Jueces
5 Chai punllapica Débora huarmica Abinoampaj churi Barac runahuanmi cai cantota cantarcacuna:
2 “Israelpi macanacujcuna ajcha cacharishca tiyashcamanta,
gentecunapish shungumanta macanacunaman rishcamanta,
¡Jehová Diosta alabaichijyari!
3 ¡Reycuna, uyaichijyari! ¡Mandajcuna, alli uyaichijyari!
Ñucaca Jehová Diostamari cantasha.
Israelitacunapaj Jehová Diostamari cantashpa alabasha.*
4 Jehová Dioslla, Seír llajtamanta can llujshijpi,
Edom allpacunamanta can llujshijpica
allpaca chujchurcamari, jahua pachamantapish yallitaj tamyamari urmarca.
Pꞌuyucunapish yacuyashpamari tamya tucurca.
5 Urcucunapish Jehová Diospaj ñaupajpimari chujchurcacuna.*
Ashtahuancarin israelitacunapaj Jehová Diospaj ñaupajpimari Sinaí urcupish chujchurca.*
6 Anatpaj churi Samgar causashca punllacunapi,
Jael causashca punllacunapica ñancunaca chaquishca pambami carca.
Viajajcunapish uchilla ñancunatami pasajcuna carca.
7 Israelmanta chagrapi trabajajcunaca chingarircacunami.
Paicunaca ñuca ricuringacama mana tiyarcachu, ñucaca Deborami cani.
Israelitacunapajca ñucami shuj mama shina shayarircani.
8 Paicunaca shujtaj dioscunatami adorarcacuna.
Chaimantami llajtacunapaj pungucunapica macanacui tiyarca.
Cuarenta mil israelitacunapaj maquipica
shuj escudopish, shuj lanzapish mana tiyarcachu.
9 Ñuca shunguca Israelmanta soldadocunata pushajcunahuanmari.
Paicunami paicunapaj munaimanta gentecunahuan macanacungapaj rircacuna.
Chaimanta ¡Jehová Diosta alabaichijyari!
10 Cancuna, quillu burropi tiyarishpa rijcuna,
cancuna, alli ahuashca telacunapi tiyarijcuna,
cancuna, jatun ñanpi purijcuna,
¡Dios tucui imalla rurashcata yuyarichijyari!
11 Animalitocunapaj yacuta llujshichijcuna rimashcami uyarirca.
Chaipimi paicunaca Jehová Dios allicunata rurashcata parlanacucurcacuna,
chagrapi trabajaj israelitacunapaj alli ruraicunamantapishmi parlanacucurcacuna.
Chaimantami Jehová Diospaj puebloca llajtacunapaj pungucunaman uriyarca.
12 ¡Rijchariyari, jatariyari Débora!
¡Rijchariyari, jatariyari, shuj cantota cantaiyari!
¡Barac, jatariyari! ¡Abinoampaj churi Barac cambaj prezucunata apaiyari!
13 Saquirijcunaca poderta charijcunapajmanmi uriyarcacuna.
Jehová Diospaj puebloca ñucahuan poderta charijcunapaj contra macanacungapajmi shamurca.
14 Pugru pambapi cajcunaca Efrainmantami carcacuna.
Benjamín, paicunaca canhuanmi rincuna, cambaj familiapurapimi rincuna.
Makirpaj huahua huahuacunamantami soldadocunata pushajcuna uriyarcacuna.
Zabulonmantapish soldadocunata tandachingapaj tauna caspita charijcunami* uriyarcacuna.
15 Débora huarmihuanca Isacarpaj familiamanta mandajcunami carca.
Ima shinami Isacar paihuan carca, chashnallatajmi Baracpish paihuan carca.
Pugru pambamanca chaquillahuan richunmi cachashca carca.
Rubenpaj familiapica paicunapaj shungupi imata ruranataca mana yacharcacunachu.
16 ¿Imamantataj ishqui cargacuna chaupipi tiyarishpa saquirircanguiyari?
¿Imamantataj canlla ovejacunapaj michijcuna flautapi tocashcata uyashpalla saquirircanguiyari?
