Diosca tucui layami yallitaj llaquij cashcataca ricuchin

1. a) ¿Ima llaquicunahuantaj chꞌimbapurana canchij? b) ¿1 Pedro 5:​10-pica imatataj yachachin?

TUCUICUNAMI problemacunata charinchij. Maijancunaca ancha ungüitami charincuna. Shujtajcunaca familiacunatami huañuipi chingachishcacuna. Huaquincunatacarin paicunapaj familiami llaquichishcacuna, mana cashpaca gobiernocunami llaquichishcacuna (Mateo 10:​18, 36, 37). Cai tucui llaquicunata ahuantachunmi Jehová Diosca ayudanga. Chaitaca tucui shunguhuanmi crinchij (1 Pedro 5:​10-ta liyipai).

2. ¿Jehová Dios imata cujpitaj llaquicunata ahuantai tucunchij?

² ¿Llaquicuna tiyajpipish, contracuna llaquichijpipish, juchata rurana tentacioncuna ricurijpipish imatataj rurashpa catina canchij? Jehová Diosta sirvishpa, pai cusha nishcacunatapish yuyarishpami catina canchij. Chashnami cushilla llaquicunata ahuantashun. Shinapish ñucanchijca mana ñucanchij fuerzamantachu Jehová Diosta cushilla sirvishpa cati tucunchij. Ashtahuanpish Dios paipaj poderhuan ayudajpimi ñucanchijca Diosta sirvishpa cati tucunchij (2 Corintios 4:7). Cai yachaipica Jehová Dios cushca chuscu ayudacunamantami yachashun. Shinallataj Jehová Dios ayudachun ñucanchijpish imallata rurana cashcatami yachashun.

JEHOVÁ DIOSTA MAÑASHUNCHIJ

3. ¿Imamantataj Jehová Diosta mañanaca shuj bendición can?

³ ¿Imamantataj Jehová Diosta mañanaca shuj bendición can? Ñucanchij juchayujcuna cajpipish Jehová Diosca paita mañashpa paihuan parlanacuchunmi munan (Hebreos 4:16). Caipi yuyashun. Yayitu Jehová Dioshuanca ima horapish, maipi cashpapish, ima shimipipish, imamantapish parlai tucunchijllami. Ñucanchijlla cashpapish o carcelpi cashpapish paihuanca parlai tucunchijllami (Jonás 2:​1, 2; Hechos 16:​25, 26). Ñucanchij yallitaj sustarishca cashcamanta Yayitu Jehová Dioshuan mana achijta parlai tucujpipish paica ñucanchijtaca allimi intindin (Romanos 8:​26, 27).

4. ¿Llaquicunata charishpaca Jehová Diosca imata rurachuntaj munan?

⁴ Jehová Diosca llaquicunata ahuantangapaj paipaj ayudata mashcachunmi munan (1 Juan 5:14). Chaimantami 2 Crónicas 16:​9-pi nishca shinaca Jehová Diosca ‘paita tucui shunguhuan sirvijcunamanca fuerzata cusha nin’. Shinallataj Yayitu Diosca ñucanchijcuna llaquicunata ahuantajpica Diablo llulla cashcatami ricuchisha nin (Proverbios 27:11). Chaimi llaquicunata ahuantangapaj Jehová Dios ayudachun paita tucui shunguhuan mañarana canchij (Isaías 30:18; 41:10; Lucas 11:13).

5. ¿Tranquilo sintiringapajca imatataj rurana canchij? (Isaías 26:3).

