Mana ñucanchijlla canchijchu

1, 2. a) ¿Imamantataj ñucanchijlla cashcata mana yuyana canchij? b) ¿Cai yachaipica imatataj ricushun?

ACHCA llaquicunata charishpaca mama cuchapi jatun acapana chaupipi, shuj uchilla barcopi ñucanchijlla cashca shinachari sintirinchij. Pero mana chashnachu can. Yaya Diosca ñucanchij ima llaquicunata apacujtami yachan. Chaimantami chai llaquicunata ahuantachun ayudasha nishca. Diosca paita tucui shunguhuan sirvijcunataca cada unotami: “Cantaca ayudacushallami” nin (Isaías 41:10).

² Ima llaquicunapi cajpipish Diosca “manataj cungarishachu, manataj saquishachu” nishcami. Chaimantami mana sololla canchij. Cai yachaipica Jehová Dios alli ñanta pushaj cashcata, ima minishtishcata cuj cashcata, cuidaj cashcata, cushichij cashcatami ricushun.

JEHOVAMI ALLI ÑANTA PUSHAN

3, 4. ¿Jehová Diosca ima shinataj alli ñanta pushan? (Salmo 48:14).

³ (Salmo 48:​14-ta liyipai). Diosca ñucanchij munaimanta imatapish mana rurai tucushcataca allimi yachan. Chaimantami alli ñanta pushangapajca Bibliata cushca (Salmo 119:105). Bibliapica alli decisioncunata agllana cashcata, ima shina cushilla causana cashcata, huiñai causaita charingapaj imata rurana cashcatami yachachin.a Shinallataj perdonana cashcata, mana pꞌiñarishca saquirina cashcata, honrado cana cashcata, caishuj chaishuj shungumanta cꞌuyanacuna cashcatami yachachin (Salmo 37:8; Hebreos 13:18; 1 Pedro 1:22). Bibliapi ima nishcata cazushpaca alli yaya mama, alli cusa huarmi, alli amigomi cashun.

⁴ Bibliapica ñucanchij shinallataj problemacunata charijcunamanta, ñucanchij shinallataj sintirijcunamantami parlan (1 Corintios 10:13; Santiago 5:17). Paicunamanta yachashpaca mana ñucanchijlla llaquicunata charishcatami cuentata cunchij. Shujtajcunapish llaquicunata charijpi Jehová Dios paicunata ima shina ayudashcatami cuentata cunchij (1 Pedro 5:9). Ñucanchijpish llaquicunata ima shina ahuantanatami yachanchij (Romanos 15:4).

5. ¿Jehová Diosca picunahuantaj alli ñanta pushan?

⁵ Jehová Diosca ñucanchij huauqui panicunahuanmi alli ñanta pushan.b Por ejemplo, superintendente de circuito huauquicunaca congregacioncunatami siempre visitancuna. Paicunaca sumaj discursocunata cushpami ñucanchij feta sinchiyachincuna, tandalla cachunpish animancuna (Hechos 15:40–16:5). Ancianocunapish cada unotami Diosmanta ama caruyachun ayudancuna (1 Pedro 5:​2, 3). Cutin yaya mamacunaca paicunapaj huahuacunatami Diosta cꞌuyachun, alli decisioncunata agllachun, Bibliata punllanta liyichun, tandanacuicunaman richun, huillanaman siempre llujshichun yachachincuna (Proverbios 22:6). Mayorlla panicunapish joven panicunataca sumajta consejashpa, alli ejemplota churashpami ayudancuna (Tito 2:​3-5).

6. ¿Ima shinataj Jehová Diosta agradicinchij?

⁶ Jehová Diosca cushilla causachunmi imalla minishtishcata cushca. ¿Paitaca ima shinataj agradicishun? Proverbios 3:​5, 6-pica: “Mandaj Diospi cambaj tucui shunguta churangui. Ama can alli yuyaiyuj cashcallapi shunguta churanguichu” ninmi. Diosca paipi confiajpica alli ñantami pushanga. Chaimi llaquicunapi mana urmashun, ashtahuanpish cushilla causashun. ¡Yaya Diostaca ñucanchijta cꞌuyashcamanta, minishtishca consejocunata cushcamantaca achcatami pagui ninchij! (Salmo 32:8).

