Politicocunaca Armagedón ñalla chayamunatami huillacuncuna | ¿Bibliaca caimantaca imatataj huillan?

Lunes 10 de octubre de 2022-pica Rusiamanta Ucraniapi saquirij huaquin llajtacunamanmi jatun bombacunata shitarcacuna. Ishqui punllacuna huashaman Crimeamanta Rusiacama apaj puenteta rupachishcamantami Rusia llajtata mandajca chashna tigra llaquichirca. Cai tucui manaraj pasajpica huaquin politicocunaca Armagedón ñalla chayamunatami huillacurcacuna.

•  6 de octubre de 2022-pica Estados Unidos llajtata mandaj Joe Bidenca: “Estados Unidos llajtata Kennedy mandacujpi, crisis de los misiles en Cuba nishca punllacuna tiyajpimi Armagedón ña chayamucushcata yuyarcanchij [chai punllacunapica Unión Soviética ordenashcamantami Cubaca Estados Unidosman jatun bomba nuclearcunata cachanata munarcacuna]. Pero cai tiempopimi Armagedón chayanapaj ashtahuan cꞌuchullapi canchij. Armas nucleares nishcacunahuan macanacui callarijpica Armagedón punllacuna ña chayamucushcatami crinchij” nircami.

•  Ucrania llajtata mandajtaca, ¿armas nucleares nishcacunata utilizashpaca imataj tucunga? nishpa tapujpimi paica caita cutichirca: “Cunan tiempopi imalla pasacushcata ricushpaca Armagedón ñalla callarigrishcatami crini. Cai laya macanacuicunaca tucuicunatami llaquichi tucun” nircami (BBC News, 8 de octubre de 2022).

¿Armas nucleares nishcacunahuan macanacui callarishcamantachu Armagedonca callaringa? ¿Bibliaca imatataj yachachin?

¿Armas nucleares nishcacunata utilizashcamantachu Armagedonca callaringa?

Mana. Bibliapica Armagedón shimica shuj cutinllami ricurin. Chaica Apocalipsis 16:16-pimi can. Cai shimica gobiernocunapura macanacunataca mana ricuchinchu. Ashtahuanpish Yaya Dios ‘tucui muyundij allpamanta mandajcunahuan’ macanacuna cashcatami ricuchin (Apocalipsis 16:14). Armagedón macanacuipimi Yaya Diosca cai allpata tucui mandajcunata tucuchinga (Daniel 2:44).

Armagedón macanacuipi cai allpa ima tucuna cashcata ashtahuan yachasha nishpaca españolpi “¿Que es el Armagedón?” nishca yachaita ricui.

¿Armas nucleares nishcacunahuan macanacushcamantaca cai allpapish, gentecunapish tucuringachu?

Mana. Tal vez gobiernocunaca cai armas nucleares nishcacunata utilizashpami macanacungacuna. Pero Diosca cai allpa tucuchishca cachunca mana saquingachu. Bibliapica caitami nin:

•  “Cai allpaca huiñai huiñaitami tiyashpa catinga” (Eclesiastés 1:4, La Biblia. Traducción del Nuevo Mundo, NWT).

•  “Cashcata rurajcunallami Dios cusha nishca allpataca japingacuna. Huiñai huiñaitami chaipi causangacuna” (Salmo 37:29, NWT).

Bibliapi tiyaj profeciacunata ricushpa, cai allpapi imalla pasashcacunata ricushpaca cai causai ñalla cambiana cashcatami intindinchij (Mateo 24:3-7; 2 Timoteo 3:1-5). Shamuj punllacunamanta Biblia imata yachachishcata yachasha nishpaca ñucanchijhuan Bibliamanta gratis yachai.