2 Reyes
23 Chaimi reyca Judamanta, Jerusalenmanta tucui pushajcunata* tandanacuchun mandarca. 2 Chai qꞌuipaca rey Josiasca Jehová Diospaj huasimanmi Judamanta runacunahuan, Jerusalenpi tucui causajcunahuan, sacerdotecunahuan, profetacunahuan huichiyarca. Tucui gentecunami jatuncunapish, uchillacunapish huichiyarcacuna. Dioshuan ari ninacushca librota Jehová Diospaj huasipi japishcatami Josiasca liyirca. 3 Reyca pilar cꞌuchupi shayarishpami Jehová Diospaj ñaupajpi shuj ari ninacuita rurarca. Chaipimi paica Jehová Diosta sirvingapajpish, mandashcacunatapish, advertenciacunatapish, leycunatapish tucui shunguhuan, tucui almahuan* cazungapaj ari nirca. Shinallataj Dioshuan ari ninacushcata charij libropi nishcatapish pajtachingapajmi ari nirca. Chai ari nishcataca tucuicunami apoyarcacuna.
4 Reyca sacerdotecunata jatun mandaj Hilquiastapish, shujtaj sacerdotecunatapish, punguta cuidajcunatapishmi Baal diospaj, adorana postepaj, intipaj, lunapaj, estrellacunapaj* rurashca tucui cosascunata Jehová Diospaj huasimanta llujshichichij nishpa mandarca. Chashnami Jerusalenmanta llujshichishpa Cedrón pugru pambapi rupachircacuna. Chai ushpataca* Betelmanmi aparcacuna. 5 Shinallataj shujtaj llajtamanta dioscunapaj sacerdotecunapaj negociotapishmi anchuchirca. Chai sacerdotecunatami Judá llajtamanta reycunaca Judapi caj llajtacunapi tiyaj adorana lugarcunapi,* Jerusalén muyundijpi tiyaj adorana lugarcunapi sacrificiota rupachishpa cushnichichun churashca carca. Shinallataj Baalpaj, intipaj, lunapaj, Zodiaco nishca estrellacunapaj, tucui shujtaj estrellacunapaj sacrificiota rupachishpa cushnichijcunatapishmi anchuchirca. 6 Jehová Diospaj huasimanta adorana posteta llujshichishpaca Cedrón pugru pambamanmi aparca. Chaica Jerusalén canllamanmi carca. Chaipi rupachishpami chai rupachishcataca polvoyangacama cutarca. Chai ñutu allpataca pobre gentecunata pambashca jahuapimi tsirapashpa shitarca. 7 Shinallataj templopi huainayaj cꞌaricunapaj huasicunatami urmachirca. Chai huasicunaca Jehová Diospaj huasipimi carca. Chai huasillapitajmi huarmicunapish adorana postepaj carpa huasicunata rurajcuna carca.
8 Judá llajtapi tiyaj llajtacunamantami tucui sacerdotecunata apamurca. Adorana lugarcunapi yanga dioscunata ama adorashpa catichunmi chashna rurarca. Chai lugarcunapimi chai sacerdotecunaca sacrificiota rupachishpa cushnichijcuna carca. Chaitaca Gueba llajtamanta Beer-Seba llajtacamami chashna rurarca. Shinallataj chai llajtata pushaj Josuepaj pungu yaicunpi tiyaj adorana lugarcunatapishmi urmachirca. Chai adorana lugarcunaca chai llajta pungu yaicun lluqui ladomanmi saquirirca. 9 Adorana lugarcunapi sirvij sacerdotecunaca Jerusalenpi saquirij Jehová Diospaj altarpica mana sirvijcunachu carca. Shinapish paicunapaj huauquicunahuanmi levadura illaj tandata micujcuna carca. 10 Shinallataj Josiasca Tófet lugarpi adorashpa catichunca mana saquircachu. Tófet lugarca Hinón* pugru pambapimi saquirin. Chashna rurajpimi ni pi paipaj churita, paipaj ushushitaca ninapi rupachishpa sacrificiota shina Mólek diosman ña mana cui tucurca. 11 Josiasca Judá llajtamanta reycuna intiman caballocunata cushcacunataca Natán-Melecpaj cuarto* pilarcuna cꞌuchuta pasashpa, Jehová Diospaj huasiman yaicuchunca mana saquircachu. Natán-Melecca palaciopimi achca autoridadta charij carca. Shinallataj Josiasca intipaj cushca carretacunatapishmi rupachirca. 