JEHOVÁ DIOSCA IMALLA MINISHTISHCATAMI CUN

7. ¿Filipenses 4:​19-pi nishca shinaca Jehová Diosca ima shinataj ayudan?

⁷ (Filipenses 4:​19-ta liyipai). Jehová Diosca micunitata, ropitata, maipi causanata charingapaj esforzarijpica bendicianmi (Mateo 6:33; 2 Tesalonicenses 3:12). Minishtirishca cosascunamanta sustarinaca normalmi can. Pero Diosca chaicunamanta yallitaj sustarichunca mana munanchu (Mateo 6:25). Diosca paita tucui shunguhuan sirvijcunataca “manataj saquishachu” nishcami (Mateo 6:8; Hebreos 13:5). Chaimantami Yaya Dios pai nishcata pajtachinataj cashcata, tucui ima minishtishcata cuna cashcata crinchij.

8. ¿Jehová Diosca ima shinataj Davidta ayudarca?

⁸ Davidpi yuyashun. Paica rey Saulmantami miticushpa rirca. Chai llaqui horasmi Diosca Davidmanpish, paihuan cajcunamanpish imalla minishtishcata curca. Chaita yuyarishpami Davidca: ‘Ñucaca ñami yuyaj cani. Cashcata rurajta Dios shitashcataca, huambramantapacha cunancama manataj ricushcanichu. Paipaj huahua huahuapish micunata mañashpa purijtaca manataj ricushcanichu’ nirca (Salmo 37:25). Cai tucui huatacunapica cantapish, huauqui panicunatapish Dios ima shina ayudajtami ricushcangui.

9. ¿Jatun llaquicuna tiyajpica Diosca ima shinataj ayudan? (Fotomantapish parlapai).

⁹ Jatun llaquicuna tiyaj horasca Jehová Diosca paita sirvijcunamanca tucui ima minishtishcatami cun. Por ejemplo, primer siglopica Jerusalenpica jatun yaricaimi tiyarca. Chaimi shujtaj ladomanta huauqui panicunaca imalla minishtishcata cushpa ayudarcacuna (Hechos 11:​27-30; Romanos 15:​25, 26). Cunan punllacunapish Dios yuyaita cujpimi huauqui panicunaca jatun llaquicuna tiyajpica micunitata, yacuta, ropitata, jambicunatapish cushpa cꞌuyaihuan ayudancuna. Shujtaj huauquicunaca huasicunata, Tandanacuna Huasicunata allichishpami ayudancuna. Huasi illaj saquirijcunatapish, familia illaj saquirijcunatapish Bibliahuan animashpami cushichincuna.c

10-11. ¿Borispaj experienciamantaca imatataj yachanchij?

¹⁰ Jehová Diosca paita manaraj sirvijcunamanpish imalla minishtishcatami cun. Ñucanchijpish Diospaj ejemplota catishpami allicunata rurana canchij (Gálatas 6:10). Chaimi Diosta rijsinata munangacuna. Ucrania llajtapi causaj Boris shuti runaca shuj escuelapimi director can. Paica mana Testigo cashpapish Testigo estudiantecunataca cꞌuyaihuan, respetohuanmi trataj carca. Chai llajtapi guerra callarijpimi shujtaj ladopi causanaman rirca. Chaipi cajpimi huauqui panicunaca paita ayudarca. Qꞌuipaca paica Jesús huañushcata yuyarina tandanacuimanmi rirca. Ima shina ayudashcata yuyarishpami paica: “Testigo de Jehovacunaca ñucamanca cꞌuyaitami ricuchircacuna, allimi cuidarcacuna. Chaimantami agradecido cani” nirca.

