Jeremías
50 Jehová Diosca profeta Jeremiasmanmi caldeocunapaj allpa Babiloniamanta cai shimicunata nirca:
2 “Llajtacunapurapi huillashpa caita nichij.
Shuj señalta* churashpa huillaichij.
¡Ama imata pacaichijchu!
Cancunaca: ‘Babiloniataca mishashpami japishcacuna.
Bel shuti diosca pingaipimi saquirishca.
Merodacca* yallitaj manchaihuanmi saquirishca.
Paicunapaj santocunaca pingachishcami cashca.
Paicunapaj millanana* rurashcalla dioscunaca yallitaj manchaihuanmi saquirishcacuna’ nichij.
3 Janaj ladomanta shuj llajtami llaquichingapaj shamushca.
Paicunapaj allpata llaquinaita rurangapajmi shamushca.
Chaipica ña pi mana causanchu.
Runacunapish, animalcunapish miticushpami rishcacuna.
Librimi rishcacuna” nircami.
4 Jehová Diosca cashnatajmi nin: “Chai punllacunapi, chai tiempopica Israel pueblopish, Judá pueblopish tandallami shamungacuna. Huacaihuanmi puringacuna. Tandallami Jehová Diosta mashcangacuna. 5 Paicunaca Sion ladoman ñahuita churashpami chaiman chayangapaj maijan ñanta rina cashcata tapungacuna. Paicunaca: ‘Jacuchij, huiñaipaj shuj ari ninacuita rurashpa Jehová Dioshuan tandanacushunchij. Chaica mana cungarishcachu canga’ ningacunami. 6 Ñuca puebloca chingarishca ovejacuna shinami tucushca. Paicunata michijcunallatajmi chingarichun saquishcacuna. Urcucunaman, lomacunaman pushashpami caita chaita purichun saquishcacuna. Paicunaca paicunapaj samarina lugartami cungarishcacuna. 7 Paicunapaj contracuna japishpaca millpujllami carcacuna. Shinallataj paicunaca: ‘Ñucanchijca mana culpayuj canchijchu. Paicunallatajmi Jehová Diospaj ñaupajpi juchata rurarcacuna. Cashcata ruraj, paicunapaj ñaupa yayacuna shuyana Jehová Diospaj ñaupajpimi juchata rurarcacuna’ nijcunami carca” ninmi.
8 “Babilonia llajtamanta miticushpa richij,
caldeocunapaj allpacunamanta llujshichij.
Puntapi rij animalcuna shina caichij.
9 Ñucaca janaj lado allpamanta jatun llajtacunata cayashpami
Babiloniapaj contra cachacuni.
Paicunaca macanacungapajmi allichirishca shamungacuna.
Paicuna maipi cashcamantami Babiloniataca mishashpa japingacuna.
Paicunapaj flechacunaca macanacuj runapaj flechacuna shinami canga.
Yayacunataca churicuna illajtami saquingacuna.
Paicunaca maipi shitana cashcapimi flechacunata shitangacuna.
10 Caldea llajtamantaca tucui imalla tiyashcatami apangacuna.
Chai llajtamanta tucui imalla tiyashcata apajcunaca cushillami sintiringacuna” ninmi Jehová Diosca.
11 “Cancunaca ñuca propio herenciata quichushpaca
contentomi fiestata ruracurcanguichij.
Qꞌuihua chaupipi shuj bizi saltarij shinami saltacurcanguichij.
Caballocuna huacarij shinami huacaricurcanguichij.
12 Cancunapaj mamaca pingachishcami cashca.
Cancunata huachaj mamaca shungu pꞌaquirishcami saquirishca.
¡Ricuichij! Paica shujtaj llajtacunamanta yalli yangallami tucushca.
Yacu illaj chaquishca pambami tucushca, shitashca pambami tucushca.
13 Jehová Dios yallitaj pꞌiñarishcamantami chai llajtapica ña pi mana causanga.
Chai llajtaca tucuimi shitashca saquiringa.
Babiloniata pasajcunaca tucuicunami mancharishca ricushpa saquiringacuna.
Tucui llaquicuna japishcata ricushpaca burlaringacunami.*
14 Arcota chutajcuna,* tucui cancunaca macanacungapaj allichirishca shayarishpa
Babilonia llajtata tucui ladocunamanta llaquichichij.
Flechacunata shitaichij, flechacunahuanca ama saquirichijchu.
Chai llajtaca Jehová Diospaj ñaupajpimi juchata rurashca.
15 Babiloniataca tucui ladocunamanta sinchita caparishpa llaquichichij.
Paica ña mana imata rurai tucunchu.
Paipaj pilarcunaca urmashcami, muyundij pircacunapish urmachishcami cashca.
Jehová Diosmi chashna castigashca.
