Bibliata alli estudiangapajca ¿imatataj rurana canchij?

JOSUECA israelitacunatami Dios cusha nishca llajtaman pushana carca. Chaita ruranaca sinchimi cashcanga. Pero Jehová Diosca ama manchaichu nishpami paitaca animachirca. Shinallataj ñuca mandashcacunata leyishpa, chaitataj pajtachishpaca alli decisioncunatami japingui, shinami tucui can rurashcacunaca alli llujshinga nircami (Josué 1:7, 8).

Llaqui punllacunapi causacushcamantami sinchi problemacunahuan chꞌimbapurana canchij (2 Timoteo 3:1). Pero Josueman Jehová ima nishcata ñucanchijpish pajtachijpica ima ruraicunapish allimi llujshinga. Chaimantami Bibliata cada punlla leyishpa, chaipi imalla nishcata pajtachishpaca alli decisioncunata agllashun.

Achcacunaca Bibliata ima shina estudianataca mana yachanchijchu. Huaquincunacarin mana ni siquiera munanchu. Pero Bibliata estudianaca importantemi can. Chaimantami “Alli estudiangapaj yuyaicuna” nishca cuadrota repasai pudinchij. Chaipimi alli yuyaicunata tarishpa Bibliataca alli estudiashun, estudiacushpapish cushillami sintirishun.

Shuj salmistaca: “Quiquin mandashcacunapaj ñanpi pushahuayari. Chaicunata pajtachina munaillami cani” nircami (Salmo 119:35). Canpish sumajtami Diospaj Shimimanta yachai pudingui. Yachanata mana saquishpaca achca valishca yuyaicunatami taringui.

Canca manachari Josué shina shuj llajtata pushana cangui. Pero problemacunatami chꞌimbapurana cangui. Chaimanta Josué shina Diospaj Shimimanta yachashpa ima yachashcatapish cambaj causaipi pajtachi. Chaita rurashpaca alli decisioncunatami japingui. Can rurashcacunapish allimi llujshinga.