Rubenpaj familiapica shungupi imata ruranataca mana yacharcacunachu.
17 Galaadpi causajcunaca Jordán jatun yacu caishuj ladopimi saquirirca.
¿Danpaj familiaca imamantataj barcocunapaj cꞌuchupi saquirirca?
Aserpaj familiaca mama cucha uripi imata mana rurashpami saquirirca,
paicunaca barcocuna shayarina lugarmantaca mana maiman cuyurircacunachu.
18 Zabulonpaj familiamanta cajcunaca huañunata mana mancharcacunachu,
Neftalipaj familiamanta cajcunapish urcucunapi huañunataca mana mancharcacunachu.
19 Reycuna shamushpami macanacurcacuna.
Canaán llajtamanta reycunaca
Meguidó yacucuna cꞌuchupi caj Taanac llajtapimi macanacurcacuna.
Paicunaca cullquitapish, quichushca cosascunatapish mana apai tucurcacunachu.
20 Jahua pachamanta estrellacunapish macanacurcacunami,
Jahua pachamantami Sisarapaj contra macanacurcacuna.
21 Cisón larca yacumi contracunata aparca,
paicunataca ñaupa larca yacu, Cisón larca yacumi aparca.
Ñuca almalla,* poderta charijcunatami sarurcangui.
22 Caballocunaca miticushpa ringapajmi yallitaj callparcacuna,
paicunapaj sillucunatapish tꞌalaj nichishpami callparcacuna.
23 Jehová Diospaj angelca ‘Meroz lugarta maldicichij,
ari, chaipi causajcunata maldicichij.
Paicunaca Jehová Diosta ayudangapajca mana shamurcacunachu,
sinchi macanacujcunahuanpish Jehová Diostaca mana ayudarcacunachu’ nircami.
24 Jaelca tucui huarmicunamanta ashtahuan jatunyachishcamari,
paica quenitacunapuramanta Heberpaj huarmimari.
Carpa huasipi causaj huarmicunamantaca paimari ashtahuan jatunyachishca can.
25 Sísara yacuta mañajpica paica lechetami curca.
Paica bodapaj shuj sumaj tazonpimi leche cuajashcata curca.
26 Paipaj shuj maquihuanca carpa huasita charichina shuj estacatami japirca.
Paipaj alli lado maquihuanca trabajajcunapaj martillotami japirca.
Chaihuanmi paica Sisarataca tacashpa umata chaupirca.
Rinrin jahuanijlla uma tullupi tacashpami caishuj ladoman pasachirca.
27 Jaelpaj chaquicunapimi Sisaraca desmayarishpa urmarca, urmashpaca mana cuyurircachu.
Paipaj chaquicunapimi desmayarishpa urmarca.
Chashna urmashpaca chaipimi huañurca.
28 Shuj huarmica ventanapimi asomarirca.
Paica Sisarapaj mamami carca. Paimi ventanamanta ricucurca.
Paica: ‘¿Paipaj carretaca ima nishpataj mana utca shamunyari?
¿Ima nishpataj caballocuna shamucujtapish mana uyaniyari?’ nircami.
29 Palaciopi caj huarmicunamanta ashtahuan yachaisapa huarmicunaca cashnami cutichircacuna,
Sisarapaj mamapish cutin cutinmi cashna nirirca:
30 ‘Paicuna quichushca cosascunatami chaupinacucungacuna.
Cada macanacuj runapajca shuj solterata, ishqui solteratami paicunapaj japicungacuna.
Sisaramanpish teñishca telacunatami cucungacuna, ari, teñishca telacunatami paiman cucungacuna.
Quichujcunapaj cungapica shuj bordashca churanata, teñishca telacunata, ishqui bordashca churanatami churacungacuna’ nircami.
31 ¡Ñuca Jehová Dioslla! Cambaj tucui contracuna chashna huañushca cachun,
shinapish canta cꞌuyajcunaca inti llujshishpa achijyachij shina cachun” nircacunami.
Chashnami chai llajtapica 40 huatacunata tranquilo causai tiyarca.