Chai llajtataca tigra llaquichichij.
Pai imata rurashca shinallataj paitapish ruraichij.
16 Babilonia llajtamanta tarpuj runata chingachichij.
Cosecha tiempopi hocesta japijtapish chingachichij.
Manchanai millai espadamantami cada uno paicunapaj puebloman tigrangacuna,
cada unomi paicunapaj allpaman miticushpa ringacuna.
17 Israelmanta runacunaca caita chaita cachashca ovejacuna shinami can. Paicunataca leoncunami caita chaita cachashca. Puntaca Asiria llajtamanta reymi tucui micushca. Qꞌuipaca Babilonia llajtamanta rey Nabucodonosormi* paicunapaj tullucunata cashtushca. 18 Chaimantami jahua pacha soldadocunata mandaj Jehová Dios, israelitacunapaj Diosca caita nin: ‘Babiloniamanta reytapish, paipaj llajtatapish castigashami. Asiria llajtamanta reyta castigashca shinallatajmi castigasha. 19 Israeltaca paita michina qꞌuihuacunamanmi tigrachimusha. Paica Carmelo urcupi, Basán urcupimi micunga. Shinallataj Efraín urcucunapi, Galaad urcucunapimi sajsajta micunga’ ninmi”.
20 “Chai punllacunapi, chai tiempopica
Israel culpata charishcatami yachasha ningacuna.
Pero ima culpata mana japingacunachu.
Judapaj juchacunatapish mana japingacunachu.
Ñucaca quishpirijcunataca perdonashami” ninmi Jehová Diosca.
21 “Merataim llajtapi causajcunata, Pecodpi causajcunata llaquichingapaj huichiyai.
Paicunaca huañuchishca, tucui tucuchishca cachun” ninmi Jehová Diosca.
“Ñuca tucui mandashcata rurai.
22 Llajtapica macanacuipaj caparishcami uyarin.
Shuj jatun llaquimi uyarin.
23 ¡Aij, allpapi tiyaj tucui llajtacunata llaquichij comboca ima shinami chaupirishca, ima shinami ñuturishca!
¡Babiloniaca shujtaj llajtacunapajca mancharinami tucushca!
24 Babilonialla, cambaj ñaupajpica shuj trampatami churarcani,
canca mana cuentata cushpami chaipi urmashcangui.
Canca Jehová Diospaj contra shayarishcamantami
japishca, apashca cashcangui.
25 Jehová Diosca paipaj huaquichina cuartotami pascashca.
Chai cuartomantami pai yallitaj pꞌiñarishcata ricuchingapaj macanacuna armacunata llujshichin.
Tucuita Mandaj Amito, jahua pacha soldadocunata mandaj Jehová Diosca caldeocunapaj allpapimi
shuj trabajota ruranata charin.
26 Caru lugarcunamanta Babiloniata llaquichichij.
Paipaj grano huaquichinacunata pascaichij.
Paitaca granocunata montonaj shina montonaichij.
Tucui tucuchichij.
Chai llajtamantaca pi ama quishpirichun.
27 Paipaj tucui malta torocunata huañuchichij.
Huañuchina lugarman uriyachichij.
¡Aij paicunalla, paicunapaj punllaca ñami pajtashca,
paicunata castigana tiempomi chayashca!
28 Miticushpa rijcuna rimashcami uyarin,
Babilonia llajtamanta quishpirishpa rijcuna rimashcami uyarin.
Paicunaca Jehová Dios castigagrishcata Sionpi huillangapajmi rincuna.
Diospaj huasita llaquichijcunata castigagrishcata huillangapajmi rincuna.
29 Babiloniata llaquichichun arcohuan flechacunata shitajcunata cayaichij,
arcota chutajcunataca* tucuicunata cayaichij.
Chai llajta muyundijpi carpa huasicunata shayachishpa saquirichij. Pi llujshishpa richunca ama saquinguichijchu.
Imata rurashcamanta pai japina cashcata cuichij.
Pai imata rurashca shinallataj ruraichij.
Paica Jehová Diospaj ñaupajpimi jatun tucushca.
Paica Israelpaj Jucha illaj Diospaj ñaupajpimi chashna rurashca.
30 Chaimantami chai llajtamanta jovencunaca plaza pambapi urmangacuna.
Chai punllaca tucui soldadocunami huañungacuna”* ninmi Jehová Diosca.
31 “Mana cazuj Babilonialla, ¡ricui! Ñucaca canhuanmi macanacusha.
Cambaj punllaca chayanami can, canta castigana tiempoca chayanami can” ninmi Tucuita Mandaj Amito, jahua pacha soldadocunata mandaj Jehová Diosca.
32 “Mana cazuj Babilonialla, canca ñitcarishpami urmangui.
