Jehová Diosca cantaca cꞌuyantajmi

1. ¿Imamantataj Jehová Diostaca tucui vidami sirvisha nishpa ari nircangui? (Fotomantapish parlapai).

¿CANTACA tucui vidami sirvisha nishpa Jehová Diosman ari nishca punllata yuyaringuichu? Diosta rijsishcamanta paita tucui shunguhuan cꞌuyashcamantami chai desicionta agllarcangui. Chaimantami paitaca: “Tucui shunguhuan, tucui almahuan, tucui yuyaihuan, tucui fuerzahuan cꞌuyasha” nircangui (Marcos 12:30). Chai punllamantami Jehová Diostaca ashtahuan ashtahuan cꞌuyai callarircangui. Chaimi pi canta: “¿Canca Jehová Diosta cꞌuyanguichu?” nishpa tapujpica, “¡ari tucuicunamanta yallica Jehová Diostami cꞌuyani! nishpaca cutichinguiman”.

2, 3. a) ¿Jehová Diosca Apóstol Pablo shina imatataj crichun munan? b) ¿Cai yachaipica imatataj yachashun? (Jeremías 31:3).

² Pi canta: “¿Jehová Dios canta cꞌuyashcata segurochu cangui?” nishpa tapujpica. ¿Imatataj cutichinguiman? Chaitaca cutichinaca maipica sinchi chari canga. Ñucanchijpish shuj pani sintirishca shina chari sintirinchij. Chai panica: “Ñucaca Jehová Diostaca cꞌuyanimi. Pero, ¿pai ñucata cꞌuyanchu o manachu cꞌuyan? nishpami achca cutin tapurini” nircami.

³ Jehová Diosca can paipaj amigo cachunmi munarca. Chaimantami cantaca paipaj puebloman pushamurca. Cambaj causaita paiman mingarijpi, bautizarijpicarin Jehová Diosca paipaj mana tucuri cꞌuyaitami canman ricuchi callarirca (Jeremías 31:​3-ta liyipai). Jehová Diosca tucui paita sirvijcunaman canmanpishmi chai cꞌuyaita ricuchin. Chaimantami paipajca canca “achca valishca” cangui (Malaquías 3:17). Jehová Diosca pai ñucanchijta tucui shunguhuan cꞌuyashcataca Apóstol Pablo shina crichunmi munan. Apóstol Pabloca: “Ñucaca tucui shunguhuanmi crini huañuipish, causaipish, angelcunapish, gobiernocunapish, cai punlla tiyashcacunapish, shamuj punlla tiyanacunapish, poderyujcunapish, jahuaman ima cajpish, ucujman ima cajpish, ima shujtaj rurashcacunapish Diospaj cꞌuyaimantaca manataj caruyachi tucungachu” nircami (Romanos 8:​38, 39). Cai yachaipica Jehová Dios ñucanchijta cꞌuyashcata imamanta seguros cana cashcatami yachashun. Jehová Dios ñucanchijta cꞌuyashcata cringapaj imata rurana cashcatapishmi yachashun.

¿JEHOVÁ DIOS ÑUCANCHIJTA CꞌUYASHCATACA IMAMANTATAJ CRINA CANCHIJ?

4. a) ¿Diabloca imatataj crichisha nin? b) ¿Diablo ñucanchijta ama pandachichunca imatataj rurana canchij?

⁴ Jehová Dios ñucanchijta cꞌuyashcata tucui shunguhuan crishpaca Diablo pandachichunca mana saquishunchu (Efesios 6:11). Diabloca Jehová Dios ñucanchijta mana cꞌuyashcatami crichisha nin. Bibliapica Diablotaca shuj leonhuanmi chꞌimbapuran (1 Pedro 5:​8, 9). Leoncunaca irquilla, sololla caj animalcunata japishpami micuncuna. Chashnallatajmi Diabloca ñucanchijcuna ima shina huiñashcamanta, ima problemacunata charishcamanta, llaquilla, sololla cajta ricushpa ñucanchijta pandachisha nin (Proverbios 24:10). Diablo ñucanchijta ama pandachichunca Jehová Dios ñucanchijta tucui shunguhuan cꞌuyashcatami crina canchij. Chashnami Diablopaj “contra shayarishun” (Santiago 4:7).

5. ¿Jehová Dios ñucanchijta cꞌuyashcata seguros cashpaca imatataj rurashun?

