Levítico

4 Jehová Diosca Moisestaca cashnapishmi nirca: 2 “Israelitacunataca cashna ningui: ‘Maijan runa mana munashpapish juchata rurashpa, Jehová Dios ama rurachun nishcata rurashpaca caitami rurana can:

3 Agllashca sacerdote juchata rurashpa, tucui israelitacuna chai juchamanta culpayuj tucujpica juchata rurashcamantami Jehová Diosmanca juchamanta ofrendata shina shuj sano malta torota cuna can. 4 Paica chai torotaca Jehová Diospaj ñaupajman, tandanacuna carpa huasi yaicunamanmi apana can. Chai toropaj umapi maquita churashpami Jehová Diospaj ñaupajpi huañuchinga. 5 Chai qꞌuipami agllashca sacerdoteca toropaj asha yahuartaca tandanacuna carpa huasi ucuman apanga. 6 Sacerdoteca yahuarpimi paipaj dedota shutujyachinga. Chashnami asha yahuartaca Diospajlla chꞌicanyachishca ucupi tiyaj cortina ñaupajpi, Jehová Diospaj ñaupajpi canchis* cutin tsirapanga. 7 Shinallataj sacerdoteca asha yahuartaca mishquijllata ashnacuj inciensota rupachina altar gachucunapimi churanga. Chai altarca Jehová Diospaj ñaupajpimi tandanacuna carpa huasipi can. Cutin toropaj sobrashca yahuartaca rupachishca ofrendata cuna altar chaquipimi tallinga. Chai altarca tandanacuna carpa huasi yaicunapimi can.

8 Chai qꞌuipaca juchamanta ofrendata shina cushca toropaj tucui huiratami anchuchinga. Tripacuna jahuapi tiyaj huiratapish, tripacunapi pegarishca huiratapishmi anchuchinga. 9 Shinallataj lomo cꞌuchullapi caj ishqui riñoncunata, riñoncunapi tiyaj huiratapishmi anchuchinga. Riñoncunandijmi higadopi tiyaj huiratapish anchuchinga. 10 Dioshuan alli tucungapaj sacrificiota cushca toromanta anchuchishca shinallatajmi tucui huirata anchuchinga. Chaimi sacerdoteca rupachishca ofrendata cuna altar jahuapi tucuita rupachishpa cushnichinga.

11 Pero toropaj carata, tucui aichata, umata, chaqui tullucunata, tripacunata, majadata, 12 toromanta tucui imalla sobrashcatami carpa huasicunamanta canllaman, ushpata* shitana chuya lugarman apachun mandanga. Paica tucuitami rupacuj yanta jahuapi rupachinga. Chaitaca ushpata shitanapimi rupachina can.

13 Tucui israelitacuna mana munashpapish shuj juchata rurashpa culpayuj tucujpi, paicuna* mana yachajpi Jehová Dios ama rurachun nishcata rurajpi, 14 pero chai juchata rurashcata yachaj chayajpica paicunaca* juchamanta ofrendata shinami shuj malta torota cuna can. Chai torotaca tandanacuna carpa huasi ñaupajmanmi apana can. 15 Chaipimi israelitacunata pushajcunaca* Jehová Diospaj ñaupajpi toropaj umapi paicunapaj maquicunata churangacuna. Chai torotaca Jehová Diospaj ñaupajpimi huañuchingacuna.

