Jonás
1 Jehová Diosca Amitaipaj churi Jonasmanmi* cai shimicunata nirca: 2 “Nínive jatun llajtaman ri. Paicunata castigagrishcata huillagri. Paicuna millaita ruracushcatami ricushcani” nircami.
3 Ashtahuanpish Jonasca Jehová Diosmanta miticushpami Tarsis llajtaman rinata yuyarirca. Jope llajtaman uriyashpaca Tarsisman rigrij shuj barcotami ricurca. Chaimantami paica pasajeta pagashpa Jehová Diosmanta caruyashpa barcopi cajcunahuan Tarsisman ringapaj barcoman llujshirca.
4 Jehová Diosca mama cuchapica shuj jatun* huairatami jatarichirca. Chaimi yacupi jatun acapana jatarijpi barcoca ñalla pꞌaquirigrirca. 5 Barcopi trabajajcunaca yallitaj mancharishcami carcacuna. Chaimantami paicunata ayudachun cada uno paicunapaj diosta mañai callarircacuna. Shinallataj barcopi imalla tiyashcacunataca ama llashachunmi yacuman shitai callarircacuna. Shinapish Jonasca bodega ucumanmi uriyashca carca. Chaipi siririshpami huañuita dormirirca. 6 Barcota pushaj capitán Jonaspajman cꞌuchuyashpaca: “¿Ima nishpataj dormicunguilla? ¡Jatari, cambaj diosta mañai! Dios verdadero ñucanchijta llaquishcata ricuchijpi manapishchari huañushun” nircami.
7 Chai huashami caishuj chaishuj parlanacushpaca: “Cai llaquimanta pi culpata charishcata yachangapajca sorteashpa ricushunchij” nircacuna. Chashna sorteashpa ricujpica Jonaspimi urmarca. 8 Chai runacunaca: “¿Pipaj culpamantataj cai llaquitaca apacunchij? ¿Imapitaj trabajangui? ¿Maimantataj shamungui? ¿Maijan llajtamantataj cangui? ¿Maijan familiamantataj cangui? Huillahuai” nircacunami.
9 Chaimi Jonasca: “Ñucaca hebreomi cani. Jahua pacha Jehová Diostami adorani. Paimi mama cuchatapish, allpatapish rurarca” nishpa cutichirca.
10 Chashna cutichijpimi chai runacunaca ashtahuan mancharinacushpaca: “¿Imatataj rurashcangui?” nircacuna. (Chai runacunaca Jonasllataj parlashcamantami Jehová Diosmanta miticushpa ricushcata yacharcacuna). 11 Mama cucha yacu caiman chaiman ashtahuan ashtahuan cuyuricujpimi chai runacunaca: “¿Yacu calmarichunca canhuanca imatataj rurashun?” nircacuna. 12 Chashna nijpimi Jonasca: “Ñucataca alzashpa mama cucha yacuman shitaichij. Chashna rurajpimi yacuca calmaringa. Ñuca culpamanta yacupi cai jatun acapana jatarishcataca allimi yachani” nirca. 13 Shinapish chai runacunaca yacu uriman cutin barcota pushangapajmi tucui fuerzahuan purichi callarircacuna. Pero yacu ashtahuan ashtahuan cuyurijpimi mana pudircacuna.
14 Chaimi chai runacunaca Jehová Diostaca: “¡Aij Jehová Dioslla! Cai runamanta ñucanchijcuna huañuchunca ama saquihuaichu. Jehová Dioslla, cambaj munaimantami tucui caica pasacun. Chaimanta mana culpata charij shuj runa huañushcamantaca* ama ñucanchijtaca juchachihuaichu” nishpa rogarircacuna. 15 Chai qꞌuipaca Jonasta alzashpami mama cucha yacuman shitarcacuna, chaimi yacuca calmarirca. 16 Chaita ricushpami chai runacunaca Jehová Diosta achcata mancharcacuna. Paicunaca Jehová Diosmanmi shuj sacrificiota curcacuna. Shinallataj paita sirvingapajmi ari nircacuna.
17 Jehová Diosca Jonasta millpuchunmi shuj jatun pescadota cacharca. Jonasca quimsa punllata, quimsa tutatami pescadopaj huijsa ucupi carca.