⁵ Jehová Dios ñucanchijta cꞌuyashcata tucui shunguhuan crishpaca paipajmanmi ashtahuan cꞌuchuyashun. Pi ñucanchijman cꞌuyaita ricuchijpica paitapishmi cꞌuyai callarinchij. Chashnallatajmi Jehová Dios ñucanchijta cꞌuyashcata, valorashcata seguros cashpaca paitaca ashtahuan cꞌuyashun (1 Juan 4:19). Yayitu Diosta ashtahuan cꞌuyajpica paipishmi ñucanchijta ashtahuan cꞌuyanga. Santiago 4:​8-pica: “Diospajman cꞌuchuyaichij paipish cancunapajman cꞌuchuyangami” ninmi. Cunanga Jehová Dios ñucanchijta cꞌuyashcata seguros cangapaj imata rurana cashcatami ricushun.

¿JEHOVÁ ÑUCANCHIJTA CꞌUYASHCATA CRINGAPAJCA IMATATAJ RURANA CANCHIJ?

6. ¿Jehová Dios canta cꞌuyashcata mana seguros cashpaca imatataj rurana cangui?

⁶ Jehová Dios ñucanchijta imamanta cꞌuyashcata intindingapaj paita cutin cutin mañai (Lucas 18:1; Romanos 12:12). Maipica ñucanchijca tucuipi pandarijlla cashcatami sintinchij. Chashna sintirishpaca Jehová Dios ñucanchij shunguta alli rijsij cashcatami yuyarina canchij (1 Juan 3:​19, 20). Yayitu Diosca can rijsirishcatapish yallimi cantaca alli rijsin. Shinallataj can paita cꞌuyashcata, paita tucui shunguhuan sirvisha nishcatapishmi yachan (1 Samuel 16:7; 2 Crónicas 6:30). Chaimanta can ima shina sintirishcata, can imata yuyashcata paiman parlai. Pai canta cꞌuyashcata seguros cangapajpish ayudachun mañai (Salmo 62:8). Jehová Dios ñucanchijta cꞌuyashcata seguros cangapaj imata ashtahuan rurana cashcata ricushun.

7, 8. ¿Maijan versocunapitaj Jehová Dios ñucanchijta cꞌuyashcata ricuchin?

⁷ Jehová Dios: “Canta cꞌuyanimi” nishcapi confiai. Jehová Diosca paipaj shimipimi pai ñucanchijta cꞌuyashcata, ñucanchijmanta sustarishcata quillcachirca. Por ejemplo, rey Davidca sumaj shimicunatami nirca. Paica: “Mandaj Diosca shungupi llaquilla cajcunapaj cꞌuchullapimi. Espiritupi llaquilla cajcunata quishpichinmi” nircami (Salmo 34:18). Can llaquilla sintirishpaca cantaca pi mana intindishcata, pi mana ayudai tucushcatachari yuyangui. Pero Jehová Diosca chai llaqui horaspimi cantaca ayudasha nin. Salmo 56: 8-pipish Rey Davidca: “Ñuca huiquicunatapish quiquinllatajmi vidrio huallupi churashpa charicungui” nircami. Ñaupa tiempopica viajajcunaca huallupimi yacuta apajcuna carca. Chai yacuca achca valishcami carca. Chashnallatajmi can ima llaquita apacujpica Yayitu Diosca canmanta sustarin. Paica cambaj cada huiqui shutushcata huallupi huaquichij shinami yuyarin. Shinallataj rey Davidca Jehová Diostaca: “Tucui ñuca ñancunatami quiquinca alli rijsingui” nircami (Salmo 139:3). Jehová Diosca tucui ñucanchij ñancunata o ñucanchij tucui rurashcacunatami ricun. Pero paica ñucanchijta cꞌuyashcamantami, ñucanchij alli ruraicunallata ashtahuantajca yuyarin (Hebreos 6:10).a

⁸ Cai sumaj versocunahuanmi Yayitu Jehová Diosca: “Cantaca achcatami cꞌuyani. Canmantaca sustarinimi” nicushca laya can. Pero Diabloca Jehová Dios canta mana cꞌuyashcatami crichisha nin. Chaimanta: “¿Pitataj crina cani? ¿Llullapaj yaya Diablota o mana llullaj Diosta?” nishpa tapuri (Juan 8:44; Salmo 31:5).

9. ¿Éxodo 20:​6-pica Jehová Diosca imatataj nin?