¹¹ Ñucanchijpish mana Testigocuna imata minishticujpica ayudanami canchij. Chashnami Yaya Dios shina llaquijcuna cashcata ricuchishun (Lucas 6:​31, 36). Paicunaman cꞌuyaita ricuchijpica Jehová Diosmanta yachanata, ñucanchijhuan Diosta sirvinatami munangacuna (1 Pedro 2:12). Pero Diosta mana sirvijpipish shujtajcunapaj allita rurashpaca cushillami sintirishun (Hechos 20:35).

JEHOVÁ DIOSMI CUIDAN

12. ¿Jehová Diosca ñucanchijmantaca imatataj rurasha nishca? (Salmo 91:​1, 2, 14).

¹² (Salmo 91:​1, 2, 14-ta liyipai). Jehová Diosca ñucanchijtaca cuidasha nishcami. Chaimantami pai munashca shina paita adorachun Satanás jarcachunca manataj saquinga (Juan 17:15). “Jatun llaqui” callarijpica Jehová Diosca paita sirvijcunataca ama ima tucuchunmi tucuipi cuidanga. Chaitaca segurosmi canchij (Apocalipsis 7:​9, 14).

13. ¿Jehová Diosca ima shinataj cada unota cuidan?

¹³ Jehová Diosca ima alli cashcata, ima mana alli cashcata yachachunmi Bibliata cushca (Hebreos 5:14). Bibliapi ima nishcata pajtachishpaca Jehová Dioshuanmi alli apanacunchij, alli decisioncunatami agllanchij, cushillami causanchij (Salmo 91:4). Yaya Diosca ñucanchijtaca huauqui panicunahuanpishmi cuidan (Isaías 32:​1, 2). Diosta cꞌuyajcunahuan, paita cazujcunahuan apanacushpaca mana allicunamanta caruyangapajmi fuerzasta charinchij (Proverbios 13:20).

14. a) ¿Imamantataj Jehová Diosca paita sirvijcuna llaquita apachun saquin? b) ¿Salmo 9:​10-pica imatataj yachachin? (Notatapish ricui).

¹⁴ Ñaupa tiempopica Diosca paita sirvijcunata ama llaquichichun, ama huañuchichunmi cuidaj carca. Pero Bibliapica mana yuyashcapi llaquicunaca japijlla cashcatami nin (Eclesiastés 9:11). Satanás llulla cashcata ricuchingapajmi Jehová Diosca paita sirvijcunata catirashpa llaquichichun o hasta huañuchichun saquishca (Job 2:​4-6; Mateo 23:34). Diosca mana siemprechu ñucanchij llaquicunataca anchuchinga. Pero paita cꞌuyajcunataca manataj saquingachu. Chaitaca tucui shunguhuanmi crinchijd (Salmo 9:10).

JEHOVÁ DIOSMI CUSHICHIN

15. ¿Jehová Diosca ima shinataj ñucanchijtaca cushichin? (2 Corintios 1:​3, 4).

¹⁵ (2 Corintios 1:​3, 4-ta liyipai). Maipica llaquihuan cashpaca solollachari sintirinchij, pi mana intindishcatachari yuyanchij. Pero Jehová Diosca ñucanchijtaca allimi intindin. Paica ñucanchijtaca mana saquishcachu, “tucui ñucanchij llaquicunapimi” cushichishca. Chaimantami ñucanchijta animangapajca Bibliata, huauqui panicunatapish cushca. Shinallataj Diosta mañashpaca ‘pi mana intindipaj sumaj causaitami’ charinchij (Filipenses 4:​6, 7). Bibliata liyishpaca Jehová ñucanchijta cꞌuyashcatami ricunchij. Tandanacuicunapi Bibliapi tiyaj consejocunata yachashpaca animotami japinchij, huauqui panicunapish ñucanchijta cꞌuyashcatami ricuchincuna.

16. ¿Natanmanta, Priscilamantaca imatataj yachanchij?

