2 Reyes
18 Israel llajtata mandaj Elapaj churi Hosea quimsa huatacunata mandacujpimi Judá llajtamanta rey Acazpaj churi Ezequiasca mandai callarirca. 2 Ezequiasca 25 huatacunata charishpami rey tucurca. Paica 29 huatacunatami Jerusalenpi mandarca. Paipaj mamaca Zacariaspaj ushushi Abí* shutimi carca. 3 Ezequiasca paipaj ñaupa yaya David rurashca shinami Jehová Diospaj ñaupajpica allicunata ruraj carca. 4 Ezequiasmi adorana lugarcunata* anchuchirca. Adorana pilarcunatapishmi ñutushpa tucuchirca. Adorana postetapishmi urmachirca. Paimi Moisés cobremanta rurashca culebratapish ñutushpa tucuchirca. Chai punllacunacamami Israelmanta gentecunaca cai culebraman sacrificiocunata rupachishpa cushnichicushcacuna carca. Chai rurashcalla diostaca cobremanta rurashca culebra* nijcunami carca. 5 Ezequiasca israelitacunapaj Jehová Diospimi confiarca. Judá llajta tucui reycunamantaca Ezequías shinaca paipaj ñaupapish, paipaj qꞌuipapish ni pi mana tiyarcachu. 6 Ezequiasca Jehová Diosmanta manataj caruyashpami Diosta siempre cazuj carca. Jehová Dios Moisesman cushca mandashcacunatapishmi cazurca. 7 Shinallataj Jehová Diosca paihuanmi carca. Paica tucui imatapish alli yuyashpami ruraj carca. Asiria llajtamanta reypaj contra jatarishpami paitapish mana sirvirca. 8 Shinallataj Gaza llajtapi, chai llajtapaj allpacunapi, chapana torrecunapi, muyundijta pircashca llajtacunapipish* causaj filisteocunatami misharca.
9 Ezequías chuscu huatacunata mandacujpimi Asiria llajtamanta rey Salmanasarca Samaria llajtata llaquichingapaj huichiyarca. Chashnami Samaria llajta muyundijpica shayari callarirca. Chai tiempopica Elapaj churi Hoseaca Israelpimi canchis huatacunata mandacurca. 10 Asiriocunaca ña quimsa huatacuna tucucujpimi Samaria llajtata mishashpa japircacuna. Ezequías sujta huatacunata mandacujpi, Israel llajtamanta rey Hosea iscun huatacunata mandacujpimi asiriocunaca Samaria llajtata mishashpa japircacuna. 11 Chaimi Asiria llajtamanta reyca israelitacunata Asiriaman prezu shina aparca. Chashna apashpami israelitacunataca Halá llajtapi, Gozán jatun yacu cꞌuchupi caj Habor llajtapi causachun churarca. Shinallataj Media llajtacunapi tiyaj llajtacunapipish causachunmi churarca. 12 Israelitacunaca paicunapaj Jehová Diospaj nishcacunata mana uyashcamanta, paihuan ari ninacushcatapish mana cazushcamantami chashna llaquita aparcacuna. Chai ari ninacushcaca Jehová Diosta sirvij Moisés tucui mandashcacunami carca. Caicunataca paicunaca mana uyarcacunachu, mana cazurcacunachu.
13 Rey Ezequías 14 huatacunata mandacujpimi Asiria llajtamanta rey Senaqueribca Judapi tiyaj muyundijta pircashca tucui llajtacunata llaquichingapaj huichiyarca. Chashna mishashpami chai llajtacunata japirca. 14 Chaimi Judá llajtamanta rey Ezequiasca Lakís llajtapi causaj Asiria llajtamanta reyman cashna nichun mandarca: “Ñucaca pandarishcanimi. Caimanta anchui. Can tucui imalla mañashcataca cushallami” nirca. Chashna nijpimi Asiria llajtamanta reyca Judá llajtata mandaj rey Ezequiastaca 300 talento* cullquita, 30 talento orota cuchun obligarca. 15 Chaimantami Ezequiasca Jehová Diospaj huasipi tiyaj tucui cullquitapish, reypaj huasipi* achca valij cosascunata huaquichina cuartocunapi tiyaj cullquitapish curca. 16 Judá llajtamanta rey Ezequiasca Jehová Diospaj huasi pungucunatapish, pungucunapaj caspicunatapish paillatajmi orohuan jahuata churarca. Chai orohuan jahuata churashcata surcushpami Asiria llajtamanta reyman curca.
17 Asiria llajtamanta reyca tartantapish,* rabsaristapish,* rabsaquetapishmi* achca soldadocunahuan rey Ezequías maipi cashcaman Lakismanta Jerusalenman cacharca. Paicunaca Jerusalenmanmi huichiyarcacuna. Chaiman chayashpaca janaj ladoman caj jatun tanque yacu regana larca cꞌuchupimi saquirircacuna. Chai jatun tanqueca ropata tajshana ñan cꞌuchupimi carca. 18 Rey Ezequiasta llujshichun cayajpica reypaj huasita ricuj Hilquiaspaj churi Eliaquimpish, secretario Sebnapish, Asafpaj churi registrador Joapishmi paicunata tupanaman llujshirca.
