Testigo de Jehovacunaca ¿imamantataj Navidadta mana rurancuna?
Llullacuna, verdad
Llulla: Testigo de Jehovacunaca Jesuspi mana crishcamantami Navidadta mana rurancuna.
Verdad: Jesusta catijcunami canchij. Paimanta quishpirinataca tucui shunguhuanmi crinchij (Hechos 4:12).
Llulla: Testigocunaca Navidad fiestata mana ruranachu canguichij nishpami familiacunata chˈicanyachin.
Verdad: Ñucanchijpajca familiacunaca achca valishcami can. Ashtahuanpish familiapura alli apanacungapajmi Diospaj Shimihuan ayudanchij.
Llulla: Testigocunaca Navidadta mana rurashpaca caishujmanta chaishujmanta caranacushpa, cushilla pasanatami pirdincuna.
Verdad: Ñucanchijca tucui punllacunami tucuicunahuan alli apanacushpa, caranacushpa, cushilla causangapajmi esforzarinchij (Proverbios 11:25; Romanos 12:18). Por ejemplo, tandanacuicunapi, huillanaman llujshishpapish cullquita mana mañanchijchu. Jesús mandashcatami pajtachinchij. Paica cashnami nirca: “Chashna rurai tucushcataca, ñuca cujllapimi charinguichij. Chaimanta cancunapish ama cullqui jahua chaicunataca ruranguichijchu” (Mateo 10:8, Biblia Quichua de Chimborazo, 1989). Ashtahuanpish Diospaj Reinollami cushi causaita apamunga nishpami huillanchij (Mateo 10:7).
¿Testigo de Jehovacunaca imamantataj Navidadta mana rurancuna?
Jesusca pai huañushca punllatami yuyarichun nirca, mana pai huacharishca punllataca (Lucas 22:19, 20).
Apostolcunapish, Jesusta punta catijcunapish Navidadtaca mana rurajcunachu carca. Diccionario del cristianismo nishca shinaca cai fiestaca más o menos 330 huatapimi Roma llajtapi tiyai callarirca. Jesuspaj último apóstol huañushcamanta 200 huata huashami callarirca.
Bibliapica Jesús 25 de diciembrepi huacharishcataca mana huillanchu. Shinallataj ima quilla, ima punlla huacharishcatapish mana ninchu.
Panda costumbrecunata catij gentecunami Navidad fiestataca callarichirca. Chaimantami Jehová Diosca chai fiestata mana chasquin (2 Corintios 6:17).
Testigo de Jehovacunaca ¿imamantataj shujtaj gentecuna shina mana rurancuna?
Achca gentecuna Bibliapi Navidad mana tiyashcata, panda costumbrecunata catijcuna callarichishcatapishmi yachancuna. Shina cajpipish paicunaca,”tucuicuna chaita rurajpica ¿ima nishpataj ñucanchijpish chaita mana rurashun? Mana ima malochu can” nishpami yuyancuna.
Gentecuna ñucanchijmanta alli yuyachunmi munanchij. Pero tucuimanta yallica Bibliapi tiyaj mandashcacunatami cazusha ninchij. Bibliapica manaraj ima decisioncunata agllashpa alli yuyarichij ninmi (Romanos 12:1, 2). Diospaj nishcacuna achca valishca cashcatapishmi yachachin (Juan 4:23, 24).
Ñucanchijca Navidad fiestataca mana ruranchijchu. Pero chai fiestata rurachunpish mana pita jarcanchijchu. Chaitaca cada unomi decidina can.