¿Testigo de Jehovacunaca paicuna rurashca Bibliata charinchu?
Testigo de Jehovacunaca Bibliata estudiangapajca chꞌican chꞌican traduccioncunata ricushpami estudiancuna. Pero La Biblia. Traducción del Nuevo Mundo Bibliatami ashtahuan yachanata munancuna. Cai Bibliaca chꞌican chꞌican shimicunapimi tiyan. Diospaj shutitapish charin. Mana pandarinchu, claritotapishmi yachachin.
Diospaj shutitami charin. Bibliata rurajcunaca mana tucuicunachu Diosta jatunyachincuna. Por ejemplo, shuj Bibliataca 70 yalli gentecunami rurarcacuna. Chaipica paicunapaj shuticunatami churashcacuna. Pero chai Bibliapica Diospaj shutitaca shuj cutinllapish mana churashcacunachu.
Cutin La Biblia. Traducción del Nuevo Mundo Bibliapica maipimi ñaupa quillcashcacunapi Diospaj shuti ricurin chashnallatajmi churashcacuna. Shinallataj chai Bibliata rurajcunapaj shuticunataca mana churashcacunachu. Chashnami Diospaj shutita jatunyachincuna.
Mana pandarin. Mana tucui Bibliacunapichu punta quillcashca shina traducishca can. Por ejemplo, shuj Bibliapica Mateo 7:13-pica: “Quichqui punguta yaicuichij. Ucu pachaman yaicuna punguca jatunmi, ñanpish purinalla jatunmi. Achcacunami chaita nishpa yaicuncuna” ninmi. Cai versota traducijcunaca millaicuna infiernoman rijcuna cashcatami crijcuna carca. Pero ñaupa quillcashcacunapica mana ninchu millaicuna “ucu pachaman o infiernoman” rina cashcata. Chaimantami La Biblia. Traducción del Nuevo Mundo Bibliapica ñaupa quillcashca laya traducircacuna. Cai versopica millaicunaca huañuimanmi ringa ninmi.
Claritomi yachachin. Shuj Bibliata alli traducingapajca mana panda yuyaicunata, intindirinalla shimicunatami charina can. Por ejemplo, Mateo 5:3 versotaca huaquin Bibliacunaca ima shina traducishcata ricushun. Shuj Bibliapica Mateo 5:3-pica: “Espiritupi huajcha cajcunaca cushichishcami. Jahua pachamanta mandanaca ñami paicunapi mandacun” ninmi. Cai versota gentecuna liyishpaca mana jahualla intindincunachu. Chaimantami Traducción del Nuevo Mundo Bibliapica: “Diosmanta yachana munaita yuyaipi charijcunaca cushicuncunami. Jahua pacha Gobiernoca paicunapajmi canga” ninmi.
La Biblia. Traducción del Nuevo Mundo Bibliata traducijcunaca Diospaj shutita respetashpami churashcacuna. Panda yuyaicunata mana churashcacuna. Intindirinalla shimicunatami churashcacuna. Cai Bibliataca gentecunamanmi gratis cunchij. Chaimantami huaranga huaranga gentecunaca cai Bibliata paicunapaj propio shimipi liyi tucuncuna.