⁵ Diosta mana sirvij gentecunaca problemacunata charishpaca tranquilo sintirinatami mashcancuna. Chaimantami ama yallitaj sustaringapajca mana imapi yuyasha nincuna. Chashna jahuapish mana de veras tranquilo sintirincunachu. Ashtahuancarin imapi mana yuyashcamantami demoniocunaca paicunata pandachi tucungacuna (Mateo 12:​43-45-ta ricui). Shinapish Diosta sirvijcunaca Jehovapi tucui shunguhuan confiashcamantami paipaj ayudata mashcanchij. Chaimantami Diosta mañashpaca ñucanchij preocupacioncunata paiman huillanchij. Chashna mañashcamantami ‘Jehová Diosca ñucanchij yuyaitapish, ñucanchij shungutapish huaquichin’ (Filipenses 4:7) (Isaías 26:​3-ta liyipai). ¿Ñucanchij tranquilo sintirichunca Jehová Diosca imatataj yuyachin? Cushichij versocunata yuyachishpami ñucanchijta animan. Chashna yuyachijpimi Jehová ñucanchijta cꞌuyashcata, ayudasha nishcatapish yuyarishun (Salmo 62:​1, 2).

6. ¿Llaquicunata charishpaca imacunallamantataj Yayitu Diosta mañai tucunchij? (Fotomantapish parlapai).

⁶ ¿Jehová ayudachunca imatataj rurana canchij? Ñucanchij llaquicunataca Jehová Diosta mañashpami paiman mingana canchij. Tranquilo sintiringapajpishmi paita ayudachun mañana canchij. Imata rurana cashcata yachangapajpishmi Diosta sabiduriata cuchun mañana canchij (Salmo 55:22; Proverbios 2:​10, 11). Chai llaqui horaspi Jehová Dios ñaupajman catichun ima shina ayudacushcatapishmi ricurana canchij (Salmo 16:​5, 6). Chashna ayudashcamantami Jehová Diosta pagui ninatapish manataj cungarishun (Filipenses 4:6).

BIBLIATA PUNLLANTA LIYISHUNCHIJ

7. ¿Bibliapica ima animachij yuyaicunataj tiyan?

⁷ Jehová Diosca llaquicunata ahuantachunca paipaj Shimitami ñucanchijman cushca. Chaipica animachij versocunami tiyacun. Por ejemplo, Mateo 6:​8-pica Jesusca: “Cancuna manaraj mañajpimi imata minishtishcataca cancunapaj Yayaca ña yachan” nircami. Jesusca Jehová Diosta alli rijsishcamantami chai shimicunata nirca. Chaimantami llaquicunata charishpaca Jehová Dios ayudana cashcata tucui shunguhuan crinchij (Salmo 94:19).

8. a) ¿Mateo 6:​34-pica imatataj yachachin? b) ¿Llaquicunata aguantangapajca imatataj punllanta rurana canchij?

⁸ Llaquicunata ahuantangapajca Bibliapi tiyaj yachachishcacunami alli decisioncunata japichun ayudan (Proverbios 2:​6, 7). Por ejemplo, Mateo 6:​34-pica caya punllamanta mana yallitaj sustarina cashcata, ashtahuanpish cada punlla charishca llaquicunallamanta sustarina cashcatami yachachin. Chaimantami cada punlla Bibliata liyina canchij. Imata liyishcapipishmi cutin cutin yuyana canchij. Chaimi llaqui horaspi cashpaca imata liyishcata yuyarishun.

9. ¿Llaqui horaspica imamantataj Diosta sirvijcunapi yuyana canchij?

⁹ Bibliapica ñucanchijcuna shina llaquicunata charij cꞌaricunamanta, huarmicunamantami parlan. Paicunaca Diospi confiashcamantami paipaj ayudata chasquircacuna (Hebreos 11:​32-34; Santiago 5:17). Paicunamanta yachashpaca Jehová Diospimi ashtahuan confiashun. Pai ‘ñucanchij muyundij pirca’ shina cashcatapishmi crishun (Salmo 46:1). Ashtahuancarin paicunapaj ejemplotami catinata munashun (Santiago 5:​10, 11).

10. ¿Pani María shinaca imatataj cada punlla rurana canchij?