19 Chaimi rabsaqueca cashna nirca: “Ezequiasman caita huillaichij: ‘Asiria llajtamanta jatun reyca caitami nin: “¿Cancunaca imapitaj confiacunguichij? 20 Canca ‘Ñucaca alli yuyaita, macanacungapajpish achca soldadocunatami charini’ nishpami yuyangui. Pero can nishcaca imapaj mana valinchu. ¿Maijanpi confiashpataj ñucapaj contra jataringuichij? 21 ¡Ricui! Canca Egipto llajtamanta rey ayudanapimi confiangui. Paica chijtarishca carrizomi can. Maijanpish chai chijtaricuj carrizopi taunarijca paipaj maquitami tujsichishpa pasachinga. Egipto llajtamanta rey faraonca paipi tucui confiajcunahuanmi chashna can. 22 Cutin cancunaca ñucamanca ‘Ñucanchij Jehová Diospimi confianchij’ ninguichijmi. ¿Manachu Ezequiasca Judapi, Jerusalenpi causaj gentecunataca ‘Jerusalenpi caj altar ñaupajllapi adorana canguichij’ nishpa Diospaj adorana lugarcunatapish, altarcunatapish tucuchichun mandarca?” ninmi’ nishpa huillaichij. 23 Shinaca Asiria llajtamanta ñuca amito reyhuan jacu shuj apuestata rurashun: canmanca 2.000 caballocunatami cuni, sichu chai tucui caballocunapi purijcunata japingui o mana. 24 Canca Egipto llajtamanta carretacunapi, caballopi purijcunapi confiashpaca ñuca amitopaj shuj mandajpaj uchilla sirvijllatapish maitataj mishai tucunguiyari. 25 ¿Cai llajtataca Jehová Dios mana mandajpichu ñucaca tucuchinaman shamushcani? Jehová Diosllatajmari ñucamanca: ‘Chai llajtaman huichiyashpa tucuchigri’ nirca” nircami.
26 Chashna nijpimi Hilquiaspaj churi Eliaquim, Sebná, Joapish rabsaquemanca: “Canta sirvijcunamanca arameo* shimipi parlapai. Ñucanchijca intindinchijmi. Pirca jahuapi caj gentecuna ama uyachunca judiocuna rimashca shimipica ama parlaichu” nircacuna. 27 Pero rabsaqueca: “¿Ñuca amitoca cai shimicunataca cancunallaman, cambaj amitollaman nichunchu cacharca? ¿Manachu cai shimicunaca pirca jahuapi tiyaj cꞌaricunapajpish can? ¿Manachu paicunaca cancunahuanca paicunapaj ismacunata micungacuna, paicunapaj ishpacunatapish ubyangacuna?” nircami.
28 Chaimi rabsaqué jatarishpaca judiocuna parlashca shimipi cashna caparirca: “¡Asiria llajtamanta jatun rey nishca shimicunata uyaichij! 29 Caitami reyca nin: ‘Ezequías cancunata pandachichunca ama saquichijchu. Paica ñuca maquimantaca mana quishpichi tucunchu. 30 Shinallataj Ezequías “Seguromi Jehová Dios ñucanchijta quishpichinga. Cai llajtapish Asiria llajtamanta reypaj maquipica mana urmangachu” nishpa Jehová Diospi confiachichunca ama saquinguichij. 31 Ezequiastaca ama uyaichijchu. Asiria llajtamanta reyca caitami nin: “Ñucahuan alli tucuichij. Ñuca mandachun saquichij.* Chashnami tucui cancunaca uva yuramanta, higo yuramanta micunguichij. Shinallataj cancunapaj pugyumantapish yacutami ubyanguichij. 32 Ñuca shamungacamami chashna ruranguichij. Ñuca shamushpaca cancuna shina charishca allpamanmi pushasha. Chai allpapica trigopish, cebadapish, uvapishmi pꞌucun. Caicunahuanmi cancunaca tandatapish, vinotapish ruranguichij. Shinallataj olivocunata, mielta pꞌucuj allpacunami can. Chaimanmi cancunataca pushasha. Chashnami cancunaca mana huañushpa causashpa catinguichij. Ezequías nishcataca ama uyaichijchu. Paica ‘Jehová Diosmi ñucanchijta quishpichinga’ nishpami cancunataca pandachicun. 33 ¿Huaquin llajtamanta dioscunaca paicunapaj propio gentecunataca Asiria llajtamanta reypaj maquimantaca quishpichi tucushcachu? 34 ¿Hamat llajtamanta, Arpad llajtamanta dioscunaca maipitaj canyari? ¿Sefarvaim, Hená, Ivá llajtacunamanta dioscunaca maipitaj canyari? ¿Chai dioscunaca Samaria llajtataca ñuca maquimantaca quishpichi tucushcacunachu? 35 ¿Llajtacunapaj tucui dioscunaca paicunapaj propio llajtata ñuca maquimanta quishpichi tucushcacunachu? Shinaca ¿Jehová Diospish Jerusalenta ñuca maquimanta quishpichi tucungachu?”’ ninmi” nircami.
36 Reyca gentecunataca “Imatapish ama cutichinguichij” nishcami carca. Chaimantami paicunaca ni shuj palabrallatapish mana cutichishpa upalla saquirircacuna. 37 Chaimi reypaj huasita ricuj Hilquiaspaj churi Eliaquimpish, secretario Sebnapish, Asafpaj churi registrador Joapish paicunapaj ropacunata lliquirishpa Ezequiaspaj ñaupajman rircacuna. Paicunaca rabsaqué ima nishcatami paiman huillarcacuna.