Jueces
12 Efrainpaj familiamanta runacunami tandanacurcacuna. Paicunaca Zafón llajtaman rina ñanta pasashpami* Jeftetaca: “¿Canca ammonitacunahuan macanacunaman canhuan richunca ima nishpataj ñucanchijmanca mana huillarcangui? Cunanca cambaj huasitapish, cantapishmi chai huasi ucupi rupachishun” nircacuna. 2 Jefteca cashnami cutichirca: “Ñuca pueblopish, ñucapish ammonitacunahuanmi shuj sinchi macanacuita charircanchij. Cancunatami ayudachun mañarcani. Pero cancunaca paicunapaj maquimanta quishpichinamanca mana shamurcanguichijchu. 3 Cancuna quishpichingapaj mana shamujta ricushpami huañuna cashpapish ammonitacunahuan macanacunaman llujshircani. Chaimi Jehová Diosca paicunataca ñuca maquipi curca. Shinaca ¿ima nishpataj cunanca ñucahuan macanacunaman shamunguichij?” nircami.
4 Qꞌuipaca Jefteca Galaad llajtamanta tucui runacunata tandachishpami Efrainpaj familiamanta runacunahuan macanacurca. Galaad llajtamanta runacunaca Efrainpaj familiamanta runacunatami misharcacuna. Efrainpaj familiamanta runacunaca: “Efrainpaj, Manasespaj allpacunapi causaj galaaditacuna, cancunaca Efrainpaj familiamanta miticushpalla purij grupollami canguichij” nishcacunami carca. 5 Efrainpaj familiamanta runacuna Jordán jatun yacuta chꞌimbana ñancunaman manaraj chayajpimi Galaadmanta runacunaca chai ñancunapi ña carcacuna. Efrainpaj familiamanta runacuna miticushpa pasasha nishpaca “Ñucata pasachun saqui” nijcunami carca. Chaimantami Galaadmanta runacunaca cada efraimita runacunataca “¿Canca efraimitachu cangui?” nishpa tapujcuna carca. Chashna tapujpimi paicunaca “¡Mana!” nijcuna carca. 6 Galaadmanta runacunaca paicunataca “Shinaca shibolet ni” nijcunami carca. Pero efraimitacunaca chai shimita mana alli rimai tucushcamantami “Sibolet” nijcuna carca. Chaimantami Galaadmanta runacunaca paicunataca Jordán jatun yacuta chꞌimbana ñancunapi japishpa huañuchircacuna. Chashnami chai tiempoca Efrainpaj familiamantaca 42.000 cꞌaricuna huañurcacuna.
7 Galaadmanta Jefteca Israelpimi juez carca. Paica sujta* huatacunatami chaipi juzgarca. Qꞌuipaca Jefteca huañurcami. Chaimi paitaca pai causashca Galaad llajtapi pambarcacuna.
8 Jeftepaj qꞌuipaca Belén llajtamanta Ibzanmi Israelpi juez carca. 9 Paica 30 churicunata, 30 ushushicunatami charirca. Shinallataj paipaj ushushicunataca paipaj familiamanta mana caj cꞌaricunahuan cazarachunmi cacharca. Paipaj churicunahuan cazarachunpish 30 huarmicunatami apamurca. Ibzanca canchis huatacunatami Israelpi juez carca. 10 Qꞌuipaca Ibzanca huañurcami. Paitaca Belén llajtapimi pambarcacuna.
11 Ibzanpaj qꞌuipaca Zabulonpaj familiamanta Elonmi Israelpi juez carca. Paica 10 huatacunatami Israelpi juzgarca. 12 Qꞌuipaca Elón runaca huañurcami. Paitaca Zabulón allpapi saquirij Ayalón llajtapimi pambarcacuna. Elón runaca Zabulonpaj familiamantami carca.
13 Elonpaj qꞌuipaca Piratón lugarmanta Hilelpaj churi Abdonmi Israelpi juez carca. 14 Paica 40 churicunata, 30 nietocunatami charirca. Paicunamantaca cada unomi shuj burropi montaj carcacuna. Abdonca pusaj huatacunatami Israelpi juez carca. 15 Qꞌuipaca Piratonmanta Hilelpaj churi Abdonca huañurcami. Paitaca amalequitacunapaj urcucunapi, Efrainpaj allpapi saquirij Piratón lugarpimi pambarcacuna.