12 Judá llajtamanta reycunaca Acazpaj cuarto jahuapi caj terrazapimi altarcunata churashca carca. Chai altarcunatami rey Josiasca urmachirca. Shinallataj Jehová Diospaj huasi ishqui patiocunapi adorana lugarcunata Manasés rurashcatapishmi urmachirca. Chashnami ñutu allpata rurashpa Cedrón pugru pambapi tsiraparca. 13 Shinallataj reyca Jerusalén chꞌimba ladopi caj adorana lugarcunapi ña ama adorachunmi mandarca. Chai adorana lugarcunaca Olivos yuracuna tiyan urcu* ura ladomanmi carca. Chai adorana lugarcunataca Israel llajtamanta rey Salomonmi Astoret, Kemós, Milcom dioscunapaj shayachishca carca. Astoret huarmi diosca sidoniocunapaj millanana diosmi carca. Kemosca moabitacunapaj millanana diosmi carca. Cutin Milcomca ammonitacunapaj millanana diosmi carca. 14 Shinallataj adorana pilarcunatapishmi ñuturca. Adorana postecunatapishmi urmachirca. Chashnami gentecunapaj tullucunahuan chai lugarcunapica jundachirca. 15 Betelpi tiyaj altartapish, adorana lugartapishmi urmachirca. Chai adorana lugartaca Nebatpaj churi Jeroboanmi rurashca carca. Paica chashna rurashpami israelitacunataca juchapi urmachishca carca. Chai altartapish, adorana lugartapish urmachishca huashami adorana lugartaca ninapi rupachirca. Qꞌuipaca ñutu allpa tucungacamami cutarca. Shinallataj adorana postetapishmi rupachirca.
16 Josiasca tigralla ricushpaca urcupi pambana jutcucunatami ricurca. Chaita ricushpami chaipi pambashca tullucunata llujshichishpa altarpi rupachichun mandarca. Chashnami adorana lugarcunataca yanga dioscunata adorangapaj ña mana utilizarcacuna. Diosta sirvij runaman Jehová Dios huillachishca shinami pajtarirca. 17 Chaimi Josiasca: “¿Chai pambashca jahuapi tiyacuj rumica pipajtaj can?” nishpa tapurca. Chashna nijpimi chai llajtapi causaj runacunaca: “Judá llajtamanta shamuj Diosta sirvij runatami chaipi pambarcacuna. Chai runami Betelpi altarhuan can imata rurana cashcata ña huillashca carca” nirca. 18 Chaimi Josiasca: “Pai samachun saquichijlla. Pipish paipaj tullucunataca ama tuparichun” nirca. Chashna nijpimi paipaj tullucunatapish, Samaria llajtamanta shamuj profetapaj tullucunatapish ni maijan mana tuparca.
19 Josiasca Samaria llajtapi tiyaj llajtacunapi adorana lugarcunamantami tucui templocunata anchuchirca. Israel llajtamanta reycunami Diosta pꞌiñachingapaj chai templocunataca shayachishcacuna carca. Ima shinami Betelpi tucui tucuchirca, chashnallatajmi chai adorana lugarcunahuanpish rurarca. 20 Adorana lugarcunapi caj tucui sacerdotecunatapishmi altarcunapi huañuchirca. Chai altarcuna jahuapica gentecunapaj tullucunatapishmi rupachirca. Qꞌuipaca paica Jerusalenmanmi tigrarca.
21 Rey Josiasca tucui gentecunamanmi: “Ñucanchij Jehová Diospaj shuj Pascua fiestata ruraichij. Chaitaca Dioshuan ari ninacushca libropi quillcashca shina ruraichij” nishpa mandarca. 22 Israel llajtata juezcuna juzgacui punllacunapipish, Israel llajtata, Judá llajtata reycuna mandacui punllacunapipish cashna laya Pascua fiestataca mana rurashcacunachu carca. 23 Josías 18 huatacunata mandacujpimi Jerusalenpica Jehová Diospaj chai Pascua fiestata rurarcacuna.
