2 Reyes
3 Acabpaj churi Jehoramca Samaria llajtapimi Israelpaj catij rey tucurca. Jehosafat Judá llajtapi 18 huatacunata mandacujpimi Jehoramca Israelpi mandai callarirca. Paica 12 huatacunatami Israelpica mandarca. 2 Jehoramca Jehová Diospaj ñaupajpica mana allicunatami ruraj carca. Pero paipaj yaya mama shinaca mana rurarcachu. Paica Baal diospaj adorana pilarta paipaj yaya rurashcatami urmachirca. 3 Jehoramca Nebatpaj churi Jeroboán juchacunata rurashca shinallatajmi israelitacunataca juchacunapi urmachirca. Jehoramca chai juchacunata ruranamantaca mana anchurircachu.
4 Moabmanta rey Mesaca ovejacunatami huiñachij carca. Paica Israelmanta reyman tributota* pagangapajmi 100.000 malta ovejacunata cuj carca. Shinallataj 100.000 carnerocunatapish millmata mana rutushpami cuj carca. 5 Acab huañuncami Moab llajtamanta reyca Israel llajtamanta reypaj contra jatarirca. 6 Chai tiempomi rey Jehoramca Samariamanta llujshishpa Israelmanta tucui soldadocunata tandachirca. 7 Shinallataj Judá llajtamanta rey Jehosafatmanca shuj huillaitami cacharca. Paica: “Moab llajtamanta reyca ñucapaj contrami jatarishca. ¿Moab llajtapaj contra ñucahuan macanacunaman risha ninguichu?” nircami. Shina nijpimi Jehosafatca: “Canhuan rishallami. Ñucaca canhuanmi casha. Ñuca pueblopish cambaj pueblohuanmi canga. Ñuca caballocunapish cambaj caballocunahuanmi canga” nirca. 8 Chaimi Jehosafatca: “¿Maijan ñantataj llujshishun?” nishpa tapurca. Shina tapujpimi Jehoramca: “Edom llajtapi caj chaquishca pamba ñantami rishun” nirca.
9 Israelmanta reypish, Judá llajtamanta reypish, Edom llajtamanta reypish tandallami macanacunaman llujshircacuna. Canchis* punllata viajacushpami paicunaca soldadocunapajpish, paicuna pushacushca animalcunapajpish yacuta ña mana charircacuna. 10 Israelmanta reyca: “¡Ñucanchijpajca caica llaquimari! ¡Jehová Diosmari quimsandij reytaca Moab llajtata mandajpaj maquipi cungapaj tandachishca!” nircami. 11 Cutin Jehosafatca: “¿Manachu caipica Jehová Diospaj shuj profeta tiyan paihuan Jehová Diosta tapungapaj?” nishpami tapurca. Chashna nijpimi Israel llajtamanta reypaj shuj sirvijca: “Safatpaj churi Eliseomi caipi. Paica Elías maquita maillachunmi yacuta maquipi churaj carca”* nirca. 12 Chaimi Jehosafatca: “Paimi Jehová Dios ima nishcata parlai tucun” nirca. Chaimantami Israel llajtata mandaj reypish, Jehosafatpish, Edom llajtata mandaj reypish paita ricunaman uriyarcacuna.
13 Eliseoca Israel llajtamanta reymanca: “¿Ñucapajmanca imapajtaj shamungui? Cambaj yayapaj, cambaj mamapaj profetacunata tapugri” nircami. Chashna nijpipish Israelmanta reyca: “Ama shina nichu, ñucanchijtaca Jehová Diosmi Moab llajtapaj maquipi entregangapaj quimsandij reyta tandachishca” nircami. 14 Chaimi Eliseoca cashna nirca: “Jahua pacha soldadocunata mandaj causaj Jehová Diospaj shutipimi jurani. Ñucaca paitami sirvini.* Judá llajtamanta rey Jehosafatta llaquishcallamantami cantaca ricuni, can ima nishcatapish uyani. 15 Cunanca shuj arpapi tocajta pushamuichij” nircami. Pai chai arpapi tocai callarijpimi Jehová Diospaj espirituca* Eliseopajman shamurca. 16 Chaimi paica: “Jehová Diosca caitami nin: ‘Cai pugru pambapi allashpa achca zanjacunata ruraichij. 17 Jehová Diosca: “Cancunaca huairatapish, tamyatapish mana ricunguichijchu. Pero cai pugru pambapimi yacuca jundanga. Cancunaca chai yacutami ubyanguichij. Cancunapaj charina animalcunapish, shujtaj animalcunapish cai yacutami ubyangacuna”’ ninmi. 18 Shinapish chaica Jehová Diospaj ñaupajpica mana ima canchu. Moab llajtataca Diosca cancunapaj maquipimi cunga. 19 Muyundijta pircashca llajtacunata tucuchichij, rijsishca llajtacunatapish tucuchichij. Tucui alli yuracunatapish urmachichij, pugyu yacucunatapish tapaichij. Alli allpacunapipish granocuna ama pꞌucuchun rumicunata shitaichij” nircami.
20 Tutamanta lado grano ofrendata cuna horaspimi ñapish yacuca Edommanta chayamurca. Chashnami chai lugarpica yacu jundarca.
21 Tucui moabitacunaca paicunapaj contra reycuna macanacunaman llujshishcatami uyarcacuna. Chaimantami tucui macanacunaman ringapaj ña edadta charijcunata tandachircacuna. Chashnami paicunataca Moab llajta lindecunapi churarcacuna. 22 Moabitacuna tutamanta utca jatarijpica intica yacutami yallitaj achijyachicurca. Paicunaca yacutaca caishuj ladomanta pucanicuj yahuarta shinami ricurcacuna. 23 Chaimi paicunaca: “¡Chaica yahuarmari! Reycunaca paicunapuramari espadacunahuan huañuchinacushca. ¡Moabpi causajcuna, jacuchij, paicuna imalla charishca cosascunata quichumushun!” nircacuna. 24 Moabitacuna israelitacunapaj carpa huasicunaman yaicujpica israelitacunaca chai ratomi paicunata llaquichi callarircacuna. Chaimantami moabitacunaca paicunamanta miticushpa rircacuna. Israelitacunaca Moab llajtaman yaicushpami moabitacunataca asha asha huañuchishpa catircacuna. 25 Llajtacunatami urmachircacuna. Alli pꞌucuj allpacunapipish cada runami shuj rumita shitarcacuna. Chashnami chai allpacunataca rumicunahuan jundachircacuna. Yacu pugyucunatapish tucuitami taparcacuna. Tucui alli yuracunatapishmi urmachircacuna. Chashnami rumicunahuan rurashca Quir-Haréset pircacunalla saquirirca. Chaimi huaracacunahuan shitaj runacunaca chai llajta muyundijta shayarishpa urmachircacuna.
26 Moab llajtamanta reyca chai macanacuipi pirdishcatami cuentata curca. Chaita ricushpami Edom llajtamanta reypajman chayangapaj espadacunahuan macanacuj 700 runacunata ñanta pascachun pusharca. Pero chaimanca paicunaca mana chayai tucurcacunachu. 27 Moab llajtamanta reyca paipaj randi mandagrij punta churitami japishpa rupachishca sacrificiota shina pirca jahuapi paipaj diosman curca. Chaimantami gentecunaca israelitacunapaj contra yallitaj pꞌiñarircacuna. Chaimi Moab llajtamanta reyhuan macanacunata saquishpa paicunapaj llajtaman tigrarcacuna.