⁹ Jehová Dios paita sirvijcunata cꞌuyashcata yuyari. Por ejemplo, Éxodo 20:​5, 6-pi Jehová Dios Moisesman, israelitacunamanpish ima nishcapi yuyai (Éxodo 20:​5, 6-ta liyipai). Cai versopi nishca shinaca Yaya Diosca paita cꞌuyajcunamanca mana tucurij cꞌuyaitami ricuchin (Nehemías 1:5). Can Yaya Diosta tucui shunguhuan cꞌuyashcamantami paipish cantaca achcata cꞌuyan. Chaitaca amataj cungaringuichu (Daniel 9:4; 1 Corintios 8:3).

10, 11. ¿Gálatas 2:​20-pi nishcacunataca Jehová Diosca imamantataj quillcachirca?

¹⁰ Jesús canmanta huañushcapi yuyai. Jehová Diosca shuj valishca regalota cuj shinami ñucanchijmanta huañuchun paipaj churita cai allpaman cacharca (Juan 3:16). Ashtahuantajcarin canta cꞌuyashcamantami canmanta huañuchun paipaj churita cacharca. Apóstol Pablopi yuyai. Pai manaraj Jesusta catij cashpaca millai cosascunatami ruraj carca. Ña Jesusta cati callarishpapish pai imapi pandarishcacunahuanmi chꞌimbapurana carca (Romanos 7:​24, 25; 1 Timoteo 1:​12-14). Shinapish Pabloca Jehová Dios paita cꞌuyashcamanta, paipaj churi paimanta huañuchun cachashcatami tucui shunguhuan crirca (Gálatas 2:​20-ta liyipai). ¿Gálatas 2:​20-pi nishcacunataca Jehová Diosca imamantataj quillcachirca? Jesús canmantapish huañushcata yuyarichunmi chaitaca quillcachirca. Canta cꞌuyashcamanta chai valishca regalota cushcatami yuyarina cangui. Chaita yuyarishpami Jehová Dios canta tucui shunguhuan cꞌuyashcata cringui (Romanos 15:4).

¹¹ Jehová Dios paipaj churita ñucanchijmanta huañuchun cachashcamantami paitaca achcata agradicinchij. Pero Jesusca mana chaillamantachu cai pachamanca shamurca. Ashtahuanpish Jehová Dios ñucanchijta achcata cꞌuyashcata huillangapajmi shamurca. Cunanca Jesús imata yachachishcamanta ricushun (Juan 18:37).

JEHOVÁ DIOS CANTA CꞌUYASHCATAMI JESUSCA YACHACHIRCA

12. ¿Imamantataj Jesús yachachishcacunapi confiai tucunchij?

¹² Jesusca jahua pachapimi Jehová Dioshuan achca tiempota causarca. Chaimantami paitaca ashtahuan alli rijsin (Colosenses 1:15). Jehová angelcunatapish, paita sirvijcunatapish achcata cꞌuyashcatami Jesusca ricushca. Chaita ricushcamantami pai cai allpapi cashpaca Jehová Dios cꞌuyaj cashcata yachachishpa cushilla sintirij carca (Lucas 10:22). Chaimantami Jesús yachachishcacunapi confiai tucunchij.

13. ¿Jesusca Jehová Dios ima shina cashcata ricuchuntaj munan?

¹³ Jesusca Jehová Dios shuj cꞌuyaj Yaya cashcatami ricun. Paica ñucanchijpish chashnallataj ricuchunmi munan. Mateomanta, Juancamaca Jesusca 160 yalli cutincunami Jehová Diostaca “Yaya” nij carca. Paita catijcunamanpish “cancunapaj Yaya” nishpami yachachij carca (Mateo 5:16; 6:26). Mateo 5:​16-pi tiyaj notapica: “‘Ñaupa tiempopica Diosta sirvijcunaca Jehová Diostaca tucui poderta charij Dios, jatun Dios, tucuita ruraj Dios’ nijcunami carca. Pero Jesusca Jehová Diostaca ñucanchij ‘Yaya’ nijmi carca. Chashna nishpaca Jehová shuj cꞌuyaj Yaya shina ñucanchij cꞌuchullapi cashcatami yachachisha nirca” ninmi. Cunanca Jehová Dios shuj cꞌuyaj Yaya cashcata ricuchingapaj Jesús imata nishcata yachashun.