¹⁰ ¿Jehová ayudachunca imatataj rurana canchij? Punllantami Bibliata liyina canchij. Animachij versocunata yuyaringapajpishmi shuj listapi anotashpa huaquichina canchij. Achca huauqui panicunapish animaringapajmi punllanta texto diariota liyincuna. Pani Mariacaa chaitami rurarca. Shuj punllaca paica paipaj yayapish, paipaj mamapish cáncer ungüita charishcatami yachaj chayarca. Chaimi paicunataca huañuna horascama huaquin quillacunata cuidashpa catirca. Pani Mariaca: “Cada tutamantami texto diariota liyishpa chaipi cutin cutin yuyaj carcani. Chaimi ñuca charishca llaquicunallapi mana yuyaj carcani. Ashtahuanpish Jehová Dios ñucata ayudanapi, paipaj sumaj yachaicunapimi ñuca yuyaita churaj carcani” ninmi (Salmo 61:2).

HUAUQUI PANICUNA AYUDACHUN SAQUISHUNCHIJ

11. ¿Ñucanchij huauqui panicuna llaquicunata ahuantashcata yachashpaca imamantataj animarinchij?

¹¹ Llaquicunata ahuantachunmi Jehová Diosca huauqui panicunata ñucanchijman cushca. Paicunapish ñucanchij shinami sinchi llaquicunata charincuna. Shinapish paicunaca chai llaquicunataca ahuantashpami catishcacuna (1 Pedro 5:9). ¿Manachu ñucanchijpish paicuna shina ima llaquicunatapish ahuantai tucushun? Ari. Ahuantai tucunchijmi (Hechos 14:22).

12. 2 Corintios 1:​3, 4-pi nishca shinaca ¿shujtajcuna llaquipi cajpica imatataj rurana canchij?

¹² Apóstol Pablopi yuyashun. Paitaca shuj huasipimi prezushpa churarcacuna. Chaimi huauqui panicunaca paita ayudarcacuna. Chashna ayudashcamanta, cushichishcamantami apóstol Pabloca huaquin cartacunapi paicunapaj shuticunata quillcashpa pagui nirca (Filipenses 2:​25, 29, 30; Colosenses 4:​10, 11). Cunan punllacunapish huauqui panicunaca ñucanchij ima llaquita charijpica utcami ayudancuna. Ñucanchijpish paicuna ayudachun minishtijpica tigrami ayudana canchij (2 Corintios 1:​3, 4-ta liyipai).

13. ¿Huauqui panicunaca ima shinataj pani Mayataca ayudarcacuna?

¹³ Rusia llajtamanta Maya shuti panimanta yachashun. 2020 huatapica policiacunaca paipaj huasiman yaicushpami tucui imalla tiyashcacunata mashcarcacuna. Qꞌuipaca cai panitaca predicashcamantami juicioman pusharcacuna. ¿Huauqui panicunaca cai panitaca ima shinataj ayudarcacuna? Pani Mayaca: “Shuj punllaca achca llaquillami carcani. Chashna llaquilla cajpimi ñucata achcata cꞌuyashcata ningapaj cayarcacuna, mensajecunatapishmi cacharcacuna. Chashna ayudashcamantami huauqui panicuna cꞌuyaj familia cashcata sintishcani” ninmi.

14. ¿Llaquicunahuan cashpaca imamantataj huauqui panicunamanta mana caruyana canchij? (Fotomantapish parlapai).

¹⁴ ¿Jehová ayudachunca imatataj rurana canchij? Problemacunata charishpaca huauqui panicunamantaca mana caruyanachu canchij. Ancianocunapish ñucanchijtaca siempremi ayudanata munan. Paicunaca jatun acapanamanta paca tucuna shinami can (Isaías 32:2). Shinallataj huauqui panicuna llaquicunata charijpica ñucanchijpish paicunatami tigra ayudana canchij. Chashna ayudashpami cushilla sintirishun, llaquicunatapishmi ahuantai tucushun (Hechos 20:35).

DIOS CUSHA NISHCA BENDICIONCUNAPI YUYASHUNCHIJ

15. a) ¿Jesusca jahua pachapi pai chasquina esperanzata charishcamantaca imatataj ahuantarca? b) ¿Ñucanchijpish Paraíso Allpapi para siempre causana esperanzata charishcamantaca imatataj ahuantashun? (Hebreos 12:2).

