Jeremías
52 Sedequiasca 21 huatacunata charishpami rey tucurca. Paica 11 huatacunatami Jerusalenpi mandarca. Paipaj mamaca Libná llajtamanta Jeremiaspaj ushushi Hamutal shutimi carca. 2 Sedequiasca Jehoiaquim shinallatajmi Jehová Diospaj ñaupajpica mana allicunata ruraj carca. 3 Jehová Diosca Jerusalenpi, Judapi causajcunahuan yallitaj pꞌiñarishca cashcamantami tucui chaicuna tucuchun saquirca. Chashnami Diosca paipaj ñaupajmanta paicunataca anchuchirca. Qꞌuipaca Sedequiasca Babilonia llajtamanta reypaj contrami jatarirca. 4 Sedequías iscun huatacunata mandacujpi décimo quillapaj chunga punllapimi Babilonia llajtamanta rey Nabucodonosorca* paipaj tucui soldadocunahuan Jerusalenpaj contra macanacunaman shamurca. Paicunaca Jerusalenpaj contra macanacungapajmi carpa huasicunapi saquirircacuna. Chai llajta muyundijtapish shuj pircatami shayachircacuna. 5 Rey Sedequías 11 huatacunata mandangacamami chai soldadocunaca chai llajta muyundijta shayarishpa saquirircacuna.
6 Cuarto quillapaj iscun punllapica chai llajtapica yallitaj yaricaimi tiyarca. Chai llajtapi causaj gentecunapajca ima micuna mana tiyarcachu. 7 Ultimopica caldeocunaca Jerusalén llajtapaj pircatami jutcurcacuna. Reypaj jardín cꞌuchupi ishqui pircacunapaj chaupipi tiyaj pungutami rey Sedequiaspaj tucui soldadocunaca tuta chai llajtamanta llujshishpa rircacuna. Chaicamaca chai llajta muyundijpimi caldeocunaca shayarircacuna. Shinallataj rey Sedequiasca Arabá pugru pamba ñantami rirca. 8 Pero caldeocunapuramanta soldadocunaca rey Sedequiasta catirashpa rishpami Jericó llajta chaquishca pambapi paitaca japircacuna. Sedequiaspaj tucui soldadocunapish caita chaitami rircacuna. 9 Rey Sedequiasta prezu shina japishpami Hamat allpapi saquirij Riblaman huichiyachircacuna. Chaipimi Babilonia llajtamanta reypaj ñaupajman apashpa paitaca juzgarcacuna. 10 Babiloniamanta reyca Sedequiaspaj churicunatapish paipaj ñaupajpimi huañuchirca. Shinallataj Judá llajtamanta mandajcunatami Riblapi huañuchirca. 11 Chai qꞌuipaca Babilonia llajtamanta rey Nabucodonosorca Sedequiaspaj ñahuicunata ciegoyachishpami* cobre cadenacunahuan huatashpa paitaca Babiloniaman aparca. Chaipimi huañungacama prezupi churarca.
12 Babilonia llajtata rey Nabucodonosor 19 huatacunata mandacujpimi quinto quillapi, chai quillapaj chunga punllapi Nebuzaradanca Jerusalenman chayarca. Paica Babiloniamanta reypaj guardiacunata mandaj, reyta ayudajmi carca. 13 Nebuzaradanca Jehová Diospaj huasita, reypaj huasita,* Jerusalenpi caj tucui huasicunatami rupachirca. Chai llajtapi rijsishca runacunapaj tucui huasicunatapishmi rupachirca. 14 Tucui caldeocunapuramanta soldadocunaca guardiacunata mandajhuanmi Jerusalén muyundij pircacunata urmachirca.
15 Guardiacunata mandaj Nebuzaradanca humilde caj huaquin gentecunata, Jerusalén llajtapi saquirishca gentecunatapishmi prezuta shina aparca. Shinallataj Babilonia llajtamanta reypaj parte tucushpa apoyajcunatapish, saquirishca alli yachaj artesanocunatapishmi prezuta shina aparca. 16 Shinapish guardiacunata mandaj Nebuzaradanca yallitaj pobre huaquin gentecunatami chai llajtapi uva chagracunata cuidachun, sinchi trabajocunata rurachunpish saquirca.
