Rut
3 Rutpaj suegra Noemica cashnami nirca: “Ñuca huahualla can alli causachunmi shuj cusata* cambaj mashcasha. 2 ¿Manachu Boazca ñucanchij familiamanta can? Canca cosechaj huarmicunahuanmi carcangui. Paicunaca Boazta sirvijcunami can. Ricui, paica cunan tutami trillana pambapi cebadata huairachinga.* 3 Shinaca jatarishpa, armashpa, mishquilla ashnacuj aceiteta churarishpa, sumaj ropata churarishpa trillana pambaman uriyai. Shinapish pai tucui micungacama, ubyangacamaca can chaipi cashcata pai cuentata cuchunca ama saquingui. 4 Pai maipi dorminaman rijtapish alli ricungui. Qꞌuipaca paipaj chaquimanta cꞌatata alzashpa chai cꞌuchupi siriringui. Chaimi paica can imata ruranata ninga” nircami.
5 Rutca: “Can tucui imata nishcatami rurasha” nircami. 6 Paipaj suegra mandashca shinami trillana pambaman uriyashpa tucuita rurarca. 7 Boazca micushpa, ubyashpaca paipaj shungupica cushillami sintirirca. Qꞌuipaca paica granocuna montonashca huasha ladopimi dorminaman rirca. Cutin Rutca allijlla cꞌuchuyashpami Boazpaj chaquimanta cꞌatata alzashpa paipaj chaqui cꞌuchupi siririrca. 8 Boazca chaupi tutatami chujchui callarirca. Chaimi paica tiyarishcahuan paipaj chaqui ura ladopica shuj huarmi siricujta ricurca. 9 Chaimi: “¿Pitaj cangui?” nishpa tapurca. Chashna tapujpimi paica: “Canta sirvij Rutmi cani. Canmi ñuca cusapaj familia cangui. Canmi tigra randij cangui. Cambaj jahua churanahuan ñucatapish cꞌatachihuai” nircami. 10 Chaimi Boazca cashna nirca: “Ñuca huahualla Jehová Dios canta bendiciachun. Mana tucurij cꞌuyaita* punta cutin ricuchishcata yallimi cunanca chai cꞌuyaita ricuchishcangui. Canca cambaj cusa cachunca charij cajpipish, pobre cajpipish shuj joven runataca mana mashcashcanguichu. 11 Cunanca ñuca huahualla ama manchaichu. Tucui can ima nishcatami rurasha. Cai llajtapica* tucuicunami can alli huarmi cashcataca yachancuna. 12 Ciertomi ñuca tigra randij cani. Shinapish cambaj cusapaj ashtahuan cꞌuchulla familiami tiyan. Paimi canta randi tucun. 13 Cunan tutaca caipi saquirilla. Caya tutamanta cambaj cusapaj ashtahuan cꞌuchulla familia ayudasha nijpica allimi canga. Shinapish canta pai mana ayudasha nijpica ñucallatajmi ayudasha. Chaitaca causaj Jehová Diospaj shutipimi jurani. Cunanca pacaringacama caillapitaj saquiri” nircami.
14 Chaimi Rutca pacaringacama paipaj chaqui cꞌuchupi saquirirca. Pipish paita ama rijsichunmi manaraj achijyajpi jatarirca. Boazca: “Trillana pambaman shuj huarmi shamushcataca pi ama yachachun” nircami. 15 Shinallataj Boazca Ruttaca: “Can pꞌachallishca jahua churanata pascashpa ricuchi” nircami. Pai pꞌachallishcata pascashpa ricuchijpimi Boazca ishqui arroba yalli* cebadata churarca. Qꞌuipaca Boazca alzashpami paiman apachirca. Chaimi paica llajtaman rirca.
16 Huasiman chayajpimi paipaj suegraca: “¿Ñuca huahualla, ima layataj cainamungui?” nishpa tapurca. Chashna tapujpimi Rutca Boaz paimanta imalla rurashcata tucuita parlarca. 17 Shinallataj Rutca: “Ishqui arroba yalli cebadata cushpaca ‘cambaj suegrapaj huasimanca ama chushaj maquilla tigraichu’ nishpami curca” nircami. 18 Chashna nijpimi Noemica: “Ñuca huahualla ima tucujta ricungacama shuyailla. Paica cunanllatajmi caita allichingapajca tucuita ruranga” nirca.