¹⁵ Jesusca jahua pachapi imata chasquina cashcata yuyaipi charishcamantami paita llaquichijpipish ahuantarca (Hebreos 12:​2-ta liyipai). Paica huañungacama Jehová Diosta tucuipi cazushpaca paipaj shutita jatunyachina cashcatami yacharca. Shinallataj Jesusca jahua pachapi paipaj Yayahuan cutin tupanacunatapishmi achcata munarca. Paipaj huauqui ungidocunahuan jahua pachamanta cai Allpata mandai callarinatapishmi munarca. Ñucanchijpish Paraíso Allpapi para siempre causana esperanzata mana cungarishpaca ima llaquicunatapish cushillami ahuantai tucushun (Romanos 15:13).

16. ¿Llaquicunata ahuantangapajca pani Ale shinaca imatataj rurana canchij?

¹⁶ Rusiamanta caj pani Alemanta yachashun. Paipaj cusataca Diosta sirvicushcamantami carcelpi churarcacuna. Pani Aleca: “Jehová Diosta tucui shunguhuan mañashcamanta, pai cusha nishcacunapipish cutin cutin yuyashcamantami cai llaquitaca ahuantai tucuni. Cai llaquicunaca ñallami tucuringa. Jehová Diosca paipaj contracunata tucuchishpami ñucanchijtaca quishpichinga” ninmi.

17. ¿Jehová Dios cusha nishca bendicioncunamanta pagui nishcata ricuchingapajca imatataj rurana canchij? (Fotomantapish parlapai).

¹⁷ ¿Jehová ayudachunca imatataj rurana canchij? Ñallami Yayitu Jehová Diosca cai Allpataca sumaj Paraisota ruranga. Chaimanta pai cusha nishca bendicioncunapi yuyangapaj tiempota llujchishunchij. Chaicunapi yuyashpami ima llaquicuna ricurijpipish chaicunaca ‘ashacamalla, apanalla’ canga (2 Corintios 4:17). Caipipish yuyashunchij. Gentecunaca Dios cusha nishca bendicioncunata mana yachashcamantami llaquicunata charishpaca dimastij sufrincuna. Ama yallitaj sufrichun chai gentecunaman Dios cusha nishca bendicioncunamanta parlashunchij.

18. ¿Dios cusha nishcacunapica imamantataj crinchij?

¹⁸ Jobca achca llaquicunata ahuantashca qꞌuipami Jehová Dios pai cusha nishcacunata pajtachi tucushcata intindirca. Chaimi paica Jehová Diostaca: “Ñucaca cantaca tucuita rurai tucuj cashcatami yachani. Cambaj yuyaimantaca imapish mana pacalla cai tucunchu” nircami (Job 42:2). Ñucanchijpish Jehová Dios tucuita pajtachi tucushcatami crina canchij. Caipi yuyashun. Ancha ungushca shuj huarmica achca doctorcunapajmanmi rishca. Pi mana ayudai tucushcamantami paica achca llaquilla sintirin. Shinapish shuj alli doctorpajman chayajpica chai doctorca ima shina jambirinatami huillan. Alliyana cashcata yachashcamantami chai huarmica ungushca cashpapish chai llaquitaca cushilla ahuantan. Ñucanchijpish Paraíso allpa tiyana cashcata crishcamantami ima llaquicunatapish cushilla ahuantai tucunchij.

19. ¿Llaquicunata ahuantangapajca imacunatataj rurana canchij?

¹⁹ Cai yachaipi ricushca shinaca llaquicunata ahuantangapajca Yayitu Diostami mañana canchij, Bibliatapishmi punllanta liyina canchij, huauqui panicuna ayudachunpishmi saquina canchij, Dios cusha nishcacunatapishmi cutin cutin yuyarina canchij. Chaicunata rurajpillami Yayitu Diosca cai tucuri punllacunapi llaquicunata ahuantachun ayudashpa catinga. Shamuj punllacunapipish tucui llaquicunatami tucuchinga (Filipenses 4:13).