17 Caldeocunaca Jehová Diospaj huasipi tiyaj cobremanta rurashca pilarcunatapish tucuimi ñuturcacuna. Chashnallataj uchilla carretacunatapish tucuimi ñuturcacuna. Jehová Diospaj huasipi tiyaj cobremanta rurashca jatun tanquetapish* tucuimi ñuturcacuna. Chashnami chai tucui cobretaca Babiloniaman aparcacuna. 18 Shinallataj baldecunata, palacunata, ninata huañuchinacunata, tazoncunata, copacunata, Diospaj huasipi tiyaj cobremanta rurashca tucui utilizashca cosascunatapishmi aparcacuna. 19 Guardiacunata mandajca lavacaracunatapish, braserillocunatapish, tazoncunatapish, baldecunatapish, candelerocunatapish, copacunatapish, oro puromanta, cullqui puromanta rurashca tazoncunatapishmi aparca. 20 Rey Salomonca Jehová Diospaj huasipajca cobremantami ishqui pilarcunata, jatun tanqueta, jatun tanque ucu ladopi caj 12 cobre torocunata, uchilla carretacunatapish rurashca carca. Chaicunataca achca cobrehuan rurashcamantami mana pesai tucurcacuna.
21 Cada pilarmi altomanca pusaj metrocunata* charirca. Shinallataj pichca metrocuna yallita* midij huascahuan muyuchishpa midinallami carca. Chai pilarcunapaj filoca chuscu dedocuna* vali racumi carca, chaupipica jutcumi carca. 22 Chai pilarpaj capitelca cobremantami rurashca carca. Chai capitelca altomanca ishqui metrocuna yallitami midirca. Chai capitelpaj muyundijpica mallapish, granadacunapish tucuimi cobremanta rurashca carca. Catij pilarpish caishuj pilar shinallatajmi carca. Granadacunapish punta pilarpaj granadacuna shinallatajmi carca. 23 Muyundijpica 96 granadacunami ricunalla carca. Malla muyundijpica tucuica 100 granadacunami tiyarca.
24 Guardiacunata mandajca sacerdotecunata mandaj Serayatapish, sacerdote Sofoniastapish, punguta cuidaj quimsa runacunatapishmi pusharca. Sofoniasca sacerdotecunata mandajta ayudajmi carca. 25 Guardiacunata mandajca Jerusalén llajtamantami palaciopi achca autoridadta charij shuj runata aparca. Chai runaca soldadocunata pushajmi carca. Shinallataj reyman consejocunata cuj canchis runacunatami aparca. Paicunaca chai llajtapimi cashca carca. Soldadocunata mandajpaj secretariotapishmi aparca. Cai secretariomi tucui llajtamanta gentecunata tandachij carca. Chai llajtapi saquirishca 60 pobre cꞌaricunatapishmi aparca. 26 Guardiacunata mandaj Nebuzaradanca paicunatami Riblaman pusharca. Chashnami paicunataca Babilonia llajtamanta reypaj ñaupajman aparca. 27 Babilonia llajtamanta reyca paicunataca Hamat allpapi saquirij Riblapimi huañuchirca. Chashnami Judá llajtamanta gentecunataca paicunapaj llajtamanta llujshichishpa cacharcacuna.
28 Rey Nabucodonosorca tucui cai gentecunatami prezuta shina aparca. Séptimo huatapica 3.023 judiocunatami aparca.
29 Rey Nabucodonosor 18 huatacunata mandacujpimi Jerusalenmantaca 832 gentecuna apashca carca.
30 Rey Nabucodonosor 23 huatacunata mandacujpimi guardiacunata mandaj Nebuzaradanca 745 judiocunata prezuta shina aparca.
Tucuica 4.600 gentecunami prezu shina apashca carcacuna.
31 Judá llajtamanta rey Joaquinca 37 huatacunatami Babilonia llajtapi prezu shina carca. Chai huatapimi rey Evil-Merodacca Babilonia llajtata mandai callarirca. Paimi chai huatapaj 12 quillapaj 25 punllapi Judá llajtamanta rey Joaquintaca prezumanta llujshichishpa cacharichirca. 32 Paica rey Joaquintaca allimi tratarca. Babiloniapi paihuan caj caishuj reycunamantapish ashtahuan yallimi paita jatunyachirca. 33 Joaquinca prezupi churarina paipaj ropatami llujshichirca. Paica huañuna horascamami reypaj mesapi micushpa causarca. 34 Babilonia llajtamanta reyca Joaquinmanca cada punllami pai huañuna horascama micunata cararca.