2 Reyes
25 Sedequías iscun huatacunata mandacujpi décimo quillapaj chunga punllapimi Babilonia llajtamanta rey Nabucodonosorca paipaj tucui soldadocunahuan Jerusalenpaj contra macanacunaman shamurca. Paica Jerusalenpaj contra macanacungapajmi carpa huasicunapi saquirirca. Chai llajta muyundijtapish shuj pircatami shayachirca. 2 Rey Sedequías 11 huatacunata mandangacamami chai soldadocunaca chai llajta muyundijta shayarishpa saquirircacuna. 3 Cuarto quillapaj iscun punllapica chai llajtapi yallitaj yaricaimi tiyarca. Chaimantami chai llajtapi causaj gentecunapajca ima micuna mana tiyarca. 4 Caldeocunaca Jerusalén llajtapaj pircatami jutcurcacuna. Reypaj jardín cꞌuchupi ishqui pircacunapaj chaupipi tiyaj pungutami rey Sedequiaspaj tucui soldadocunaca tuta llujshishpa rircacuna. Chaicamaca chai llajtapaj muyundijpimi caldeocunaca shayarircacuna. Shinallataj rey Sedequiasca Arabá pugru pamba ñantami rirca. 5 Pero caldeocunapuramanta soldadocunaca rey Sedequiasta catirashpa rishpami Jericó llajta chaquishca pambapi paitaca japircacuna. Sedequiaspaj tucui soldadocunapish caita chaitami rircacuna. 6 Rey Sedequiasta prezu shina japishpami Riblaman huichiyachircacuna. Chaipimi Babilonia llajtamanta reypaj ñaupajman apashpa paitaca juzgarcacuna. 7 Sedequiaspaj churicunatapish paipaj ñaupajpimi huañuchircacuna. Chai qꞌuipaca Nabucodonosorca Sedequiaspaj ñahuita ciegoyachishpami cobre cadenacunahuan huatashpa paitaca Babiloniaman aparca.
8 Babilonia llajtata mandaj rey Nabucodonosor 19 huatacunata mandacujpimi quinto quillapi, chai quillapaj canchis punllapi Nebuzaradanca Jerusalenman chayarca. Paica Babilonia reypaj guardiacunata mandaj, reyta sirvijmi carca. 9 Nebuzaradanca Jehová Diospaj huasita, reypaj huasita,* Jerusalenpi caj tucui huasicunatami rupachirca. Chai llajtapi rijsishca runacunapaj tucui huasicunatapishmi rupachirca. 10 Tucui caldeocunapuramanta soldadocunaca guardiacunata mandajhuanmi Jerusalén muyundij pircacunata urmachirca. 11 Guardiacunata mandaj Nebuzaradanca Jerusalén llajtapi saquirishca gentecunatapish, Babilonia llajtamanta reypaj parte tucushpa apoyajcunatapish, shujtaj gentecunatapishmi prezuta shina aparca. 12 Shinapish guardiacunata mandajca yallitaj pobre huaquin gentecunatami chai llajtapi uva chagracunata cuidachun, sinchi trabajocunata rurachunpish saquirca. 13 Caldeocunaca Jehová Diospaj huasipi tiyaj cobremanta rurashca pilarcunatapishmi mirga mirgata ñuturcacuna. Chashnallatajmi uchilla carretacunatapish mirga mirgata ñuturcacuna. Shinallataj Jehová Diospaj huasipi tiyaj cobremanta rurashca jatun tanquetapishmi* mirga mirgata ñuturcacuna. Chashnami chai cobretaca Babiloniaman aparcacuna. 14 Shinallataj baldecunata, palacunata, ninata huañuchinacunata,* copacunata, Diospaj huasipi tiyaj cobremanta rurashca tucui utilizashca cosascunatapishmi aparcacuna. 15 Guardiacunata mandajca braserillocunatapish, oro puromanta, cullqui puromanta rurashca tazoncunatapishmi aparca. 16 Salomonca Jehová Diospaj huasipajca cobremantami ishqui pilarcunata, jatun tanqueta, uchilla carretacunatapish rurashca carca. Chai cobremanta rurashca cosascuna achca cashcamantami cobretaca mana pesai tucurcacuna. 17 Cada pilarmi altomanca pusaj metrocunata* midirca. Chai pilarpaj capitelca* cobremantami rurashca carca. Chai capitelca altomanca shuj metro yallitami* midirca. Chai capitelpaj muyundijpica mallapish, granadacunapish tucuimi cobremanta rurashca carca. Catij pilarpish caishuj pilar shinallatajmi mallahuan rurashca carca.
