Rut
2 Noemica paipaj cusapaj partemanta shuj familiatami charirca. Cai runapaj shutica Boazmi carca. Cai runaca yallitaj charij, Elimelecpaj familiamantami carca.
2 Moab llajtamanta Rut huarmica Noemimanca: “Chagracunapi maijanpish cebadata chꞌalachun saquingapishchari, chai chagracunaman richun saquihuai” nircami. Chashna nijpimi Noemica: “Ñuca huahualla, rilla” nishpa cutichirca. 3 Chaimanta rishpaca paica chagracunaman chayashpami cosechajcunata catishpa chꞌalai callarirca. Paica mana yachashpapish Boazpaj chagramanmi chayashca carca. Boazca Elimelecpaj familiami carca. 4 Chai ratomi Boazca Belenmanta paipaj chagracunaman chayamurca. Chaimi paica cosechajcunataca: “Jehová Dios cancunahuan cachun” nijpi paicunapish: “Jehová Dios canta bendiciachun” nircacuna.
5 Boazca cosechajcunata mandajtaca: “¿Chai huarmica pipaj familiamantataj can?” nishpami tapurca. 6 Cosechajcunata mandajca cashnami cutichirca: “Cai huarmica Moab llajtamantami can. Paica Noemihuanmi Moab llajtamanta shamushca. 7 Paica: ‘¿Cosechajcuna urmachishca cebada espigacunata mashcashpa chꞌalai* tucunichu?’ nishpami mañarca. Tutamantamanta cai horascama chashna trabajanataca mana saquishcachu. Paica cai ratollami chugllapi ashata samaricun” nircami.
8 Qꞌuipaca Boazca Ruttaca cashnami nirca: “Ñuca huahualla uyapai. Shujtaj chagracunapi chꞌalanamanca ama ringui, caipi saquiringui. Ñucapaj trabajaj huarmicunapaj ladopi saquiringui. 9 Paicuna maipi cosechanaman rijta ricushpa paicunahuan ringui. Jovencunatapish canta ama molestachunca ñami advirtishcani. Yacunachishpapish jovencuna yacuta llujshichishca puñumanta ubyanguilla” nircami.
10 Chashna nijta uyashpami Rutca cungurishpa, pambacama cumurishpaca: “¿Imamantataj ñucahuan chashna alli cangui? ¿Ñuca shujtaj llajtamanta cajpipish imamantataj ñucamantaca sustaringui?” nishpami tapurca. 11 Chaimi Boazca cashna nishpa cutichirca: “Cambaj cusa huañushca punllamanta cambaj suegrapaj imallata rurashcata, cambaj yaya mamata, cambaj causashca llajtata saquishpa mana rijsishca llajtapi causanaman shamushcatami gentecunaca ñucaman parlashcacuna. 12 Jehová Dios can tucui imalla rurashcamanta bendiciachun. Canca israelitacunapaj Jehová Diospaj alas ucupimi miticunata mashcashcangui. Diosmi can imalla rurashcataca ricushca. Chaimantami paica canmanca tucuita paganga” nircami. 13 Chaimi Rutca: “Ñuca amito, ñucaman cai cꞌuyaita ricuchishcamanta pagui. Mana canta sirvij cajpipish canca ñucataca cashna shimicunata nishpami cushichishcangui, alli sintichishcangui” nirca.
14 Micuna horasmi Boazca: “Ñuca huahua, caiman shamushpa asha tandata vinagrepi nuyuchishpa micui” nirca. Chaimi Rutca cosechajcunapaj ladopi tiyarirca. Boazca camchashca granotami paimanca curca. Chaitami Rutca huijsa pajtata micurca. Micunatapish huanllarcami. 15 Pai chꞌalanaman jatarijpimi Boazca paipaj trabajajcunataca cashna mandarca: “Cebada cuchushca espigacuna chaupipi chꞌalashpa catichunpish saquinguichijlla, paitaca ama molestanguichij. 16 Shinallataj cancuna maqui junda cebadata cuchucushcamanta ashata urmachun saquinguichijlla. Chashna rurajpimi paica chꞌalai tucunga. Imatapish ama jarcanguichijchu” nircami.
17 Rutca chishicamami chagrapi chꞌalashpa catirca. Chai chꞌalashca cebadata huajtashpaca casi 29 libracunatami* japirca. 18 Chaita aparishpami huasiman tigrarca. Paipaj suegramanpish mashnata chꞌalashcatami ricuchirca. Shinallataj pai huanllashpa apamushca micunatapishmi Noemiman curca.
19 Chaimi paipaj suegraca: “¿Maipitaj cunanca chꞌalamungui? ¿Maipitaj trabajamungui? Canmanta sustarijtaca Dios bendiciachun” nirca. Chaimi Rutca maipi trabajamushcata parlarca. Paica: “Boaz runapajpimi trabajamuni” nircami. 20 Chashna nijta uyashpami Noemica: “Causajcunaman, huañushcacunaman mana tucurij cꞌuyaita ricuchij Jehová Dios paita bendiciachun” nirca. Shinallataj Noemica: “Chai runaca ñuca cusapaj familiami. Paimi ñucanchijta tigra randi tucun”* nircami. 21 Moab llajtamanta Rutca: “Boazca: ‘Ñuca trabajajcuna tucui cosechangacama paicunapaj cꞌuchupi saquiringui’ nircami” nishpami parlashpa catirca. 22 Chaimi Noemica paipaj nuerataca: “Ari, ñuca huahualla, paipaj trabajaj huarmicunahuan saquirinami alli can. Chashnami shujtaj chagracunapica canta mana molestangacuna” nirca.
23 Rutca Boazpaj trabajaj huarmicuna cebadata, trigota tucui cosechangacamami chaipi chꞌalashpa catirca. Paica paipaj suegrahuanmi causashpa catirca.