24 Josiasca huañushcacunahuan parlajcunata, adivinocunata, santocunata,* millanana rurashcalla dioscunatami anchuchirca. Shinallataj Judá llajtapi, Jerusalén llajtapi ricurishca millanana tucui cosascunatapishmi anchuchirca. Chaitaca libropi quillcachishca Leypi nishca shimicunata pajtachingapajmi chashna rurarca. Chai librotaca sacerdote Hilquiasmi Jehová Diospaj huasipi japishca carca. 25 Josiaspaj ñaupaca pai shina Diospajman tigrajca pi shujtaj reyca mana tiyarcachu. Paica Jehová Diostami Moisesman cushca leypi nishca shina tucui shunguhuan, tucui almahuan, tucui fuerzahuan sirvirca. Paipaj qꞌuipapish pai shina shujtajca mana tiyarcachu.
26 Shinapish Diosta pꞌiñachingapaj Manasés tucui laya millanana cosascunata rurashcamantami Judá llajtapi cajcunahuanca Jehová Diosca yallitaj pꞌiñarishca catirca. 27 Jehová Diosca: “Israel llajtata ñuca ñahuimanta anchuchishca shinami Judá llajtatapish ñuca ñahuimanta anchuchisha. Ñuca agllashca Jerusalén llajtatapish saquishami. ‘Ñuca shutica chaipimi catinga’ nishca huasitapishmi saquisha” nircami.
28 Josiaspaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. 29 Rey Josías mandacui punllacunapimi Egipto llajtamanta rey faraón Nekoca Asiria llajtamanta reyhuan Éufrates jatun yacu cꞌuchupi tupanacunaman shamurca. Chaipimi rey Josiasca paihuan macanacunaman llujshirca. Pero rey Nekoca Josiasta ricushcahuanmi Meguidopi paitaca huañuchirca. 30 Josiaspaj cuerpotaca paita sirvijcunami Meguidó llajtamanta shuj carretapi Jerusalenman aparcacuna. Chaipimi paipaj pambana jutcupi pambarcacuna. Chai llajtapi causaj gentecunaca Josiaspaj churi Jehoacaztami paipaj yayapaj randi catij rey cachun agllarcacuna.
31 Jehoacazca 23 huatacunata charishpami rey tucurca. Quimsa quillacunatami Jerusalenpi mandarca. Paipaj mamaca Libná llajtamanta Jeremiaspaj ushushi Hamutal huarmimi carca. 32 Jehoacazca paipaj ñaupa yayacuna shinallatajmi Jehová Diospaj ñaupajpica mana allicunata rurai callarirca. 33 Faraón Nekoca Jehoacaz Jerusalenpi ama mandashpa catichunmi Hamat allpapi saquirij Riblapi prezu churarca. Chai qꞌuipaca Judá llajtapi causajcunataca 100 talento* cullquita, shuj talento orota cuchunmi obligarca. 34 Shinallataj faraón Nekoca Josiaspaj churi Eliaquimtami rey cachun churarca. Chashnami paitaca paipaj yaya Josiaspaj randi mandachun agllarca. Eliaquimtaca Jehoiaquim shutimanmi cambiarca. Pero paica Jehoacaztaca Egiptomanmi pusharca. Chaipimi Jehoacazca huañurca. 35 Jehoiaquimca faraonmanca cullquita, orotami curca. Shinapish obligashca cullquita faraonman cungapajca chai llajtapi causajcunatami shuj impuestota cobrarca. Faraón Nekoman cungapajca chai llajtapi causajcunatami cada uno mashnata charishcata ricushpa cullquita, orota cobrarca.
36 Jehoiaquimca 25 huatacunata charishpami rey tucurca. Paica 11 huatacunatami Jerusalenpi mandarca. Paipaj mamaca Rumá llajtamanta Pedayapaj ushushi Zebidami carca. 37 Jehoiaquimca paipaj ñaupa yayacuna rurashca shinallatajmi Jehová Diospaj ñaupajpica mana allicunata ruraj carca.