Cantaca pi mana jatarichingachu.
Cambaj llajtacunataca ninahuanmi rupachisha.
Ninaca cambaj muyundijpi tucui imalla tiyashcatami rupachinga”.
33 Jahua pacha soldadocunata mandaj Jehová Diosca caitami nin:
“Israelmanta gentecunapish, Judamanta gentecunapish llaquichishcami cashcacuna,
paicunata prezu shina apajcunaca mana cacharincunachu.
Paicuna richunca mana saquincunachu.
34 Pero paicunata Tigra randijca sinchimi can.
Paica jahua pacha soldadocunata mandaj Jehová shutimi.
Paica llajtapi sumaj causai tiyachunmi
cashcata rurashpa juzganga.
Babilonia llajtapi causajcunata manchachingapajmi chashna ruranga” ninmi.
35 “Caldeocunapaj contrami shuj espada shamunga.
Babiloniapi causajcunapaj contra, mandajcunapaj contra, yachaisapa runacunapaj contrami shuj espada shamunga” ninmi Jehová Diosca.
36 “Shinallataj chushaj shimicunata nijcunapaj* contrami shuj espada shamunga. Chaimi paicunaca muspa runacuna shina comportaringacuna.
Paipaj macanacujcunapaj contrapishmi shuj espada shamunga. Chaimi paicunaca yallitaj mancharishca saquiringacuna.
37 Chashnallataj paicunapaj caballocunapaj contra, paicunapaj macanacuna carretacunapaj contrami shuj espada shamunga.
Chaipi causaj shujtaj llajtamanta runacunapaj contrapishmi shuj espada shamunga.
Chaimi paicunaca manchaihuan caj huarmicuna shina tucungacuna.
Shinallataj paipaj achca valij cosascunapaj contrami shuj espada shamunga. Chai cosascunataca tucuimi quichungacuna.
38 Aij paipaj yacucunalla, chaquiringamari.
Chai llajtapica rurashcalla dioscunami tiyan.
Paicuna muscuipi shina mancharinacunata ricushcamantami lococuna shina comportarincuna.
39 Chaimantami chaquishca pambapi causaj animalcunaca sacha allcucunahuan chaipi causangacuna.
Avestruzpishmi chaipi causanga.
Chai llajtapica gentecunaca ña mana nunca causangacunachu.
Huiñai huiñaipajmi shitashca saquiringa”.
40 “Sodoma llajtata, Gomorra llajtata, chai llajtacuna cꞌuchullapi saquirij pueblocunata Dios tucuchijpica ña pi mana causarcachu. Chashnallatajmi Babilonia llajtapipish ña pi mana causanga. Shuj runallapish chaipica ña mana nunca causangachu” ninmi Jehová Diosca.
41 “¡Ricuichij! Janaj ladomantami shuj pueblo shamunga.
Shuj jatun llajta, jatun reycunapishmi macanacungapaj jataringacuna.
Allpapi tiyaj ashtahuan caru ladocunamantami jataringacuna.
42 Paicunaca arcocunahuan, lanzacunahuanmi jataringacuna.
Paicunaca millaicunami can, llaquishcata mana ricuchingacunachu.
Caballocunapi tiyarishcacuna rishpaca
mama cucha manchanaita huajiashca shinami uyaringa.
Babiloniapaj ushushilla, canhuan macanacungapajmi shuj runa shinalla allichirishpa shayarincuna.
43 Babiloniamanta reyca paicunamantami shuj huillaita uyashca.
Chaimi paipaj maquicunaca fuerza illaj saquirishca.
Paica yallitaj sustarishcami can.
Huahuata huachacuj huarmi shinami nanaihuan can.
44 ¡Ricuichij! Jordán jatun yacu uripi tiyaj uchilla yuracuna chaupimanta león shina pitajshi llujshishpami Babiloniapi saquirij michina alli qꞌuihuacunata llaquichinga. Pero ñucami chaipi causajcunataca rato llujshichishpa cachasha. Shinallataj agllashca runatami chaipi mandachun churasha. ¿Pitaj ñuca shina canyari? ¿Pitaj ñuca contra tucungari? ¿Maijan michijtaj ñuca contra shayaringari? 45 Shinaca runacuna, Babilonia llajtapaj contra Jehová Dios imata decidishcata uyaichij. Caldeocunapaj allpapi causajcunapaj contra imata ruranata yuyacushcata uyaichij:
Huahua mimicunataca* sirij sirijtami apashpa ringacuna.
Paica paicunapaj culpamantami paicuna causacushca lugartaca shitashcata saquinga.
46 Babiloniata mishashpa japishcamanta caparinacujpimi allpaca chujchunga.
Caparishcaca shujtaj llajtacunapurapimi uyaringa”.