¹⁶ Jehová Diosca Bibliata cushpami ñucanchijta cushichishca, animashca. Estados Unidospi causaj huauqui Natanmanta, paipaj huarmi Priscilamanta parlashun. Paicunaca achca huatacuna huashamanmi shujtaj ladopi huillanaman rircacuna. Natanca “Dios ñucanchijta bendiciana cashcatami confiarcanchij” ninmi. Pero mushuj congregacionman chayashpaca ungurcacuna, cullqui illajmi saquirircacuna. Chaimi paicunapaj llajtaman tigrarcacuna. Chaipipish cullqui illaimantami llaquicunata charirca. Natanca “Ñucami ima mana allita ruracuj yuyachini. Chaimi Diosca mana bendician nishpami yuyarcani” ninmi. Qꞌuipaca Dios paicunata mana saquishcata cuentata cushpami Natanca: “Bibliata liyishpami shuj alli amigo ñucanchijman consejota cucuj shina sintircanchij. Llaquicunallapi yuyanapaj randica Jehová ima shina ayudacushcatami cuentata curcanchij. Chaimi shamuj punllapipish Dios ayudanata seguro canchij” ninmi.

17. ¿Diosca pani Helgataca ima shinataj cushichirca? (Fotomantapish parlapai).

¹⁷ Huauqui panicunapishmi ñucanchijtaca animan. Hungría llajtapi causaj pani Helgaca achca huatacunatami problemacunahuan cashpaca desanimarishca sintirirca. Pero huauqui panicunahuan Jehová Dios ima shina cushichishcatami yuyarin. Helgaca: “Trabajomanta, ungushca huahuata cuidacushcamanta, shujtaj problemacunamantami fuerza illaj sintirij carcani. Cashna llaquicunahuan cajpipish cai último 30 huatacunataca cada punllami Jehová Diosca pai nishca shina ñucataca cuidashca. Achca cutincunami turi ñañacunaca sumaj shimicunahuan ñucataca animashcacuna. Ashtahuan minishticui horasmi shuj mensajeta o shuj tarjetata cachashcacuna” ninmi.

18. ¿Ima shinataj shujtajcunata cushichi tucunchij?

¹⁸ Ñucanchijpish Papito Dios shinami shujtajcunata cushichi tucunchij. Paicunata pacienciahuan uyashpa, cushichij shimicunata nishpa, ima pudishcata rurashpami ayudai tucunchij (Proverbios 3:27). Jehová Diosta manaraj sirvij gentecunatapishmi llaquicunahuan cajpica ayudai tucunchij. Paicuna ungushca cajpi, paicunapaj familia huañushca cajpica visitanaman rishpa, alli uyashpa, Bibliahuanmi animai tucunchij. ‘Tucuipi cushichij Diospaj’ ejemplota catishpaca mana ñucanchij huauqui panicunallatachu llaquicunata ahuantachun ayudashun. Ashtahuanpish Jehová Diosta mana rijsij gentecunapish Diosta rijsichunmi ayudashun (Mateo 5:16).

JEHOVÁ DIOSCA ÑUCANCHIJMANTAMI SUSTARIN

19. a) ¿Jehová Diosca ima shinataj ñucanchijtaca cuidan? b) ¿Ima shinataj paipaj ejemplota cati tucunchij?

¹⁹ Jehová Diosca ñucanchijtaca achcatami cꞌuyan. Chaimantami llaquicunahuan cajpica paica manataj saquinga. Diosca shuj yaya paipaj huahuata cꞌuyaihuan cuidaj shinami ñucanchijtaca cuidan, cushichin. Paica alli ñantami pushan, ima minishtishcatapishmi cun. Ñucanchijpish llaquicunahuan cajcunataca animashpami ayudai tucunchij. Diosca: “Ñuca canhuan cashcamanta ama manchaichu” ninmi (Isaías 41:10). Ima llaquihuan cashpapish mana ñucanchijllachu canchij. Ashtahuanpish Jehová Diosmi ñucanchij ladopi can. Chaimantami tranquilo sintirinchij.