18 Guardiacunata mandajca sacerdotecunata mandaj Serayatapish, sacerdote Sofoniastapish, punguta quimsa cuidajcunatapishmi pusharca. Sofoniasca sacerdotecunata mandajta ayudajmi carca. 19 Nebuzaradanca Jerusalén llajtamantami palaciopi achca autoridadta charij shuj runata pusharca. Chai runaca soldadocunata pushajmi carca. Chai llajtapi caj reyman consejocunata cuj pichca runacunatapishmi aparca. Soldadocunata mandajpaj secretariotapishmi aparca. (Cai secretariomi tucui llajtamanta gentecunata tandachij carca). Chai llajtapi saquirishca 60 pobre cꞌaricunatapishmi aparca. 20 Guardiacunata mandaj Nebuzaradanca paicunatami Riblaman pusharca. Chashnami paicunataca Babilonia llajtamanta reypaj ñaupajman aparca. 21 Babilonia llajtamanta reyca paicunataca Riblapimi huañuchirca. Riblá lugarca Hamat allpapimi carca. Chashnami Judá llajtamanta gentecunataca paicunapaj allpamanta llujshichishpa cacharcacuna.
22 Babilonia llajtamanta rey Nabucodonosorca Judá llajtapi saquirishca gentecunata mandachunca Guedaliastami churarca. Guedaliasca Ahicampaj churimi carca. Ahicamca Safanpaj churimi carca. 23 Babilonia llajtamanta rey Nabucodonosor Guedaliasta mandaj cachun churashcatami soldadocunata tucui mandajcunapish, paicunapaj soldadocunapish uyarcacuna. Chaita uyashcahuanmi paicunaca Mizpá llajtapi Guedaliasta ricunaman rircacuna. Soldadocunata mandajcunaca Netaniaspaj churi Ismael, Careahpaj churi Johanán, netofatitacunapuramanta Tanhumetpaj churi Seraya, Maacat llajtamanta shuj runapaj churi Jaazaniasmi carcacuna. Paicunahuanca paicunapaj soldadocunapishmi rircacuna. 24 Guedaliasca paicunamanpish, paicunapaj soldadocunamanpishmi shuj juramentota rurarca. Paica: “Caldeocunata sirvinataca ama manchaichijchu. Babilonia llajtamanta reyta sirvishpa cai llajtallapitaj causaichij, allimi causanguichij” nircami.
25 Séptimo quillapica reypaj huahua huahuacunamanta Ismaelca chunga runacunahuanmi Mizpá llajtaman chayarca. Chaipimi paicunaca Guedaliasta llaquichishpa huañuchircacuna. Shinallataj Mizpá llajtapi Guedaliashuan caj judiocunapish, caldeocunapishmi huañurcacuna. Ismaelca Netaniaspaj churimi carca. Netaniasca Elisamapaj churimi carca. 26 Chai qꞌuipaca gentecunaca caldeocunata manchashcamantami tucuicuna Egiptoman rircacuna. Uchillacunapish, jatuncunapish, soldadocunata mandajcunapishmi chaiman rircacuna.
27 Judá llajtamanta rey Joaquinca 37 huatacunatami Babilonia llajtapi prezu shina carca. Chai huatapimi rey Evil-Merodacca Babilonia llajtata mandai callarirca. Paimi chai huatapaj 12 quillapaj 27 punllapi Judá llajtamanta rey Joaquintaca prezumanta llujshichirca. 28 Paica rey Joaquintaca allimi tratarca. Babiloniapi paihuan caj caishuj reycunamantapish ashtahuan yallimi paita jatunyachirca.* 29 Joaquinca prezupi churarina paipaj ropatami llujshichirca. Paica huañuna horascamami reypaj mesapi micushpa causarca. 30 Babilonia llajtamanta reyca Joaquinmanca huañuna horascamami micunata cararca.