14. ¿Jesusca Mateo 10:​29-31-pica imatataj yachachirca? (Fotomantapish parlapai).

¹⁴ Jehová Diospaj ñucanchij achca valishca cashcata crichunmi Jesusca munan. Mateo 10:​29-manta-31-cama Jesús ima nishcata ricushun. Chai versopica Jesusca pajaritocuna Diosta mana cꞌuyajpipish, mana sirvijpipish, Jehová Dios chai pajaritocunamanta preocuparij cashcatami nirca. Chaita yachashpami paita cꞌuyashpa sirvijcunamantacarin Jehová Dios achcata preocuparishcata intindinchij. Shinallataj versículo 30-pica: “Cancunapaj umapi mashna ajchacuna tiyashcatapish paica allimi yachan” ninmi. Cai versopi nishca shinaca Jehová Diosca ñucanchijtaca allimi rijsin. Ñucanchijmantaca achcatami preocuparin.

15. ¿Juan 6:​44-pi Jesús nishcacunamantaca imatataj yachanchij?

¹⁵ Cunanca Juan 6:​44-pi Jesús ima nishcata ricushun. Chaipica Jesusca: “Cambaj Yaya Jehová Dios cambaj shungu alli cashcata ricushpami paipajman pusharca” nircami (Juan 6:​44-ta liyipai; Hechos 13:48). Chashna nishpami Jeremías 31:​3-pi imalla nishcata nicushcanga. Chai versopica: “Ñucaca cantaca huiñaita mana tucurij cꞌuyaihuanmi cꞌuyani. Chaimantaca cantaca llaquicunillami” ninmi. (Oseas 11:​4-tapish ricui). ¿Jesús nishcacunamantaca imatataj yachanchij? Jehová Diosca canta cꞌuyashcamantami canpica allicunallata ricun.

16. a) ¿Jesusca Jehová Diosmantaca imatataj yachachisha nin? b) ¿Jehová Dios ñucanchijta cꞌuyashcata seguros cangapajca ima librotataj estudiai tucunchij? (“Jehová Diosca tucuicunamanta yalli cꞌuyaj Yayami can” nishca recuadrota ricui)

¹⁶ Cai tucui versocunahuanca Jesusca: “Canmanca Jehová Diosca mana ñuca Yayallachu can. Cambaj Yayapishmi can. Paica cantaca achcatami cꞌuyan. Canmantaca dimastijmi preocuparin” nicushca layami can. Chaimanta Jehová Dios canta cꞌuyashcata mana crishpaca Jesús ima nishcata yuyari. Jesús verdadta nicushcatapish cri. Paica ñucanchij Yaya Jehová Diostaca allimi rijsin (1 Pedro 2:22).

JEHOVÁ DIOS CANTA CꞌUYASHCATA CADA PUNLLA YUYARI

17. ¿Imamantataj Jehová Dios canta cꞌuyashcata cada punlla yuyarina cangui?

¹⁷ Diabloca jatun llullajmi can. Paica Jehovamanta caruyachingapajmi Diosca cantaca mana cꞌuyanchu nishpami crichisha nin. Chaimanta Diablo nishcata ama cringapajca Jehová Dios canta cꞌuyashcata cada punlla yuyarishpa cati (Job 27:5).

18. ¿Jehová Dios canta cꞌuyashcata seguro cangapajca imallatataj rurana cangui?

¹⁸ Cai yachaipica Jehová Dios ñucanchijta cꞌuyashcata tucui shunguhuan cringapaj imallata rurana cashcatami yachashcanchij. Por ejemplo, Jehová Dios canta cꞌuyashcata seguro cangapaj ayudachun cutin cutin mañai. Jehová Dios paita sirvijcunaman cꞌuyaita ricuchij versocunatapish yuyari. Shinallataj can Jehová Diosta cꞌuyajpica cantapish pai cꞌuyanata manataj saquina cashcapi yuyari. Canta cꞌuyashcamanta Jehová Dios paipaj churita canmanta huañuchun cachashcataca amataj cungaringuichu. Jesús nishca shinaca Jehová Diosca cambaj Yayami can. Shinaca pi: “¿Jehová Dios canta cꞌuyashcata cringuichu?” nishpa tapujpica, “¡Ari, crinimi ñucapish Jehová Diosta cꞌuyashcata ricuchingapajmi punllata esforzarini!” nishpa cutichi.