Jatun tandanacuimanta tucuicuna beneficiarichunca radiota, televisiontami utilizarcanchij

2020 huatataca punta cutinmi jatun tandanacuipaj grabashca programataca tucui mundo enteropi internetpi ricurcanchij. Shinapish internetta mana charishpapish Malaui, Mozambique llajtacunapi causaj huauqui panicunaca cai jatun tandanacuimantaca beneficiarircacunami. ¿Ima shinataj?

Comité de Coordinadores y Comité de Enseñanza del Cuerpo Gobernantepi sirvij huauquicunaca Malaui, Mozambique llajtacunapi causaj huauqui panicunapish jatun tandanacuita uyachunmi radiopi, televisionpi pasachun aprobarcacuna. ¿Imamantataj chashna ruranaca minishtirirca? Malaui llajtapica internetta charinaca yalli caromi valin. Chaimi chai llajtapi causaj huaquin Testigocunalla internettaca charin. Malaui llajtapi tiyaj Comité de Sucursalpi sirvij huauqui William Chumbica: “Radio, televisionllami cai llajtapi causaj huauqui panicunaman cai jatun tandanacuita uyachingapaj, ricuchingapajca sirvin” nircami. Shinallataj chai Comitellapitaj sirvij Luka Sibeko huauquipish: “Radio, televisión mana tiyajpica huaquin huauqui panicunallami cai jatun tandanacuimantaca beneficiarinman carca” nircami. Cutin Mozambique llajtapi causaj huaquin huauqui panicunapish shuj dispositivo electronicota randingapajca cullquita mana charincunachu. Peor internetta huasipi charingapajcarin.

¿Jatun tandanacuita ricuchunca imatataj rurarcacuna?

COVID-19 ungüimanta mana tandanacui valijpimi huaquin radio, televisionpish ñucanchij tandanacuicunataca ña uyachicurcacuna.a Chaimantami huauquicunaca jatun tandanacuitapish uyachingapaj cai radiopaj emisoracunata, televisionpaj canalcunatapish ashtahuan horascunata cuchun mañarcacuna.

Pero Malaui llajtapi causaj huauquicunapajca jatun tandanacuita televisionpi, radiopi churanaca mana jahuallachu carca. Radiota uyajcuna, televisionta ricujcuna ama aburririchunmi casi tucui programacunaca shuj horaspajlla can. Shinapish cai jatun tandanacuica gentecunata ayudangapaj cashcatami huauquicunaca intindichirca. Por ejemplo, paicunaca: “Pandemia punllacunapi huasimanta mana llujshi tucushpapish Bibliamanta alli huillaicunata gentecuna uyachunmi yachachircanchij. Chashnami vecinocunahuan alli apanacunata, familiacunahuan cushilla causanata yachai tucurcacuna” nircami. Chaita uyashpami radiota, televisionta mañachijcunaca ashtahuan horascunata curcacuna.

Malaui llajtapica shuj canal de televisionpi, shuj radiopaj emisorallapimi jatun tandanacuitaca pasachircacuna. Caicunaca achca ladocunamanmi chayan. Chaimantami cai jatun tandanacuitaca yallitaj achca gentecuna uyashcangacuna. Cutin Mozambique llajtapica shuj canal de televisionpi, radiopaj 85 emisoracunapipishmi cai jatun tandanacuitaca pasachircacuna.

Cai ishqui llajtacunapi jatun tandanacuita televisionpi ricuchingapajca 28.227 dolarestamib gastarcanchij. Shinallataj radiopi uyachingapajpish casi 20.000 dolarestami gastarcanchij. Jatun tandanacuita radiopi uyachinapajca ishqui preciocunami tiyarca. Huaquin lugarcunallapi uyarij emisoraca 15 dolarcunatami cobrarcacuna. Cutin chai llajtapi tucui ladopi uyarij emisoraca 2.777 dolarcunatami cobrarcacuna.

Cai huauquicunaca shungumanta cushca cullquitaca allimi utilizarcacuna. Por ejemplo, Malaui llajtapica baratolla preciocunatami mashcarcacuna. Mañachijcunapish treinta por cientotami rebajarcacuna. Chashnami 1.711 dolarescunata ahorrarcacuna. Mozambique llajtapi huaquin emisoracunaca testigo de Jehovacuna honrados cajta ricushpa, paganatapish utca pagajpimi preciocunata rebajarcacuna.

Huauqui panicunaca achcatami agradicin

Huauqui panicunaca cai jatun tandanacuita uyashcamanta o ricushcamantami cushicurcacuna. Malaui llajtapi shuj congregacionta pushaj huauqui Patrickca: “Pandemia punllacunapi Cuerpo Gobernante huauquicuna ñucanchijmanta cai arreglocunata rurashcamantami achcata pagui ninchij” nircami. Chai llajtamantallataj huauqui Isaacca: “Ñucanchijcunaca shujtaj dispositivocunataca mana charinchijchu. Chaimi jatun tandanacuitaca radiopi uyashcamanta Diospaj organizaciontaca pagui ninchij. Cai jatun tandanacuimantaca tucui ñuca familiami beneficiarircacuna. Chashnami Jehová Dios paipaj pueblota cꞌuyashcata cuentata cunchij” nircami.

2020 huatapica Mozambique llajtamanta shuj publicadorca jatun tandanacuipimi punta cutin carca. Paica: “Cai jatun tandanacuita televisionpi ricushpami Jehová Dios tucui poderta charishcata yuyarircani. Jehová Dios yachachishcacunataca huasipimi charircanchij. Ima pandemiapish Dios yachachichunca mana jarcarcachu. Diosta sirvijcunapurapish cꞌuyanacujtami ricurcani. Chaimantami cailla alli religión cashcata cuentata cuni” nircami.

Shuj congregacionta pushaj Wyson shuti huauquica: “Alli cazuj, alli yuyaiyuj sirvij huauquicunatami agradicini. Paicunaca cai pandemia punllacunapipish ñucanchijtaca mana saquishcachu. Yalli pobre llajtapi causashpapish ashallata charishpapish cai jatun tandanacuita radiopi, televisionpi charishcamantami achcata yachashcanchij. Cushillapishmi sintirinchij” nircami.

Comité de Coordinadores, Comité de Enseñanzapi sirvij huauquicunaca huaquin llajtacunapimi cai 2021 huatapajpish jatun tandanacuita radiopi, televisionpi uyachichun aprobarcacuna. Radiopi, televisionpi cai jatun tandanacuicunata pasachunca ¿maimantataj pagancuna? Obra mundialman shungumanta cushca cullquihuanmi ñucanchij huauquicunaca chaicunata pagancuna. Maijancunaca donate.jw.org paginapimi shungumanta cullquita cushcanguichij. Chaimantami diosolopagui ninchij.