diospaj gobiernomanta alli huillaicunataca respetohuanmi parlaj carca. Chashnapish Jesusca achcacuna pꞌiñarishpa, ama huillachun jarcana cashcatami yacharca (Lucas 12:​49, 53-ta liyipai). Religionta pushajcunapish Jesustaca achcatami pꞌiñarcacuna. Chaimantami paitaca tauca cutin huañuchinata munarcacuna (Juan 8:59; 10:​31, 39). Chashna cajpipish Jesusca huillanataca manataj saquircachu. Paica: ‘Mana ñucallachu cani. Ashtahuanpish ñucata cachaj Yayami ñucahuan can’ nircami (Juan 8:16) Shinallataj Jesusca: “Pai munashcatami siempre rurani. Chaimantami ñucallataca mana saquishca” nircami. (Juan 8:29).

12. ¿Jesusca paita catijcuna huillashpa catichunca ima shinataj animarca?

¹² Jesusca paita catijcunata llaquichina cashcatami yacharca. Chaimantami paicunamanca Jehová Dios ayudanapi confiana cashcata cutin cutin yuyachirca (Mateo 10:​18-20; Lucas 10:​11, 12). Shinallataj Jesusca paita catijcunataca manso cachunmi animarca (Mateo 10:16; Lucas 10:3). Ashtahuanpish alli huillaicunata gentecuna mana uyasha nijpica paicunata mana obligana cashcatami nirca (Lucas 10:​10, 11). Jesusca paita catijcunata catirashpa llaquichijpica miticushpa richunmi aconsejarca (Mateo 10:23). Jesusca Jehová Diospi confiashpapish, cushilla huillaj cashpapish ima peligro ricurijpica chaimantami utca caruyaj carca (Juan 11:​53, 54).

13. ¿Jehová Dios canta ayudanataca imamantataj seguro cangui?

¹³ Cunan punllacunapipish achca jarcaicunatami charinchij. Chaimantami cushilla huillashpa catingapaj Jehová Dios ayudachun minishtinchij (Apocalipsis 11:17). Jesusca paipaj apostolcunata cuidachunmi Diosta mañarca. Chai mañaitaca Juan capítulo 17-pimi ricui tucunchij. Jehová Diosca pai mañashcataca uyarcami. Hechos libropica apostolcuna jarcaicunata ahuantachun, cushilla huillashpa catichunpish Jehová ayudashcatami parlan. Jesusca alli huillaicunapi feta churajcunatapish cuidachunmi Jehová Diosta mañarca. Chashna mañashpaca ñucanchijmantapishmi mañarca. Jehová Diosca Jesús mañashcatami cutichishpa catinga. Chaimi ñucanchijtapish apostolcunata ayudashca shinallataj cuishicuihuan huillashpa catichun ayudanga (Juan 17:​11, 15, 20).

14. ¿Imamantataj cushilla huillashpa cati tucunchij? (Fotomantapish parlapai).

¹⁴ Tucuri punlla chayamucushcamantami huillanaca sinchi canga. Pero Jesusca ayudata charina cashcatami huillarca (Lucas 21:​12-15). Jesuspish, paita catijcunapish mana uyasha nij gentecunahuanca mana pꞌiñanacurcachu. Ñucanchijpish gentecunahuanca mana pꞌiñanacunachu canchij. Paicunallataj uyanata o mana uyanata decidichunmi saquina canchij. Jarcaicuna tiyan llajtacunapi huillana mana fácil cajpipish ñucanchij huauqui panicunaca Jehová Diospi confiashcamantami huillashpa catincuna. Jehová Diosca primer siglopica paita sirvijcunamanca huillashpa catichunmi poderta curca. Ñucanchijmanpish “caicamalla huillaichij” ningacamami huillashpa catichun poderta cunga (2 Timoteo 4:17). Jehová Diospi tucui shunguhuan confiashpaca alli huillaicunataca cushicushpami huillashpa catishun.

JESUSCA MANA DESANIMARIRCACHU

15. ¿Jesusca imata yuyashpataj cushilla sintirirca?

¹⁵ Jesusca alli huillaicunata gentecuna uyanatami crirca. Chaimantami mana desanimarishpa cushicuihuan huillashpa catirca. Pai huillai callarishca shuj huata qꞌuipami achca gentecuna alli huillaita uyanata munajta ricurca. Chaimantami paicunataca ñalla cosechana granohuan compararca (Juan 4:35). Qꞌuipaca Jesusca paita catijcunamanca: “Granota tandanaca achcami” nircami (Mateo. 9:​37, 38). Shujtaj cutinca Jesusca: ‘Granota tandanaca achcami. Chagrayuj Amota ashtahuan tandajcunata cachachun mañaichij’ nircami (Lucas10:2). Jesusca achca gentecuna alli huillaicunata uyana cashcata yachashpaca cushillami sintirirca (Lucas 10:21).

16. ¿Jesusca cushilla huillashpa catichunca ima chꞌimbapuraicunatataj parlarca? (Lucas 13:​18-21) (Fotomantapish parlapai).

¹⁶ Jesusca paita catijcunataca ama desanimarishpa, cushilla huillashpa catichunmi ayudarca. Chaimantami ishqui chꞌimbapuraicunata churashpa yachachirca. (Lucas 13:​18-21 ta liyipai). Diospaj Gobiernomanta alli huillaicunataca shuj mostaza muyuhuanmi chꞌimbapurarca. Chai muyu jatun yura tucungacama huiñashpa catij shinami achca gentecuna alli huillaicunata chasquina cashcata, pi mana jarcana cashcatapish yachachirca. Shinallataj alli huillaicunataca levadurahuanmi chꞌimbapurarca. Levadura tucui cutata asha asha pꞌunguillichij shinami alli huillaicunata tucui muyundij Allpapi huillana cashcata, achca gentecunapish asha asha cambiocunata rurana cashcatami intindichirca.

17. ¿Imamantataj cushilla huillashpa catina canchij?

¹⁷ Alli huillaicuna muyundij Allpapi causaj gentecunata ayudacushcata ricushpami achcata cushicunchij. Por ejemplo, cada huatami achca gentecunaca Jesús huañushcata yuyarina tandanacuiman shamuncuna, ñucanchijhuan Bibliata estudiai callarincuna. Shinallataj achcacunami predicanaman llujshishpa bautizarincuna. Mashna gentecuna alli huillaicunata chasquina cashcataca mana yachanchijchu. Pero Jehová Diosmi jatun llaqui punllamanta quishpirichun achca gentecunata tandachicun (Apocalipsis. 7:​9, 14). Jehová Diosmi chagra dueñoca can. Paimi mashna gentecuna alli huillaicunata uyana cashcata yachan. Chaimantami ñucanchijca cushicuihuan predicashpa catinalla canchij.

18. ¿Pi laya cangapajtaj esforzarisha ninchij?

¹⁸ Jesusta alli catijcunaca siempremi cushicushpa predicanchij. Por ejemplo, gentecunaca apostolcuna mana manchashpa cushicuihuan huillajta ricushpaca paicuna “Jesushuan purijcuna cashcatami cuentata curcacuna” (Hechos 4:13). Ñucanchijtapish Jesusta ricushca shinallataj richunmi munanchij. Chaimantami cushicuihuan huillashpa catina canchij.