¿Alli religiontaca ima shinataj yachai tucunchij?
Bibliaca caitami yachachin
Bibliapica maijan religión alli cashcata intindichingapajca cai chꞌimbapuraitami churan. Mateo 7:16-pica: “Paicunataca granota pꞌucujta ricushpa pi cashcata rijsinguichij. Uvastaca casha yurapichari tandanguichij. Higotapish abrojo cashapichari tandanguichij” ninmi. Shuj yura ima laya granoshcata ricushpaca ima laya yura cashcatami yachai tucunchij. Shinallatajmi shuj religión alli cashcata o mana alli cashcata yachangapajca paicunapaj ruraicunata ricuna canchij.
Alli religionca runacuna yachachishcataca mana catinchu. Ashtahuanpish Biblia yachachishcacunatami pajtachin (Juan 4:24; 17:17). Por ejemplo, almamanta, paraíso Allpapi huiñaita causanamantami Biblia ima nishcata yachachin (Salmo 37:29; Isaías 35:5, 6; Salmo 22:20, Biblia en Quichua Chimborazo, 2010). Shinallataj panda religioncunapaj yachachishcacuna llulla cashcataca Bibliahuanmi yachachin (Mateo 15:9; 23:27, 28).
Alli religionca Diosta alli rijsichun, paipaj shuti Jehová cashcata yachachunmi ayudan (Salmo 83:18, La Biblia. Traducción del Nuevo Mundo, NWT; Isaías 42:8, NWT; Juan 17:3, 6, NWT). Shinallataj Dios ñucanchijpaj amigo tucusha nishcata, mana carupi cashcatami yachachin (Santiago 4:8).
Alli religionca Yaya Dios gentecunata quishpichingapaj Jesusta cachashcatami yachachin (Hechos 4:12). Shinallataj Jesús mandashcatami cazun. Paipaj ejemplota catingapajpishmi esforzarin (Juan 13:15; 15:14).
Alli religionca Diospaj Reino o Diospaj Gobiernolla sumaj causaita apamunatami crin. Chaimantami alli religionta catijcunaca Diospaj Reinomanta shujtajcunaman huillancuna (Mateo 10:7; 24:14).
Alli religionca shujtajcunata cꞌuyachunmi yachachin (Juan 13:35). Shinallataj ima raza cajpi, mai llajtamanta cajpi, ima shimita parlajpipish tucuicunatami respetanata yachachin (Hechos 10:34, 35). Alli religionta catijcunaca tucuicunata cꞌuyashcamantami guerramanpish mana rincuna (Miqueas 4:3; 1 Juan 3:11, 12).
Alli religionta pushajcunaca Bibliamanta yachachingapajpish cullquitaca mana cobrancunachu. Paicunaca shujtajcuna jatunyachichun o ima titulopi cayachunpish mana munancunachu (Mateo 23:8-12; 1 Pedro 5:2, 3).
Alli religionta catijcunaca politicapica mana chagrurinchu (Juan 17:16; 18:36). Politicahuan mana chagrurishpapish autoridadcunatami respetancuna, cazuncuna. Shinallataj Marcos 12:17-pi nishcatami pajtachincuna. Chaipica: ‘Cesarpajtaca o autoridadpajtaca paiman cuichij, Taita Diospajtaca Taita Diosman cuichij’ ninmi (Romanos 13:1, 2).
Alli religionta catijcunaca Biblia ima nishcatami paicunapaj causaipi pajtachincuna. Shujtajcuna ricuchunllaca Diostaca mana adorancunachu (Efesios 5:3-5; 1 Juan 3:18). Paicunaca Diosta sirvinataca shuj cargata shinapish mana ricuncunachu. Ashtahuanpish contentarishpami sirvincuna (1 Timoteo 1:11).
Alli religionta catijcunaca ashacunallami can (Mateo 7:13, 14). Paicunataca Diospaj munaita pajtachishpa causacushcamantami pꞌiñancuna, catirashpa llaquichincunapish (Mateo 5:10-12).
“Ñuca munashca religiontami catini”
Ñucanchij munashcallamanta ima religionta agllashpaca llaquipimi urmashun. Bibliapica panda religioncunapi yachachijcunaca gentecuna munashcallatami yachachingacuna. Chaimi gentecunaca alli yachachinata mana uyasha nishpa paicunata catingacuna ninmi (2 Timoteo 4:3). Chaimantami huaquincunaca alli religionta catinataca mana munancuna. Pero Yayitu Diosca alli religionta catichunmi munan. Alli religionca ima mana allicunahuanca mana chagrurinchu (Santiago 1:27; Juan 15:18, 19).