16 Chai qꞌuipami agllashca sacerdoteca toropaj asha yahuartaca tandanacuna carpa huasi ucuman apanga. 17 Sacerdoteca yahuarpimi paipaj dedota pambana can. Chashnami asha yahuartaca Diospajlla chꞌicanyachishca ucupi tiyaj cortina ñaupajpi, Jehová Diospaj ñaupajpi canchis cutin tsirapanga. 18 Chai qꞌuipaca asha yahuartaca Jehová Diospaj ñaupajpi caj altar gachucunapimi churanga. Chai altarca tandanacuna carpa huasipimi can. Cutin sobrashca yahuartaca rupachishca ofrendata cuna altar chaquipimi tallinga. Chai altarca tandanacuna carpa huasi yaicunapimi can. 19 Toropaj tucui huirata anchuchishpami altar jahuapi rupachishpa cushnichinga. 20 Chai torotaca juchamanta ofrendata cushca caishuj torota shinallatajmi ruranga. Sacerdoteca israelitacuna paicunapaj juchamanta perdonashca cachunmi chai torota cunga. Chashnami paicunaca perdonashca canga. 21 Paica chai torotaca carpa huasicunamanta canllaman apachunmi mandanga. Punta torota rupachishca shinallatajmi rupachinga. Chai toroca israelitacunata perdonangapaj juchamanta ofrendami can.

22 Israelitacunamanta shuj pushaj mana munashpapish juchata rurashpa, Jehová Dios ama rurachun nishcata rurashpa culpayuj tucushpa, 23 o shuj mandamientota mana cazushpa juchata rurashcata cuentata cushpaca shuj sano malta chivotami ofrendata shina cuna can. 24 Paica malta chivopaj uma jahuapi paipaj maquita churashpami rupachishca ofrendata shina cushca animalta huañuchinallapitaj huañuchinga. Jehová Diospaj ñaupajpimi huañuchinga. Chai animalca juchamanta ofrendami can. 25 Sacerdoteca juchamanta ofrendata shina cushca animalpaj asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca rupachishca ofrendata cuna altar chaquipimi tallinga. 26 Shinallataj sacerdoteca Dioshuan alli tucungapaj sacrificiomanta cushca huirata shinallatajmi juchamanta cushca ofrendamanta huiratapish altar jahuapi rupachishpa cushnichinga. Sacerdoteca chai runa paipaj juchamanta perdonashca cachunmi chaita ruranga. Chashnami chai runaca perdonashca canga.

27 Israelitacunamanta maijan runapish mana munashpapish Jehová Dios ama rurachun nishcata rurashpa culpayuj tucushpa, 28 o shuj juchata rurashcata cuentata cushpaca pai juchata rurashcamantami shuj sano malta chivata juchamanta ofrendata shina cuna can. 29 Paica chai animalpaj uma jahuapi maquita churashpami rupachishca ofrendata shina cushca animalta huañuchinallapitaj huañuchinga. 30 Sacerdoteca ofrendamanta asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca altar chaquipimi tallinga. 31 Dioshuan alli tucungapaj cushca sacrificiomanta huirata anchuchij shinallatajmi chai ofrendamantapish tucui huirata anchuchinga. Chai qꞌuipami sacerdoteca Jehová Diosman cushca mishquijllata ashnacuj ofrendata shina huirataca altar jahuapi rupachishpa cushnichinga. Chai runa paipaj juchamanta perdonashca cachunmi chaita ruranga. Chashnami paica perdonashca canga.

32 Pero juchamanta ofrendata shina shuj malta ovejata cushpaca sano huarmi ovejatami cuna can. 33 Paica chai animalpaj uma jahuapi paipaj maquita churashpami juchamanta ofrendata shina huañuchinga. Rupachishca ofrendata shina cushca animalta huañuchinallapitajmi huañuchinga. 34 Sacerdoteca juchamanta ofrendata cushca animalmanta asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca altar chaquipimi tallinga. 35 Chai animalmantapish Dioshuan alli tucungapaj sacrificiota shina cushca malta carneromanta huirata anchuchishca shinallatajmi tucui huirata anchuchinga. Chai qꞌuipami sacerdoteca huirataca altar jahuapi rupachishpa cushnichinga. Jehová Diosman cushca ninahuan rupachishca ofrendacuna jahuapimi cushnichinga. Chai runa paipaj juchamanta perdonashca cachunmi chaita ruranga. Chashnami paica perdonashca canga.